Rosai Sor ḇe Baptis ya?
Kankarem ro Refo
Rofyor snonggaku oso ḇyebaptis, nari spanduk baken ḇyedi ḇe war yadori mura sinanggow i ḇe bo wer.a Iso ḇefnai Yesus ḇyebaptis ro warbeki ḇeba. (Matius 3:13, 16) Rarirya kako, snon Etiopia ḇeyor fa dakḇebaptis fyor myam ”moḇ ḇeḇewar oso”.—Kisah 8:36-40.
Baptis ido rosairiri
Refo byukimnis ḇaḇebaptis kuker karamram. (Roma 6:4; Kolose 2:12) Sebaptis snonggaku oso ro war ya ḇeḇair imar kwar ro nyan kenem ḇekwar ḇyedi ma ikenem babo ḇe snonggaku Kristen ḇebuk kenem ḇyena kwar ḇe Manseren Allah I. Nyan dun na fyor ḇyebaptis ḇaim ma baptisan ani ḇardi nama Allah fasasos Ḇyena insama snonggaku oso ismai sneuser ḇesren snar ikyar kwar faro Yesus Kristus fasaspar ḇyena. (1 Petrus 3:21) Inja,Yesus fyarkor manfamyan ḇyesi fandun fa seḇaptis.—Matius 28:19, 20.
Koḇebaptis ro war ine ipyos sasar koḇena ke?
Oroba. Refo fyarkor ko snar ḇepyos sasar koḇena iso farsarser fasaspar Yesus ḇyena monda. (Roma 5:8, 9; 1 Yohanes 1:7) Imbape, insama kosmai fainda ro fasarser anya, snonggaku oso fandun fa ikyar faro Yesus i, fyadwer kenem ḇyena insama namnis kuker Yesus farkarkor ḇyena, mura ḇyebaptis.—Kisah 2:38; 3:19.
Refo iso ḇekofen sebaptis kapira sya ke?
Oraḇa. Parenta fa sebaptis kapira sya naisya ro Refo ḇa. Gereja ḇeḇeso siso ḇefrur upacara fa sebaptis kapira sya (isoine kuker spek war na ḇaido srir war na ḇe kapira ani bukor ḇyedi) mura sbuk snonsnon baptis ḇe i. Imbape, baptisan Kristen ima faro snonggaku ḇefawi pyum ma ḇekyar faro ”ankinem ḇeḇye ro Ḇaḇesasoser Allah”. (Kisah 8:12) Ine kyurfasnai fandun fa snonggaku oso ryower pyum Manseren Allah Wos Ḇyena, imarisen faro na, ma imbror kwar ro sasar ḇyena. Kapira sima jadi fa sifrur roi nane ḇa.—Kisah 2:22, 38, 41.
Oso wer ido, sebaptis kapira nama namnis ḇa kuker rosai Refo ikofen ḇa na. Refo ikofenḇair romawa mgun bena sinan ḇeḇe Kristen sya, Allah myam sima sisren, kukro sinan sesya sisouser faro Allah. (1 Korintus 7:14) Sebaptis kapira ine imnis kuker roi Refo ikofen na ido, nari roma mgun sya na srir kakyar sena faro sinan sesya ḇa fa sna wis ḇepyum kuker Manseren I.b
Kakara ḇesasar ḇekur baptisan Kristen
Kakara ḇesasar: Sebaptis kuker spek ware ḇaido srir war na ḇe bukor monda ima imnis ra sebaptis kuker spanduk baken ḇesiper ḇe war yadori.
Roi ḇekaku: Baptisan ḇebor ḇefas ro Refo nama sebaptis kuker spanduk baken na ḇesiper ḇe war yadori. Imnis ra, fafisu Filipus imbe ḇyebaptis snon Etiopia oso, mura ”sudoḇe war ya”. Ramnai, ”susasyar bur war ya”.—Kisah 8:36-39.c
Kakara ḇesasar: Refo ya fyasnai romawa mgun sya kako fandun fa sebaptis fyor ḇero kina yadori sebaptis. Imnis ra, Refo fyawar ḇekur ḇemamwarek bui ro Filipi ma kina ḇyesikam sebaptis.—Kisah 16:31-34.
Roi ḇekaku: Ro fawar ḇekur ḇemamwarek bui ḇe snonggaku Kristen ani, snonggaku ḇebaptis ansya sifawi Yahwe wos Ḇyena kwar ma siryaḇ ma simarisen. (Kisah 16:32, 34) Inja, kopok kokofen romawa kasun ḇero ḇemawarek bui ani kina ḇyesikam sakḇebaptis ḇa, kukro sifawi mnis Yahwe wos Ḇyena ḇaime.
Kakara ḇesasar: Yesus byuk farkarkor ḇekur baptisan faro kapira sya, ikofen Karajan ro nanggi ima romawa kapira siso ḇena ya.—Matius 19:13-15; Markus 10:13-16.
Roi ḇekaku: Fafisu ikofen roi ani, Yesus isya dawos ḇekur baptis ḇa. Imbape, isya ikofenḇair snar snonggaku ḇemarisen ḇesun ḇe Karajan Allah iḇye kada simnis ra romawa mgun ḇefasnai sne ḇerun ma napyan fa sfarkor si.—Matius 18:4; Lukas 18:16, 17.
a Wos ”ḇaḇebaptis” ndramuma ro wos Yunani isoine ”spanduk”. Mam Theological Dictionary of the New Testament, Jilid I, ram 529.
b Imnis ḇekofen ro The International Standard Bible Encyclopedia, ”Ḇaḇeasas Babo dap ḇaḇeri ḇekur baptisan faro kapira sya”. Ensiklopedia ani kako ikofen roi sifrur ker ine ndramuma ro ”kakara ḇesasar ma mamam ḇesyadadi faro knam ro baptis ani ḇardi”, isoine sasar ro snonggaku oso nari neḇepyos fafisu ḇyebaptis.—Jilid 1, ram 416-417.
c Ro judul ”Baptisan (ro Refo)”, New Catholic Encyclopedia ikofenḇair, ”Nasnai kaku snar ḇaḇebaptis ro Gereja randak iwara sifrur na kuker spanduk baken snonggaku ani ḇe war yadori.”—Jilid 2, ram 59.