Bati Ḇekaku Ḇa

Nwa “bati” mambir kwar fyor wababo kaker. Ifur fa kwara ḇe snonggaku ḇeba kwar ma rya ifnoḇek Au fa bati ḇesesya simarisen faro Au. Fyor ḇesanekar, rwa ḇe i fa wasmai ”sneprei”. Wakyar kaku iso na ḇefnoḇek Au ro fafisu nakam.

Ḇape ḇarpur ya, wafawi roi ḇeḇye ḇa ro i. Imarisen insama muḇe kayam ḇesya kwar, ma nafnai fa jadi fa swun ḇe moḇ ono ḇa. Inja ifur fa kwara ḇe snonggaku ḇeba kwar rariryano, roi ifur nane nafrur fa wadufe. Ḇeḇye ḇa syadi wer yaiso dun pipi Bena nono.

Swaf ḇeḇeso ro ḇarpur ine, ḇensewar fa wafrur muk ḇaḇebati Bedi kuker i, ḇape imewerdi. Inja rupa ra isya ḇye tuan faro Au. Wafafko snar mambir i kwar.

IMNIS radirya kako ḇaḇebati ro snonggaku ḇesyor tabaku kuker tabaku. Bin oso ḇenir Earline, isyor tabaku swaf taun ri 50, iwasen kaḇer bo doḇe, ”Yamarisen syadi yaḇekayam us tabaku ḇardibur snonggaku. Tabaku imnis ra bati ro fafisu iwara monda ḇa mboi ḇesyadi ya tabaku iso bati oser monda yana i.” Ḇape ḇarpur ya insape Earline ifawi snar tabaku yama bati ḇekaku risya ḇa ma ḇefafrowes monda. Wos ḇerandak ḇeroyasne kaku beri nejadi faro i, ḇape oser monda ḇeḇese ya. Fyor ifawi snar tabaku ima roi ḇeḇye ḇa ro mamam Allah snar nafrur mamas ḇaken Allah byuk ḇe i, imnai fa isyor tabaku.​—2 Korintus 7:1.

Snon oso ḇenir ḇe Frank dakun wos ḇemuk fa imnai isyor tabaku fa ifur Allah imarisen. Ḇape, ras oser fyor isyor tabaku ḇepupes ya kwar, kyankunem ro rum ya baḇdi fa syewar tabaku pis-pis ḇesapi murbaḇ ro rum ya baḇdi. Frank ikofen, ”Iso swaf fa yun wos snemuk kaku. Fyor yafawi yakankunem murbaḇ fa yasewar tabaku pis-pis ro saprop ya bori, yaḇaḇir yafrur yayin kaku. Inja yasyor tabaku wer ḇa.”

Sai ḇeḇewar fa awyaye ro tabaku syambraḇ kaku? Peneliti sya smam sano ḇeḇeso: (1)Tabaku ine imnis ra narkoba bisa ifur fa snonggaku sya siwarai bo imbe sisyor ker. (2) Nikotin ḇesun mundum ro snonipo sena nari nek raryas ker auk ro swaf detik di fik monda. (3) Snonggaku ḇesyor tabaku skara na ḇe roi ḇefandun kaku ro kenem sena, snar fyorno ido sisyor tabaku fafisu sisya sinan, sinem ma sfarfyare, ma ro swaf ḇesena kako.

Rariryano, raris Earline ma Frank sufasnai na, kaku ya bisa wamnai ro roi ḇeḇye ḇa ine. Aḇe wamnai fa wasyor tabaku ido, wawasya fasfas ḇeuser nane nari neḇe randak ro kenem ḇebabo Bena.

Nwa Marisen Ḇesambraḇ ro Sne Bedi

”Roi oso ḇefandun kaku ro snonggaku ḇemnai kwar ro anan tabaku iso sna marisen ḇesambraḇ fa simnai sisyor tabaku.”​—”Stop Smoking Now!”

KAKU YA, fyor aḇe wamnai wasyor tabaku, fandun fa nwa marisen ḇesambraḇ ro sne Bedi fa wafrur na. Rariso nwa marisen ḇesambraḇ ine rai? Nyan oser ya, kwara na kenem Bedi ipyum syadi fyor wamnai wasyor tabaku.

Na wasasyar pipi ḇebor wer ḇa. Wasyor tabaku bungkus oser ro ras oser ido, na ro swaf taun oser Ausya buk pipi ri yuta kwar faro anan tabaku ine. ”Yakara ḇaberi snar pipi yabukikowes tabaku nabor kaku.”​—Gyanu, Nepal.

Na wakenem pyum syadi wer. ”Insape yasmai aski ma raryaḇ ro kenem yedi fyor yamnai ro anan tabaku, ma kenem yedi napyum syadi wer.” (Regina, Afrika Selatan) Fyor snonggaku oso imnai isyor tabaku, roi byukiḇaḇir ma byukinyas napyum syadi wer, ma ono wer ido syambraḇ syadi ma baken ḇyedi insape isnai pyum.

Na waprei syadi. ”Simnai ro anan tabaku ine nari nun bon ḇepyum faro pararei sena ma snon ma bin ḇena umur ḇesisye na sḇaḇir beri na.”​—Pusat Pengendalian ma Pencegahan Penyakit AS.

Na wakyar syadi manggundaw. ”Yamnai yasyor tabaku snar yamewer tabaku ḇye tuan ḇe aya. Yamarisen insama yaḇe tuan faro manggun daya.”​—Henning, Denmark.

Kina ma bati bansya na sismai kako bon ya. ”Anan tabaku . . . nafur rusak pararei ro snonggaku ḇeḇarekus ko. . . . Penelitian ḇeḇeso sifasnaḇair ro taun oser monda snonggaku bemar sya se syaran, ine snar dafduf raris kanker paru-paru, ma dafduf jantung kukro sinas pau tabaku ro snonggaku ḇese.”​​—Lembaga Kanker Amerika.

Na wafur Manḇedaw bedi imarisen. ”Naek srar yaswar kaku, iḇye kada kofasren manggun ko ro roi ḇebor kam befur mamas baken.” (2 Korintus 7:1) ”Mgobuk manggun mgo ḇe farsarser ḇesren, ḇefur sneprei Allah kada.”​—Roma 12:​1.

”Rofyor yafawi Allah dayin kaku faro roi ḇefur mamas baken na, yun wos snemuk fa yamnai yasyor tabaku.”​—Sylvia, Spanyol.

Ḇape, fyorno ido kona marisen ḇesambraḇ ro sne monda imnis ḇaim. Ko kako kofandun fafnoḇek ro snonggaku ḇese, ine kako ro kina ma bati koḇesya. Rosai na bisa sifrur ya?

Swewar Farfnoḇek ro Snonggaku Ḇese

”Snonggaku ḇeyemir na napyan fa smun i, fama snongaku risuru susambraḇ fa susampum mbroḇ sya.”​—Pengkhotbah 4:12.

ROFYOR kosmai farfnoḇek ro snonggaku ḇesesya ido, na kona swaf ḇebor fa kopampum mansei ḇaido roi risai monda ḇe mbroḇ koḇesya. Inja wamarisen insama wasambraḇ fa wapampum marasrisen faro tabaku ya ido, ipyum ya wor farfnoḇek ro kina ḇaido bati bansi ḇaido mansei monda na ḇefnoḇek Au kuker sne ḇesiper ma kababab.

Kwara fa swewar farfnoḇek ro snonggaku ḇemnai kwar ro anan tabaku ya, snar sima nari sifawi Au monda ḇa ḇape na sḇensewar fa sifnoḇek Au. Mambesrar oso ro Denmark ḇenir Torben ikofen, ”Farfnoḇek ro snonggaku ḇesesya yafandun kaku na.” Abraham ḇeḇarek ro India fyas, ”Saswar ḇesiper ro kina ma naek srar Kristen nafnoḇek aya fa yamnai ro anan tabaku.” Ḇape ono ido, farfnoḇek ro kina ma bati sbuk na namnis kuf ḇaim.

Snon oso ḇenir ḇe Bhagwandas ikofen, ”Yasyor tabaku swaf taun ri 27, ḇape snar yafarkor rosai Refo ikofen kuker roi ḇemnis ḇa, yun wos snemuk fa yamnai yasyor tabaku. Yasewar fa yamnai fawawas. Yaḇebati wer ḇa kuker bati ḇero fyor iwara sya. Ma yaso farkankin ro dokter sya. Ḇape nane kam nun bon noḇa. Ḇarpur ya, insape yakofen nakam ḇe Yahwe I roro nadi ma yor kaku ḇe Yahwe fa ifnoḇek aya insama yamnai yasyor tabaku. Ma yasmai bon!”

Roi oso fandun fa wafrur ya iso wafasos Au faro samswen nari wasmai na. Samswen risai monda? Fasfas ḇeuser ine nari kyarem na.

[Kotak ro ram 5]

IPYUM FA WINEM OBAT NA KE?

Sifrur obat fa sbukifnoḇek snonggaku sya fa simnai sisyor tabaku, imnis ra sbuk koyok nikotin, nane nafur perusahaan ḇeba kaku sismai pipi dolar milyar ḇe milyar. Ipyum ya fyor ḇepake obat-obat nane ḇaim, kwara kaku fakfuken-fakfuken nane resari:

Rosai fainda ya? Kaku ya, nyan pararei ḇebor na nafnoḇek kaku fa simnai sisyor tabaku kuker sifrur fa marisen sena faro tabaku ya naḇa manggenem ḇa. Ḇape, sawawos kaker rosai fainda ḇyena faro swaf ḇekwan syadi.

Rosai awyae byena? Obat nono nawyae ḇeyinem sya, imnis ra rya aḇe sbayorem, bukor sena naduf, ma nadif si fa aḇe smun manggun si. Waswarepen kako snar terapi ḇefadwer nikotin inema nyan ḇese fa sismai nikotin ya wer, ḇeyun ḇe roi ḇeḇeso ḇekyaren pararei sena. Snar roi ine, snonggaku ḇesyor tabaku sya siwarai kaker.

Nyan ḇese naisya ke? Ro survei oso, smam mboi persen ri 88 snonggaku ḇemnai kwar ro anan tabaku sya soḇe san obat ḇayo bisa simnai beri ro anan tabaku ya.

Fasos Au Ḇepon faro Roi Na Ḇedwarek Au

”Yun snemuk fa yamnai yasyor tabaku kukro yamarisen insama kapira nubedi iduf awer. Inja ro rum yedi yapom fasfas ’Wasyor Tabaku Awer!’ Mura swaf oras oser monda, manander faro nikotin ine syambraḇ kaku, ryama ḇe aya raris tsunami, ma yakun tabaku oser.”​—Yoshimitsu, Jepang.

RARIS Yoshimitsu fawar ḇyena, snonggaku oso syewar imbe imnai isyor tabaku ido nari ismai roi ḇedwarek ḇebor. Smam mboi fanam persen ri 90 snonggaku ḇekaḇer fa ḇesyor tabaku, mura ido sifrur kaku na. Inja, auisya swewar kaker fa wamnai ido, bisa wafrur na ḇae rofyor wafasos Au ḇepon faro roi na ḇedwarek Au ya. Rosai monda roi ḇedwarek snonggaku ḇebor sismai na?

Manander ḇesambraḇ kaku faro nikotin: Ḇaḇaḇir ḇeradine naba syadi ro ras ḇekyor fyor wasyor tabaku ḇepupes ya ma swaf minggu risuru mura nari namnai. Ro fafisu ani, oso ḇemnai kwar ro anan tabaku ikofen, ”Manander na ndrama imnis ra risen ḇerama ker ḇa.” Imbape, taun nande mura manander ḇesambraḇ fa wakun tabaku bisa ndrama kanandor Au kako. Rarirya ido, wasusu fasaw awer. Wawaf isof ro menit ri rim ke, ma nari marisen anna napromes.

Roi ḇese ḇaḇir na fyor waḇe wamnai wakun tabaku: Randak ya, na samswen ḇe si fa sfaduru kakara sena ndro ro moḇ oser ma ḇaken sena nado fasaw. Sisyure, smakmaker, sidomes, ma sises, mura sḇaḇir siknon ḇa, sikḇaḇ ḇa, simsor fasawsaw, ḇaido siḇoryae. Ḇape nono ido nane napromes ro ro swaf minggu ri fyak ḇaido wonem.

Ro fafisu ḇesamswen ine, roi ḇepyan ḇeḇeso nane bisa wafrur na fa ḇefnoḇek Au. Imnis raris:

● Wenef kawan syadi.

● Winem war ḇepyoper ḇaido dur sifrur ro ai bon na. Wan roḇean ḇepyum na.

● Ḇeolahraga.

● Syor ḇedo kaku, ma wawasenpan wam ḇesren syun ḇe paru-paru Bedi.

Roi ḇedif Au: Ine iso fararur ḇaido ḇaḇaḇir ḇedif Au fa wasyor tabaku wer. Imnis raris, imbude na wamarisen wasyor tabaku fafisu auisya winem swan ke. Inja, swewar fa wamnai wasyor tabaku ido, buk swaf kawan awer fafisu winemri. Fawas mura, insape nari bisa winem ro swaf kawan syadi.

Soḇe, wasyor tabaku wer ḇa ro swaf kawan kwar mboi swaruser Bedi bisa nawayan ker ḇe nikotin. Torben ḇeyap ro randak ani doḇe, ”Yamnai yakun tabaku taun samfur seser ri siw kwar, mboi roi ḇefrur fa imbe yasyor tabaku wer iso fafisu yamnaisu bo yinem kopi.” Ḇape kaku ya, fararur ono ḇedif Au fa waḇe wasyor tabaku wer, fawawas awyae ḇyena nari nsambraḇ ḇa ma napromes.

Ḇape ine iḇese fafisu winem swan ya. Imbe wamnai wasyor tabaku ido, rya ipyum winem wer swan ya awer ma rwa ḇe moḇ sbaboḇ aninem ḇeradine awer. Kukro rya sia nari napyan syadi skaḇer fa sisyor tabaku wer fafisu sfarandinem. Rosai ḇefnai ya?

● Sinem nabor ḇa no, swan sinem ya nafrur fa nikotin na nun marisen syadi.

● Fafisu sekayamyam, na sfarandinem bo sisyor tabaku.

● Aninem swan ya nafrur kakara sena naḇye ḇa ma jadi fa sfarmku manggunsi ḇa. Refo ya dap mnis kaku, ’Anggur ipyos kakara ḇepyum ya.’​—Hosea 4:​11.

Ḇaḇebati: Kwinfir pyum bati ḇesya. Imnis ra, binggwanbur ḇaḇebati kuker snonggaku ḇekun tabaku sya ḇaido ḇedif ker Au fa wasyor tabaku. Oso wer binggwanbur snonggaku na ḇefrur fa wasusu, isoine ḇekoryae Au snar waḇe wamnai wasyor tabaku.

Masasor: Penelitian oso fyasnaiḇair suru ro snonggaku ri kyor sukaḇer fa susyor tabaku wer, snar ḇepon ya suisya suboryae ḇaido sumsore. Roi ono ḇaḇir na nadif Au fa wasyor tabaku wer ido, swewar fa wafrur roi ḇese imnis ra winem war, wan gua-gula gam, ḇaido wambrane. Swewar fa waser kakara Bena kuker roi ḇepyum na, isoine ḇenadi wor fafnoḇek ro Manseren Allah ḇaido wawasya wos mnuk ḇeḇeso ro Refo ya.​—Mazmur 19:14.

Nyan Kakara Fandun fa Pampum na

● Yasyor kali oser ine wer monda.

Kakaku ya: Wasyor tabaku kali oser monda mboi wafrur marisen roi ḇero auk Bedi ḇemarisen faro nikotin persen ri 50 ro swaf oras ri kyor. Efrur fa na kwaḇer ḇeri fa wasyor tabaku wer.

● Fyor yaḇoryae yasyor tabaku mande na yaknon.

Kakaku ya: Sifawi kwar mboi nikotin nafrur fa stres neke. Kananon sḇaḇir nane, rya sismai na snar siduf manggun ḇa fafisu simnai koper ro sasyor tabaku anya.

● Yawarai kwar inja na jadi fa yamnai ḇa.

Kakaku ya: Kakara ḇeradirya nafnai fa waḇe wasusu monda. Refo doḇe, ”Ausya ḇesanekar ro ras samswen ya ke, nari samambraḇ bedi nabro fawase.” (Amsal 24:10) Inja pampum nyan kakara ḇeradirya. Mansei ḇekara kaku fa imnai ro anan tabaku ma isouser farkankin ḇepyum ḇeyap ro fasfas nane ido, na bisa simnai ro anan tabaku ḇae.

● Yapok ḇa fa yakamar dafduf snar yaḇe yamnai yasyor tabaku.

Kakaku ya: Fafisu wamnai wasyor tabaku nari rya waḇe wadufe, mboi nari namnai ro swaf minggu riḇeḇeso monda. Inja wasusu awer! Paik ḇaido taun nawas mura marisen fa wasyor tabaku ndrama kaḇer ido, nane kako nari namnai ro swaf menit riḇeḇeso monda. Ḇefandun ya pok fa wakun tabaku oso awer.

● Yasmai dafduf mental.

Kakaku ya: Wasmai dafduf mental raris depresi ḇaido skizofrenia bo dokter isya myam dafduf Bena ido, wor i fa ifnoḇek Au fa wamnai wasyor tabaku. Na imarisen kaku ifnoḇek Au, imbude na fyarwe nyan fa myam dafduf Bena insama bisa kwara pyum kaḇer roi kwinfir faro dafduf Bena ḇaido obat risai nari ḇepake na.

● Yakaḇer fa yasyor tabaku wer ido, yakara jadi fa yamnai ḇa.

Kakaku ya: Jadi fa wabur roi ḇedwarek na bo kwaḇer fa wasyor tabaku wer ido, kwara awer Auma wasmai nyan oḇa kwar. Snar ḇebor ḇesewar fa ḇemnai ro anan tabaku ine kako sakmnis ra Au. Wasusu awer mboi swewar kaku wer. Wasapi ido kwara awer wasusu kwar. Wasapi bo ḇarek pdef ma wamewer wores kaḇer mande. Inja swewar pdef, rarirya ido nari wasmai bon ḇepyum!

Kwarapan Romualdo fawar ḇyena, isyor tabaku swaf taun ri 26 mboi imnai kwar taun ri 30 naiwara. Fyas bo doḇe, ”Yafarander rarwan riḇeso kwar yakaḇer fa yasyor tabaku wer. Fyor ya sanerine iknon ḇa, rya na ono ḇefnoḇek aya wer ḇa. Imbape, fafisu yakara kaku fa yana wis ḇepyum kaḇer kuker Allah Yahwe ma yanadi ker yor fafnoḇek ro I, mura ido yamnai.”

Ro pupes bar awawos ine, nari kawos nyan ḇese ḇepyandam na ḇefnoḇek Au fa wamnai wasyor tabaku ma nwa marasrisen.

[Kotak/Sonin ro ram 7]

NASNAI ḆESISYE MBOI NAFNAI MARMAR

Sbuk tembakau na kuker nyan ḇebor. Roi ḇeḇeso sifrur ro tembakau sboḇ na kako ro toko ḇeḇoḇ roḇean ḇepyum ma obat sifrur ro rokaker na. Rarirya mboi, Organisasi Kesehatan Dunia ikofen, ”tembakau sifrur ḇe roi sairirya kam nafnai marmar”. Dafduf ḇefesepen kuker tembakau imnis ra kanker ma barmor, nafnai marmar. Bin ḇefadores bo isyor tabaku na ifnai roi ḇemun ḇe kapira ḇyedi. Rosai monda roi sifrur ro tembakau snonggaku ḇebor sya sepake na?

Bidi: Tabaku ḇenyiw nabor syadi sepake ro sup ḇero Asia. Bidi isasyar tar, nikotin, ma karbon monoksida nabor syadi rarwan riḇeso buro tabaku ḇesena.

Cerutu: Sifrur cerutu ine ro tembakau sparekepen na kuker tembakau ram ḇaido kertas sifrur ro tembakau. Tabaku ḇesena naser zat asam, mboi cerutu ine iḇese kukro naser zat basa, naiso nafrur fa sikun na ḇa yo swadon na isos’f nikotin ya.

Kretek, ḇaido tabaku cengkeh: Sifrur tabaku ine ro tembakau persen ri 60 ma cengkeh persen ri 40. Tabaku ine iḇese ro tabaku ḇesena kukro iser tar, nikotin, ma karbon monoksida nabor syadi.

Pipa: Sisyor tabaku kuker pipa inema nyan ḇepyum ḇa kako diri, kukro nafnai kako dafduf kanker ma dafduf ḇesena.

Tabaku ḇepaw ḇa: Ine kyur ḇe sugi (tembakau lempeng) ma tembakau sisyor na, ma guktha ḇediref sbuk ker na ro Asia Tenggara. ­Nikotin nane nari nsun mundum na ḇe rik roro swadon. Sepake tabaku ḇepaw ḇa nane na nun roi ḇemun kako imnis ra sepake tabaku ḇesena.­

Pipa ḇeser war (bong, ­hookahs, narghile, shisha): Sbuk pipa ine insama fyor sisyor tabaku paw ḇyena nambran ḇe war resari. Ḇape sifrur radine kako napok nafrur roi ḇemamur na napromes, ine kako zat ḇefnai dafduf kanker, ḇesun ḇe paru-paru.

[Kotak/Sonin ro ram 8]

WAFNOḆEK SNONGGAKU ḆESE FA SIMNAI SISYOR TABAKU

● Nwa kakara ḇepyum. Buk wos sandik ma roi ono faro si, napyum syadi buro kawos nabor si. Kokofen radine, ”Yakara mboi swewar kaku wer ari ido na bisa wamnai,” nama napyum syadi buro kobo, ”Auma jadi ḇa kwar!”

● Buk maf. Oso ḇesewar fa imnai ro anan tabaku ine imsor ḇaido fyasnai fafayaf ḇyena faro Au ido swewar fa kwara awer na. Wakofen roi ḇepyum raris, ”Yafawi ine ipyan ḇa, mboi roi wafrur nane nafrur fa yamanen kaku Au.” Wakofen awer, ”Ibye, wasyor tabaku mura!”

● Ḇe bati ḇepyum faro si. Refo doḇe, ”Bati ḇekaku isawarwar ro fafisu nakam, ma ḇye naek koḇedi ro fafisu ḇesamswen na.” (Amsal 17:17) Inja, ḇe kaḇaḇaḇ ma fasnai saswar ”ro fafisu nakam” faro snonggaku oso ḇesewar fa imnai ro sasyor tabaku, ro fafisu risai monda fyor sneri imarisen ke roḇa.

Na Wasmai Bon Ḇepyum ya!

INEISO oras fa ”wamgak ḇa ma wafrur beri”. (1 Tawarikh 28:10) Rosai wer nyan ḇepupes bisa wafrur na insama wasmai bon ḇepyum ya?

Wap ḇepon tanggal ya. Departemen Kesehatan dan Layanan Masyarakat AS ikofen fafisu waḇe wamnai kaku ro anan tabaku ine ido, ipyum ya ro swaf minggu ri suru wap ḇepon ras nari wasyor tabaku ḇa. Ḇekopḇair tanggal ani ro kalender Bedi, wakofen ḇe bati Bansi. Fafisu kenem Bena nfadwer rariryano wafrur kaku na ro ras wap ḇepon anya.

Wafrur ”kartu ḇebuk swarapepen”. Fas ro kartu anun riḇeso anane, warpu roi ḇesena nari ḇesambraḇser snemuk wun na:

● Roi ḇewar fa wasyor tabaku wer ḇa

● Nomor telefon ro snonggaku nari ḇetelfon si fafisu kwara waḇe wasusu kwar

● Swarapepen ḇefnoḇek Au fa wafrur kaku roi kwara na, imnis raris wos ḇero Galatia 5:​22, 23

Wun farma kartu ḇebuk swarapepen Bena, ma wawasya kaḇer na ro ras ḇe ras. Wamnai kwar ya no, wawasya kartu anna pdef ro fyor nwa marisen ḇesambraḇ fa wasyor tabaku wer.

Ḇinggwanbur roi nari ḇefesepen kuker tabaku. Tanggal wap ḇepon anya ryama ḇaim ido, ḇinggwan beri roi ḇefesepen kuker anan tabaku. Imnis raris, randak iwara wakḇok ro arwo bo wasyor beri tabaku ido, bisa wawaf rawo swaf oras oser insape. Auisya wanan ḇaido insape posa bo wasyor tabaku ido, wamnai mura. Rwa ḇe moḇ snonggaku sibor sisyor tabaku ro na awer. Oso wer ido, rofyor kwain ro manggundaw, wakofen kuker mkaren naba radine, ”Yor maf, ayama yasyor tabaku ḇa. Yamnai kwar.” Roi anane nari nafnoḇek kaku Au fa wafasos manggundaw fa wamnai wasyor tabaku ro tanggal wap kwar anya. Ine nbe swarapepen ḇe Au kako snar kero wer nari ḇe snonggaku ḇemnai ro anan tabaku.

Fasos pyum roi wafandun na. Fanam kwar ro tanggal wap anya ido, fasos roi na wan fadwer tabaku: wortel, kacang, gula-gula gam, ma ḇesena. Wakofenḇair ḇe bati ma kina Bansi tanggal wap ani ma roi bisa sifrur fa sifnoḇek Au. Tanggal ani ryama ḇaim, wasawen asbak, korek, ma rosai monda na ḇefrowes Au, imnis raris tabaku wakram kaker ro rum, oto, sansun, ḇaido ro moḇ wafararur ro ya. Kaku ḇae, na napyan syadi fa wun tabaku ro laci ḇardibur wor ro bati ḇaido wakowes na! Irya monda ḇa, ḇenadi pdef wor Manseren Allah fa ifnoḇek Au, ma wun snemuk kaku rofyor wasyor tabaku ḇepupes ya.​—Lukas 11:13.

Snonggaku ḇebor ”smeruk wis” sena kwar kuker tabaku, bati ḇekwar sedi mboi ḇeanggarkar ma ḇefrowes si. Au kako na wakfrur na ḇae. Ras naiwama nari waprei ma wamarisen syadi.

[Sonin ro ram 9]

Wun farma kartu ḇebuk swarapepen Bena, ma wawasya kaḇer na ro ras ḇe ras.