Rosai Refo Ikofen ḇekur Kobuk ḇe Snonggaku Ḇesesya?

Kankarem ro Refo

Refo ya danun ḇe ko fa kobuk ḇe snonggaku ḇesesya kuker sne ḇesiper ma sne ḇenapes. Refo ya doḇe, rofyor kobuk ido, fainda ḇyena faro ḇesmai ya monda ḇa, imboi ḇebuk ya kako. (Amsal 11:25; Lukas 6:38) Yesus ikofen, ”Ipyum syadi ro koḇuk ya ro kosma ya.”—Farfyar ro Manwawansya [Kisah] 20:35.

Rosai na kobuk bo ḇefrur Manseren Allah imarisen?

Manseren Allah imarisen fyor kobuk kuker sne besiper. Refo ya ikofen, ”Snonkaku oser-oser ḇyuk imnis marisen ḇyedi. Ḇyuk kuker fafardun awer roba snar ḇaḇedafdifer, snar Allah iswar snonkaku ḇeḇuk kuker marisensya.”—2 Korintus 9:7.

Kobuk kuker sne ḇesiper ine kako ḇaḇeari koḇena ḇefrur Allah imarisen. (Yakobus 1:27) Imarisen faro snonggaku ḇemarisen ḇefnoḇek ḇesesya. Manseren Allah myam snonggaku ḇefasnai snemura ine imnis ra ḇyuk nyaki faro I. (Amsal 19:17) Refo ya ikofenḇadir snar Manseren Allah manggundi na ḇebak kaḇer frur pyum ro snonggaku ani.—Lukas 14:12-14.

Rosai na kobuk bo ḇefrur Manseren Allah imarisen ḇa?

Rofyor kobuk kuker sne ḇeḇye ḇa. Imnis raris:

Insa nafrur fa ḇesesya smanen ko.—Matius 6:2.
Insa kosmai roi oso ro ḇesesya.—Lukas 14:12-14.
Insa rya kokoḇes fasaspar ya.—Mazmur 49:6, 7.

Kosaramper fararur oso ḇaido roi Allah imarisen ba na. Imnis raris, na kobuk pipi faro snonggaku ḇebuk pipi ansi fa sikfnak judi sya ḇa, ḇeyan narkoba, ḇaido ḇemarsarser sya ḇa. (1 Korintus 6:9, 10; 2 Korintus 7:1) Oso wer ido, na kopok kobuk awer ḇe snonggaku ḇesambraḇ fa ḇefararur kaker fa fyan kina ḇyansi boi imewer.—2 Tesalonika 3:10.

Komam pyum fandun ro kina kobansi ḇa. Refo fyarkor ḇe ko snar ḇebukor ro kina fandun fa myam fandun ro kina ḇyesi. (1 Timotius 5:8) Ine ipyum ḇa fyor ḇebukor ro kina byuk nabor manggenem ḇe ḇesesya mboi myam pyum fandun ro kina ḇyesi ḇa. Ro Yesus fafisu ḇyedi, snonggaku ono smam sfaduru mnis sinan sesi ḇa, sesanowarek si bo soḇe roi snanakam sbuk na ḇe farsarser ”isoine samsom faro Allah”. Imbape, Yesus isonek si.—Markus 7:9-13.

Mnuk ro Refo ḇekur kobuk ḇe ḇesesya

Amsal 11:25: ”Snonggaku ḇefasnai snemura nari ismai roi ḇepyum nabore, ma mansei ḇebuk sneprei faro ḇesesya na ismai sneprei.”

Farkarkor ya: Kobuk ḇe ḇesesya ido, nun fainda faro ḇesmai ya monda ḇa imboi ḇebuk ya kako.

Amsal 19:17: ”Mansei ḇefrur roi ḇepyum faro snonggaku ḇesabarar byuk nyaki faro Yahwe I, ma nari Ḇyak kaḇer frur pyum ro snonggaku ani.”

Farkarkor ya: Kofnoḇek snonggaku ḇese ido, ine imnis ra Allah myam ḇyenyaki faro ko, ma Ḇyeasas fa ḇyak kaḇer sne mura koḇena.

Matius 6:2: ”Inja rofyor buk farsarser, mkonuk maon ḇeḇaryas awer na, raris kawasa ḇeḇarḇor sya . . . insa sisma sanandik ro snonkaku.”

Farkarkor ya: Kobuk monda awer snar komarisen smanen ko.

Farfyar 20:35: ”Ipyum syadi ro koḇuk ya ro kosma ya.”

Farkarkor ya: Kobuk kuker sne ḇesiper ido na kosmai marisen ya.

2 Korintus 9:7: ”Snonkaku oser-oser ḇyuk imnis marisen ḇyedi. Ḇyuk kuker fafardun awer roba snar ḇaḇedafdifer, snar Allah iswar snonkaku ḇeḇuk kuker marisensya.”

Farkarkor ya: Manseren Allah imarisen fyor kobuk kuker sne ḇemarisen.