Yakara Iḇye Yamar Mura—Wos Refo Bisa Nafnoḇek Aya Ke?

Kankarem ro Refo

Imbo! Refo ya ryama ro ”Allah, bebuk sneprei faro snonggaku ḇeḇeḇirḇarsya”. (2 Korintus 7:6) Kakubae, Refo ima syap ḇefasbair kuker pararei ro swaruser isya ḇa. Imboi, Refo ya ifnoḇek snonggaku ḇebor kwar insa skara fa smun manggunsi ḇa. Refo ya na ifnoḇek Au kako.

• Rosai anun ḇepyum ro Refo ya?

• Refo sfas fawar ro snonggaku ḇekara fa simar mura ke?

• Mnuk risai ro Refo na ḇefnoḇek Au insa kwara awer fa mun manggundaw?

• Rosai wafrur ya rofyor bati ḇedi ikofen ”Iḇye yamar mura”?

• Fyor iwara yakfrur roi ono fa yamun manggundaya ido rarso?

Rosai anun ḇepyum ro Refo ya?

• ● Wakofenḇair sneḇaḇir Bena

  Wos farkin ro Refo: ”Bati ḇekaku isawarwar ro fafisu nakam, ma ḇye naek rofyor samswen isya.”​—Amsal 17:17.

  Farkarkor ya: Kokame kofandun snonggaku ḇesesya fa sifnoḇek ko rofyor koḇeḇirḇar.

  Wawos ḇe ḇesesya ḇa ido, nari kwara samswen kaku ma nari waḇoryae. Mboi fawar ḇe ḇesesya ido, samswen wasmai na, rya nmarbak manggenem ḇa. Ma ḇepyum syadi ya nari nwa swaruser ḇepyum.

  

  Wafrur roi ine pan: Ras ine, fawar rosai ḇaḇir nakam ḇe snonggaku oso, fawar na ḇe kina bansi ke ḇaido bati wakyar ya.a Bisa fasepen kako rosai ḇaḇir na.

• ● Wor fafnoḇek ro dokter sya.

  Wos farkin ro Refo: ”Snonkaku ḇeprei sefandun [dokter] sya ḇa, ḇoi snonkaku ḇeduf sya siso ḇeḇefandun [dokter].”​—Matius 9:12,

  Farkarkor ya: Rofyor koduf ido kofandun fafnoḇek ro dokter sya.

  Rofyor kokara kaku fa imbe komun manggunko ido, ine nfasnaḇair swaruser koḇena namnis ḇa kwar. Imnis ra na komai ḇa rofyor koisya kodufe, rarirya kako kopok komai awer rofyor kofawi rya swaruser ma kakara koḇena namis ḇa kwar. Dokter sya na sifnoḇek ko.

  Wafrur roi ine pan: Wor farfnoḇek ḇeri ro dokter sya.

• ● Waswarepen Allah ima iswar Au.

  Wos farkin ro Refo: ”Manesu ririm seḇeḇoḇ kuker maeja pipi risuru. Rariryano Allah ḇyefanander osero ḇaḇeri. . . . Mkomkak awer, snar mkoḇe maeja syadi ro manesusya.”​—Lukas 12:6, 7.

  Farkarkor ya: Auma ḇemaeja ro Allah ḇarpon Ḇyedi.

  Imbude kwara siya siswar Au ḇa. Mboi kakuya, Allah myam kandera Bena. Iswar kaku Au, ḇesyadi rofyor ḇaḇir rya wamewer wakenem wer di. Mazmur 51:17 doḇe, ”Sne ḇefafardun ma ḇesanekar, sye Allah, nari pampum na ḇa.” Allah imarisen fa wakenem pdef, kukro iswar Au.

  Wafrur roi ine pan: Wawasya roi ḇefasnabair kaku Allah ima iswar Au. Imnis ra, mam ro fasal 24 syap Mendekatlah kepada Yehuwa (syap fa kobuki farkor Refoya).

• ● Ḇenadi ḇe Manseren Allah I.

  Wos farkin ro Refo: ”Mkoḇuk makakwarek mkoḇena kam faro Allah, snar i ḇefaduru mko.”​—1 Petrus 5:7.

  Farkarkor ya: Manseren Allah imarisen insama fawar ḇe I roi nakam ḇero snembri.

  Allah na ifrur Au fa waknon ma syambraḇser Au kako insama wamgakwarek awer. (Filipi 4:6, 7, 13) Mansei monda ḇenadi fa ḇeyor Allah fafnoḇek Ḇyena ido, nari isaramper si ma ifnoḇek si.​—Mazmur 55:22.

  

  Wafrur roi ine pan: Ḇenadi ḇe Allah ro ras ine. Wap snonsnon Ḇyedi, Yahwe, ma wakofenḇair roi ḇaḇir na. (Mazmur 83:18) Wor insama Yahwe ifnoḇek Au fa wasusu ḇa.

• ● Kwara mura ḇe saneraro ro ras ḇarpon iyama Refo ḇyeasas kwar na.

  Wos farkin ro Refo: ”Kakyar ani kada yor ḇesambraḇ moḇ kufepen ko ma kankenem koḇena naknon.”​—Ibrani 6:19.

  Farkarkor ya: Roi ḇekur Au na fyorno ido namnis ra wai ḇero soren rofyor wam doḇer myun. Mboi, saneraro wasmai ro Refo ya na nafrur fa waknon.

  Saneraro wasmai ine isya kaku, snaro Manseren ḇyeasas kwar fa nari ipyos roi nakam ḇefrur fa koḇekandera na.​—Fasasna Faro Yohanes [Wahyu] 21:4.

  Wafrur roi ine pan: Swewar nabor wer saneraro Refo byuk na kuker wawasya farkarkor ḇe rim ro brosur Ankankinem Ḇeḇye Ḇerama ro Allah!

• ● Wafrur roi wamarisen na.

  Wos farkin ro Refo: ”Sne ḇemarisen ima obat ḇepyum.”​—Amsal 17:22.

  Farkarkor ya: Rofyor kofrur rosai monda ḇefrur fa komarisen ido, nari swaruser ma kakara koḇena napyum syadi wer.

  

  Wafrur roi ine pan: Wafrur roi wamarisen na, imnis ra rwower musik ḇefrur fa waryaḇ wer, wawasya syap oso ḇeyun sneprei ḇaido wafrur fararur wamarisen kaku na. Au kako nari wasmai sneprei kaku rofyor wafrur roi ḇekasun monda fa bukifnoḇek ḇesesya.​—Farfyar Ro Manwawansya [Kisah] 20:35.

• ● Faduru pyum baken bedi insama waduf ḇa.

  Wos farkin ro Refo: ”Fari faro ḇaken ḇyefandun [kako].”​—1 Timotius 4:8.

  Farkarkor ya: Rofyor koḇeolahraga, kenef pyum, ma kan roḇean ḇepyum na ido, nari kodafduf ḇa.

  Wafrur roi ine pan: Ḇeolahraga kuker wambran fasawsaw menit ri 15 monda.

• ● Waswarepen roi kobabir ma kenem koḇena na nefararwei ker.

  Wos farkin ro Refo: ”Nari mkofawi roi ḇekur mko ro meserdiya ḇa.”​—Yakobus 4:14.

  Farkarkor ya: Samswen ḇemarbak kaku, rya kokara nari kopok kokandenḇur na ḇa kako, imbude nari nkur ko kawan ḇa.

  Roi ḇekur ko na samswen kaku raryano, nari ḇarpur mura nenande. Inja swewar nyan fa wakamar samswen anna. (2 Korintus 4:8) Fawawas mura, nari roi nakam napyum syadi wer. Mboi mun manggundaw fa wamar ido, na nadawer monda.

  Wafrur roi ine pan: Wawasya farfyar ḇero Refo ḇekur snonggaku ḇeboryae kwar rawo skara fa simar mura, ma mampan rariso kenem sena nefadwer fa napyum syadi wer, ḇesyadi ro roi skara na. Mampan fawar sena ḇeuser nane.

Refo sfas fawar ro snonggaku ḇekara fa simar mura ke?

Imbo. Refo ya fyawarḇair kwar snonggaku ri ḇeso ḇekara ḇo ḇeyoḇo, ”Iḇye yamar mura.” Ḇape Yahwe imsor si ḇa mboi imarisen ifnoḇek si. Rarirya kako, Yahwe nari ifnoḇek Au.

Elia

• ● Mansei dirya? Elia ima nabi ḇemakakak ḇa dirya. Mboi dakḇebirbar kako. Syap Yakobus 5:17 ikofen, ”Elia snonkaku monda ḇemnis kuker ko.”

• ● Rosai ḇefnai fa kyara imbe imar mura? Fafisu ya Elia ḇyabir ono sefandun i ḇa, imgake, ma kyara ifrur roiyoḇa kwar. Inja ḇyenadi, ”Sye Yahwe, wun nyawa yedi mura.”​—1 Raja 19:4.

• ● Rosai ḇefnoḇek i fa syambraḇ ya? Elia ikofenḇair roi byabir nakam ḇe Allah I. Moḇsa Allah syambraḇser i rai? Allah fyasnai ḇe Elia i snar fyandun i ma fyasnai snar papoik Ḇyena naba kaku. Allah byuk kakyar ḇe i snar sfandun kaker i. Oso wer ido, Allah byuk snonggaku ḇeswar i ma ḇekir oso fa ifnoḇek i.

• ▸ Wawasya ḇekur Elia i ro: 1 Raja 19:2-18.

Ayub

• ● Mansei dirya? Ayub ima snon ḇeḇebru ro kina oso ḇena arasai nabor kaku ma snon ḇena kakyar dirya. Ima isyom ḇe Allah ḇekaku ya.

• ● Rosai ḇefnai fa kyara imbe imar mura? Fasaw monda bo, kankenem ḇyena nefarwe kaku. Roi ismai nakam napromes. Roma inai ḇyesi simar kame. Ismai dafduf ḇefrur makakak kaku. Ramnai wer ido, skursof i bo sobe roi ismai nanekam snar sasar ḇyenari. Inja Ayub doḇe: ”Yayin kaku kenem yedine. Yamewer yakenem wer di.”​—Ayub 7:16.

• ● Rosai ḇefnoḇek i fa syambraḇ ya? Ayub inadi ḇe Allah ma ikofenḇair roi ḇyabir na ḇe snonggaku ḇesesya. (Ayub 10:1-3) Bati ḇyedi ḇefawi kaku roi ḇyabir na isoine Elihu i, byuk wos samarawraw ḇe i. Snar farfnoḇek ro Elihu i barpur mura Ayub nya kakara ḇesasar wer ḇa. Ma ḇefandun syadi ya iso Ayub imarisen ismai anun ma farfnoḇek ro Allah.

• ▸ Wawasya ḇekur Ayub i ro: Ayub 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moses

• ● Mansei dirya? Moses ima manfarkin faro er Israel ro fafisu iwara ma ima nabi ḇesouser diri.

• ● Rosai ḇefnai fa kyara imbe imar mura? Moses nya fakamaman ḇemarbak kaku, sisurem ker i, ma ḇyaḇir ipok ḇa kwar. Inja dawos ḇe Allah i, ”Mun aya fa yamar mura.”​—Bilangan 11:11, 15.

• ● Rosai ḇefnoḇek i fa syambraḇ ya? Moses ikofenḇair roi ḇyaḇir nakam ḇe Allah I. Mura Allah ifnoḇek i fa duf fararur nabor ḇa insama kyara samswen wer ḇa.

• ▸ Wawasya ḇekur Moses i ro: Bilangan 11:4-6, 10-17.