Rosai Ḇefnai fa Saksi Yahwe Moḇ Sakfrur Anan Ḇesren Iḇese ro Gereja Ḇesena?

Moḇ nggakfrur Anan Ḇesren ima imnis kuker rosai Refo ikofen na. Sap Munara ine kako ḇe ”Anan ro Roḇ kuker Tuan”, Anan Ḇepupes, oroḇaido munara Swarapepen Manseren Yesus marmar ḇyedi. (1 Korintus 11:20) Fama, moḇ gereja ḇebor sya sakfrur roi ine iḇese kuker rosai Refo ikofen na.

Fandun ḇyena

Fandun ro munara Anan ro Roḇ kuker Tuan ine iso kokswarepen ma kofasnai kasumasa kukro Manseren Yesus imarwarek ko kwar. (Matius 20:28; 1 Korintus 11:24) Ine iḇese ro roi sor ḇe sakramen, ḇaido munara sifrur fa soḇe snonggaku ani na ismai barakas ḇaido ismai payasyos ro sasar ḇyena.a Refo doḇe nyan oser insama kosmai payasyos ro sasar koḇena iso kofrur roi ḇeradirya na ḇa, imboi kokyar faro Yesus i kada.​—Roma 3:25; 1 Yohanes 2:1, 2.

Sifrur na ker ke?

Yesus iwan manfamyan ḇyesi fa sifrur munara ine, mboi ikofenḇair mnis ḇa sifrur na rarwan rifis kaku. (Lukas 22:19) Sia skara isrow ya iso sifrur na ro paik nakam, minggu nakam, ras nakam, rarwan riḇeso ro ras oser, ḇaido sifrur na ker.b Imbape, roi ono naisya fandun fa kokara pyum na resari.

Yesus ifrur munara Anan ro Roḇ kuker Tuan ro tanggal ḇemnis kuker munara Paskah Yahudi. Imar ro ras ḇemnis kako. (Matius 26:1, 2) Ine isrow kukro Refo doḇe Yesus farsarser marmar ḇyeja imnis kuker domba Paskah. (1 Korintus 5:7, 8) Sifrur ras Paskah taun oser rarwan oser. (Keluaran 12:1-6; Imamat 23:5) Rarirya kako, snonggaku Kristen ro abad randak siwara sifrur munara Swarapepen Yesus marmar ḇyedi taun oser rarwan oser.c Saksi-Saksi Yahwe sakso nyan ine raris moḇ Refo ikofen raya.

Tanggal ma oras

Nyan Yesus ifrur randak munara Swarapepen nafnoḇek ko fa kofawi kofrur munara ine rarwan rifis kaku, ma fafisu risaiso isrow fa kofrur na. Ifrur munara ine ro tanggal 14 paik Nisan taun 33 M fafisu ori ya syun kwar, imnis kalender ro fafisu naiwara. (Matius 26:18-20, 26) Raris snonggaku Kristen ro abad randak siwara, nggakfrur munara ine ro tanggal 14 paik Nisan ro taun nakam.d

Ras ḇe 14 paik Nisan taun 33 M, ima ras Jumat nairi. Ḇape, tanggal ani na isapi ro ras ḇesisye ro taun ḇe taun. Inja, insama nggofawi tanggal 14 paik Nisan ro taun oso na isapi ro ras risai, nggokor na raris moḇ sbukikarkor ro fafisu Yesus ikenem ya. Inja, nggokor na kuker kalender Yahudi ḇero baboine moḇ sbukikor na ḇa.e

Mamami ma anggur

Fafisu Yesus ifrur munara ḇebabo anya, ḇyepake mamami sifrur kuker roi ḇefrur pisen ḇa ḇaido sor ḇe ragi na ḇa ma ḇyepake monda anggur ḇerik ḇedawer ro munara Paskah ya. (Matius 26:26-28) Inja, nggo kako nggoḇepake mamami srir ragi ḇa ḇaido roi ḇesena ḇa. Nggoḇepake kako anggur ḇerik ḇekaku, anggur dur risya ḇa ḇaido srir roi ḇemarnden ro na ḇa, sḇe na fa nfadwer ḇe alkohol ḇa, ḇaido srir roi ḇesena ḇa.

Gereja ḇeḇeso sepake mamami ḇepisen. Imbape, wos ”ragi” sap ro Refo sbukiḇair ker na faro sasar ya ma roi ḇeḇeninyan. (Lukas 12:1; 1 Korintus 5:6-8; Galatia 5:7-9) Inja, mamami ḇepisen ḇa iso ḇesrow kaku ḇeḇair ḇe Yesus baken ḇemnis kaku ḇyeja. (1 Petrus 2:22) Roi oso wer ḇemnis ḇa kuker rosai Refo ikofen ya iso sfadwer anggur ḇekaku kuker anggur dur. Gereja ḇeḇeso sifrur na kukro soḇe insama nafnai awer si fa sfarandinem alkohol. Imbape, Refo ima idwarek snonggaku sya fa sinem alkohol ya ḇa.​—1 Timotius 5:23.

Rik ma kraf ḇekaku naisya ḇa, mboi kakop monda nairi

Mamami ḇepisen ḇa ma anggur ḇerik ro munara Swarapepen nama kakop monda ḇebair ḇe Yesus rik ḇyena ma kraf ḇyeja. Snonggaku sia soḇerada mamami ma anggur nfadwer kuker mujisat ḇe Yesus kraf ma rik ḇekaku ḇyena, imboi roi ine kyaku ḇa. Kokara roi ḇeḇeso raris rosai Refo ikofen nane.

• Manseren Allah parenta Ḇyena nadwarek snonggaku oso fa dinem rik. (Kejadian 9:4; Farfyar 15:28, 29) Inja, Yesus iwan manfamyan ḇyesi fa sinem rik ido, ine ḇyeḇair idif si fa spampum Allah parenta Ḇyena. Kokyar na Yesus ipok ifrur roi ine ḇa kukro manggundi iwan kwar faro ḇerower i sya fa sisouser Allah parenta Ḇyena.​—Yohanes 8:28, 29.

• Manwawan sya sinem kaku Yesus rik ḇyena ido, na Yesus ikofen fa ”nari sisbawer” rik ḇyena ḇa. Wos ”nari” ine kyurfasnai byuk manggundi ḇe farsarser ro fafisu ani ḇaim.​​—Matius 26:28, NW.

• Yesus byuk kenem ḇyeja ḇe farsarser ”ḇerarwan oser monda” isof fyoro. (Ibrani 9:25, 26) Fama, mamami ma anggur nfadwer ḇe Yesus kraf ḇyeja ma rik ḇyena ro munara Swarapepen ya ido, na snonggaku ḇeyan mamami ma ḇeyinem anggur sya sbuk Yesus ḇe farsarser ḇembran ker.

• Yesus ikofen radine ḇa, ”Mkofrur rarirya fa mkoḇe aya ḇe farsarser.” Ḇape Yesus doḇe, ”Mkofrur rarirya fa mkoswarepen aya.”​—1 Korintus 11:24.

Snonggaku sia sikyar mamami ma anggur nfadwer ḇe Yesus kraf ma rik ḇekaku ḇyena. Kakyar senane neknam ro mnuk oso ro Refo ya. Rupa ra, ro Refo ḇebor na, roi Yesus ikofen fafisu duf anggur anya sfarwei na radine, ”Inenido rik Ayenai rya.” (Matius 26:28) Imbape, manfawawi Refo ḇebor sya soḇe fararwei nane nasrow ḇa. Isrow ya iso, Yesus wos ḇyenane sfarwei na ḇe ”Ine ḇyeḇair ḇe rik ayena”, ”Ine ḇyekakop ḇe rik ayena”, oroḇaido ”Ine kyur ḇe rik ayena”.f Kofawi kwar Yesus imbe byuk farkarkor ido, na dap ker wos peper ḇae.​—Matius 13:34, 35.

Mansei ḇeyan mamami ma ḇeyinem anggur ya?

Fafisu Saksi-Saksi Yahwe sifrur munara Swarapepen Kristus marmar ḇyedi, ḇeyan mamami ma ḇeyinem anggur sibor ḇa. Rosai ḇefnai fa sibor ḇa?

Manseren Yahwe ifrur asas kwar kuker er Israel ḇepon siwara. Imboi, Yesus rik ḇyena nasbawer kwar fa nfadwer asas anna kuker ”asas ḇebabo”. (Ibrani 8:10-13) Inja snonggaku Kristen syakam ḇa boi, snonggaku ḇeyaksun ro asas ḇebabo ine siso monda na ḇeyan mamami ma ḇeyinem anggur ro munara Swarapepen ya. Siso snonggaku ’ḇesmai fararyor kwar ro Allah’ kuker nyan oso ḇese. (Ibrani 9:15; Lukas 22:20) Nari sepoik kayam fnoḇek Kristus i ro nanggi. Refo doḇe snonggaku ri 144.000 siso monda ḇesmai syowi ḇeba ine.​—Lukas 22:28-30; Fasasna 5:9, 10; 14:1, 3.

Snonggaku ḇepoik kayam fnoḇek Yesus i sya, sor si ḇe raryur kasun. Ḇape ḇebor ro ko, kona saneraro fa kaksun ro raryur ḇeba nari ḇesmai kankenem fyoro ro supswan ine. (Lukas 12:32; Fasasna 7:9, 10) Kaku ḇae, nari kan mamami ma kinem anggur ro munara Swarapepen Kristus marmar ḇyedi ḇa. Imbape, kokofen kasumasa kaku kukro Yesus byuk kenem ḇyena fa imarwarek ko kwar.​—1 Yohanes 2:2.