Kaku Yesus Iso Mesias Sikofen Ḇepon Ani Ke?

Kankarem ro Refo

Imbo. Yesus iso ”Mesias, Manfarkin ani”, iso nari ḇefaspar dunya ine. (Daniel 9:25; 1 Yohanes 4:14) Fafisu isya ryo supswan ine, ḇardadi ḇebor ḇekur Mesias i nejadi ro i. Fafisu ikḇok ro marmar ya kwar, ḇardadi ḇese naisya nejadi wer ro Yesus i.—Mazmur 110:1; Farfyar 2:34-36.

Rosai sor ker ḇe ”Mesias” ya?

Wos Ibrani Mashiach (Mesias) ma wos Yunani Khristos (Kristus) kyur faro ”Ḇesmai Ramrem”. Inja, ”Yesus Kristus” ido ”Yesus Ḇesmai Ramrem”, ḇaido ”Yesus iso Mesias” dirya.

Ro awar Israel naiwara, na srem snonggaku oso kuker srir mani ro bruri fa ḇyeḇair skinfir i kwar ma sbuk nasan ḇe i fa ḇyeparenta. (Imamat 8:12; 1 Samuel 16:13) Manseren Allah ryem Yesus i ḇe Mesias, ine iso kankain ḇepyum kaku. (Farfyar 2:36) Imboi, Yesus ima ismai ramrem kuker mani ḇa, Manseren Allah ryem i kuker rur ḇesren Ḇyeja.—Matius 3:16.

Ḇardadi ḇekur Mesias ine bisa nejadi ro snonggaku ḇese wer ke?

Oroḇa. Farkor pyum kaku ḇardadi ḇebor ḇejadi kwar na ido, nakam nkur faro Mesias oser monda. Inja, kokyar Mesias, ḇaido Kristus ima oser monda, iso monda na ḇardadi ro Refo ḇekur faro i ndarirya. Imboi, Refo byuk swarapepen ḇe ko bo doḇe ”Wairek-Wairek sararer ma nabi-nabi sararer nari sikḇawes ma nari sifrur aḇyair ḇeba syadi ma aḇyair kanandor, isof sfarkor ninyan snonkaku Allah kyinfir kwar sya kako”.—Matius 24:24.

Mesias ine nari ryama ro ras naiwama ke?

Oroḇa. Refo ya doḇe nari Mesias ryamaker syos ro Raja Daud ḇeraker sup Israel. (Mazmur 89:3, 4) Fama, fasfas ḇekur syos ro kawasa Yahudi ḇeraker Daud kina ḇyesi naisya ḇa kwar. Rya, fasfas ine ipromes kwar fafisu rak mamun ro sordade Romawi simkok sup Yerusalem ro taun 70 M anya.a Fafisu anya, snonggaku oso ḇaḇeri ḇeyoḇe ima ryamaker Raja Daud kina karyer ḇyesi. Imboi, fasfas ḇekur syos ro kpu up ani naisya kaker ro fafisu Yesus ikenem ya, ma snonggaku syakam, mbroḇ ḇyesya kako, sifawi ḇeri Yesus ima ryamaker Daud kina ḇyesi.—Matius 22:41-46.

Refo dapḇair ḇardadi ḇekur Mesias ine barbor ya ḇyefis?

Kofawi mnis ḇa ḇardadi ro Refo ḇekur Mesias ine ḇyefis. Roi oser ḇefnai ya iso, moḇ kokor ḇardadi ḇekur Mesias ine naḇesisye. Rupa ra, fasfas ro syap Yesaya 53:2-7 naser ḇardadi ḇeḇeso ḇekur ḇe Mesias i kako. Sia sisya skor ḇardadi anna kam ḇe ḇardadi oser monda, sia wer skor na ḇe ḇardadi ḇesisye.

Ḇardadi ḇeḇeso ḇekur Mesias ḇejadi ro Yesus i

Ḇardadi	Sfas na ro	Ryarirya
Syos ro Abraham	Kejadian 22:17, 18	Matius 1:1
Syos ro Ishak, Abraham roma ḇyedi	Kejadian 17:19	Matius 1:2
Ryamaker keret Yehuda ro Israel	Kejadian 49:10	Matius 1:1, 3
Syos ro Raja Daud	Yesaya 9:7	Matius 1:1
Binkbor iso nari ḇekapar i	Yesaya 7:14	Matius 1:18, 22, 23
Kaparpar ḇyeja ryo Betlehem	Mikha 5:2	Matius 2:1, 5, 6
Sor i ḇe Imanuelb	Yesaya 7:14	Matius 1:21-23
Randak ro kenem ḇesyadadi ḇa	Yesaya 53:2	Lukas 2:7
Smun kapira ḇesesya fafisu snari kyapar i	Yeremia 31:15	Matius 2:16-18
Sor i fa isasyar ro sup Masir	Hosea 11:1	Matius 2:13-15, 19, 20
Sor i ḇe snonggaku Nazaretc	Yesaya 11:1	Matius 2:23
Manwawan oso ipon i	Maleakhi 3:1	Matius 11:7-10
Ismai ramrem ḇe Mesias ro taun 29 Md	Daniel 9:25	Matius 3:13-17
Manseren Allah kyarem i ḇe roma Ḇyedi	Mazmur 2:7	Farfyar 13:33, 34
Iryaḇ faro Allah rum Ḇyeja	Mazmur 69:9	Yohanes 2:13-17
Ima manbaryas ḇepyum dirya	Yesaya 61:1	Lukas 4:16-21
Dun sananai faro kawasa Galilea sya	Yesaya 9:1, 2	Matius 4:13-16
Ifrur ker mujisat raris Moses i	Ulangan 18:15	Farfyar 2:22
Raris Moses i, dun angginem ro Manseren Allah	Ulangan 18:18, 19	Yohanes 12:49
Byuk pararei faro snonggaku ḇebor	Yesaya 53:4	Matius 8:16, 17
Syewar snonsnon ḇa	Yesaya 42:2	Matius 12:17, 19
Iswar snonggaku ḇekandera sya	Yesaya 42:3	Matius 12:9-20; Markus 6:34
Fyasnaiḇair Manseren Allah nanapes Ḇyena	Yesaya 42:1, 4	Matius 12:17-20
Manfarkor Ḇeba	Yesaya 9:6, 7	Yohanes 6:68
Ikofenḇair snonsnon Yahwe	Mazmur 22:22	Yohanes 17:6
Dap ker wos sarḇer	Mazmur 78:2	Matius 13:34, 35
Ḇye Manfarkin	Daniel 9:25	Matius 23:10
Snonggaku ḇekyar i ḇa sya sibore	Yesaya 53:1	Yohanes 12:37, 38
Ḇye karui karkar	Yesaya 8:14, 15	Matius 21:42-44
Kawasa sya spampum i	Mazmur 118:22, 23	Farfyar 4:10, 11
Sayin famfnom i	Mazmur 69:4	Yohanes 15:24, 25
Sisaser i fafisu dek keledai fa syun ḇe Yerusalem	Zakharia 9:9	Matius 21:4-9
Romawa sya sisandik i	Mazmur 8:2	Matius 21:15, 16
Ryamuma kuker snonsnon Yahwe	Mazmur 118:26	Yohanes 12:12, 13
Bati ḇyedi danggar i	Mazmur 41:9	Yohanes 13:18
Sanggar i kuker kumpan sarak 30e	Zakharia 11:12, 13	Matius 26:14-16; 27:3-10
Bati ḇyesi sifrar sibur i	Zakharia 13:7	Matius 26:31, 56
Saksi-saksi ḇekaku ḇa sya soḇe syasar	Mazmur 35:11	Matius 26:59-61
Soḇe syasar mboi dawos ḇa	Yesaya 53:7	Matius 27:12-14
Saninef i	Yesaya 50:6	Matius 26:67; 27:27, 30
Siprer i ro bruri	Mikha 5:1	Markus 15:19
Siprer i	Yesaya 50:6	Yohanes 19:1
Dakmunwarek snonggaku ḇewayam i sya ḇa	Yesaya 50:6	Yohanes 18:22, 23
Ḇebarara sya sun wos oser fa spampum i	Mazmur 2:2	Lukas 23:10-12
Spai bramin ma wemin ḇyeja ro adir	Mazmur 22:16	Matius 27:35; Yohanes 20:25
Sirwas sansun ḇyena fa sekinsor na	Mazmur 22:18	Yohanes 19:23, 24
Se i fa imnis kuker snonggaku ḇesasar sya	Yesaya 53:12	Matius 27:38
Simbrif i, skoryae i	Mazmur 22:7, 8	Matius 27:39-43
Ḇyekandera faro snonggaku ḇesasar	Yesaya 53:5, 6	1 Petrus 2:23-25
Rya Manseren Allah ibur i	Mazmur 22:1	Markus 15:34
Sbuk anggur siḇrayen kuker pus fa dinem	Mazmur 69:21	Matius 27:34
Imar ḇaim anya imbrow	Mazmur 22:15	Yohanes 19:28, 29
Byuk kenem ḇyeja faro Manseren Allah	Mazmur 31:5	Lukas 23:46
Byuk kenem ḇyeja	Yesaya 53:12	Markus 15:37
Fyasos ḇaḇyak faro payasyos sasar ya	Yesaya 53:12	Matius 20:28
Spanggar kor ḇyena ḇa	Mazmur 34:20	Yohanes 19:31-33, 36
Siwanggir i	Zakharia 12:10	Yohanes 19:33-35, 37
Sikram i warpu snonggaku ḇenana sya	Yesaya 53:9	Matius 27:57-60
Manseren Allah ḇyawes i ro marmar ya	Mazmur 16:10	Farfyar 2:29-31
Snon ḇeanggarkar ani nasan ḇyena sun i bur i	Mazmur 109:8	Farfyar 1:15-20
Kyain ro Allah bar raku Ḇyeja	Mazmur 110:1	Farfyar 2:34-36

a Syap Cyclopedia ḇeraker McClintock ma Strong doḇe: ”Sikyar kaku snar fasfas ḇekur syos ro keret ma kina Yahudi napromes ro ḇepon ya ḇa, mboi napromes fafisu simkokpres Yerusalem anya.”

b Snonsnon Ibrani Imanuel, iso ”Allah Ryous Ko”, nane nfasnai Yesus fararur ḇyena ḇe Mesias. Yesus rarama ḇyeja ro supswan ine fa ikenem ḇe snonggaku ma roi ifrur kwar fafisu ikenem ro supswan ine, nfasnai kaku Manseren Allah ryous snonggaku ḇesyom I sya.—Lukas 2:27-32; 7:12-16.

c Apap ”snonggaku Nazaret” ine rya sun na ro wos Ibrani netser ḇekur faro rokaker babo raris ”bur”.

d Imbe wafawi syadi sarisa ḇekur faro taun 29 M ḇe taun moḇ Mesias ryama ya, mam ”Nubuat Daniel tentang Kedatangan Mesias”.

e Sfas ḇardadi ine ro syap Zakharia, imboi Matius dap na ro syap ḇyeja bo doḇe inema ”nabi Yeremia wos ikofen” nairi. (Matius 27:9) Rya syap Yeremia ine srir na ḇe syap ḇepon kaku ro sasyos syap-syap sor ḇe ”syap nabi-nabi”. (Lukas 24:44) Ro dine, rya Matius dap ”Yeremia” i fa kyur faro raryur syap-syap anya, kukro syap-syap anya naser fasfas ro syap Zakharia kako.