Kafkofenḇadir ro Manbaryas Karajan
Ifawi Roi Imbe Syewar ro Kankenem Ine
YESUS ikofen ima myamḇir kaku domba-domba ḇyesi. (Yohanes 10:14) Snonggaku oso ifrurpyum ma iswar ḇaḇeaski ma nanapes ido, snonggaku ani nari sap i ḇe Yesus manfamyan ḇyedi. Snonggaku ḇemnis radirya nari ismai roi imbe syewar ro kankenem ḇyena, iso roi bin oso ḇeraker Belgia ismai na. Ine iso fawar ḇyeja:
”Fafisu yaḇoryae kaku ma yakara fa imbe yamun manggundaya, Saksi Yahwe sya sinuk kedwa yedi. Yamarisen faro rosai Saksi sya sikofen na ḇekur nyan ḇeyun ko fa kosaebur samswen ḇebor ro dunya ḇenapnap ine, imbape yamarisen ḇa fyor soḇe ima snar fafnoḇek ro Manseren I. Yaso ari ro gereja wer ḇa swaf taun ri war kwar, kukro yayin kaku anggarkar sfasnai ro diwa na. Imbape yamam ro Saksi-Saksi sya, yafawi ḇeri roi sikofen na kakaku nairi, ḇesyadi ya yafawi kaku na kosmai samswen fyor Manseren ifnoḇek kankenem koḇena ḇa.
”Ḇape faḇye kaku, kali riḇeso Saksi Yahwe sya srama smamfar aya mura nggosrow nggo wer ḇa. Yaḇoryae kaku. Ro ras oser yasyor tabaku bungkus ri suru ma yaḇepake narkoba na. Snar yamander fa yawos kuker apus yedi ḇeroe kwar anya, inja yaḇepake spritisme. Yamgak kaku fafisu yakain ro manggundaya ro roḇ na, kukro rur ḇeḇarḇor sya sikyaren ker aya! Ine rarirya ro paik ḇe paik. Fyor yemir ro roḇ na ido na yamgak kaku.
”Ras oso yambran ro nyan ras ḇepondi yambran ro na ḇaime, ma yamnai ro aidoram ḇeba kaku oso. Yakandor kaku kukro snonggaku sya sibor ro dia. Yambran fanam mura, yamam mboi sima Saksi Yahwe siri, sisya siḇawes Balai Kerajaan. Yaswarepen mura ḇe Saksi Yahwe ḇerama ḇemamfar aya ro rum yedi ansi, mura yakara nari ipyum kaku fafisu snonggaku ḇero supswan inekam sikenem imnis raris snonggaku ansine.
”Yemir yamarisen kaku insama Saksi Yahwe sya srama wer ḇe rum yedi, inja yakofen roi anna ḇe Saksi riḇeso ḇefararur ro balai anya. Yaḇenadi ḇe Manseren I, ramnai ras ri samfur mura, snon ḇesrow randak aya ani isya dores ro kedwa ya barpondi. Danun ḇe aya insama nufarkor Refo ya wer, ma yamarisen kaku fa yafarkor wer. Yamam ḇaim roi ḇeradine ro fafisu oso ḇaḇeri! Fyoro kwar yasewar snonggaku ḇesawaryae si ma ḇena aski ḇekaku ya. Ma sisya kaku rodine.
”Ras anya ḇe bo, yaso fananjur ya kame. Minggu ri kyor raposa, yamnai yakun tabaku. Yasawen syap astrologi ma rekaman musik ḇena fasfes kuker rur ḇeḇarḇor sya, ma yaḇaḇir sikyaren aya wer ḇa. Yafadwer kenem yena imnis kuker Manseren Yahwe farkankin Ḇyena ro Refo ya, ma paik ri kyor mura yaso ro fararur ḇaḇebaryas. Paik ri wonem nenande mura, yakḇebaptis ḇe Saksi Yahwe oso. Ras ri suru fafisu yaḇebaptis kwar, yasun ro fararur perintis ekstra.
”Yakofen kasumasa kaku faro Yahwe I snar roi ḇepyum ifrur kwar ḇe aya nya. Kirine yafawi rosai imbe yasewar ro kankenem ine. Kakuḇae, Yahwe snonsnon Ḇyedi ima ayar ḇesambraḇ kaku, rodiwa yasmai moḇ fadadiren ma fasaspar. (Amsal 18:10) Yaḇaḇir kaku raris ḇefas Mazmur roi ḇyaḇir na fafisu fyas Mazmur 84:10 ḇekofen, ”Ras oser ro buḇes rum Bedi ipyum syadi ro ras ri syaran oser ro moḇ ḇesenakam; yamarisen syadi yores ro kedwa ro rum Allah yedi ḇardibur yaḇarek ro rum kruben snonggaku ḇeḇarḇor sya.’”
Bin ḇefrurpyum ine ismai kaku roi syewar ro kenem ḇyena. Mansei monda ḇesewar Manseren Yahwe I kuker sne ḇesiper nari saksmai kako roi sisewar ro kankenem sena.