Allah Yahwe​—Isyus fa Komambir I

BISA wakḇoryae ro kenem Beja ke? Wafawi kuf Manseren Allah ḇa ido, na waḇoryae ḇae. Kokofen rarirya kukro? Snonggaku ḇebor sya smam ro manggunsi kwar snar smambir Manseren Allah ro Refo ine, nbuk payamyum nabor syadi ro kankenem sena. Sismai payamyum ro fafisu ine ḇeri ma meser iyama isof fyoro-fyoro.

Allah Yahwe kakara Ḇyena naiso sfas ro Refo ya, imarisen insama komambir I. Manfasfas Mazmur doḇe, ”Rarirya kada snonggaku sya sifawi snar Au, ḇenir ḇe Yahwe, Au monda Ḇekaki Syadi ro supswan ḇesiper.” Yahwe ifawi komambir I kada, nari kosmai payamyum. Yesaya doḇe, ”Aya, Yahwe, iso Allah mgoḇedi, ḇefarkor mgo faro payamyum mgoḇena.” Payamyum rosai na kosmai kaku snar komambir pyum Allah Ḇepoik Syadi Yahwe I?​—Mazmur 83:18; Yesaya 48:17.

Oser ya iso kosmai farkankin faro kenem koḇena ras ḇe ras, kona saneraro ḇepyum ḇekur ras iyama, ma kosmai kananon. Irya monda ḇa, komambir Yahwe I naiso eḇedari koḇese ro snonggaku ḇero dunya ine kam, isoine kona kakara ḇepyum faro fakfuken ḇefandun kaku na. Fakfuken sairiri?

Rosai Imbe Swewar Kaku ro Kenem Bena?

Baboine snonggaku sya sifrur roi ḇepyum nabor ro teknologi na kwar, fama sifakfuken kaker fakfuken ḇefandun nane: ’Rosai ḇefnai fa yakenem ro supswan ine? Kenem yena moḇsa na ḇyerai? Rosai imbe yasewar kaku ro kenem ine?’ Snonggaku oso ifawi mnis ḇaim kankarem ḇyena ido, nari ḇyaḇir kenem ḇyeja nadawer monda. Snonggaku ḇebor sakḇaḇir radine kako ke? Ro sup Jerman taun 1997 naiwara, sifuken snonggaku ḇero diansya kakara sena ḇekur roi anine. Kawasa ḇero moḇ anya soḇe smam kenem sena nefromo monda. Imbude kawasa ḇero moḇ Bedi sino sisya sakkara rarirya kako.

Snonggaku ḇeḇoryae nari iryaḇ wer ḇa fa kyara rosai imbe ifrur ro kenem ḇyena. Snonggaku ḇebor sisewar kaku fa sismai nasan ḇepyum ma sikram arasai nabore. Fama sḇaḇir sismai roi oḇa ro kenem sena kaker. Roi nane nafnai fa sia simewer sikenem werdi. Syapram International Herald Tribune fyawar binkbor ḇedoser kaku oso. Syapram anya doḇe bin ani nya nana nabor kaku, rosai fyandun na naisya kame, ikenem mararen kaku. Mboi ḇyaḇir ḇyero manggundi ma ismai roi oḇa. Mura rya dinem aryawin insama denef pyum, kurḇei denef rawo ikḇok ḇa. Imbude Ausya wakfawi snonggaku sia sḇero manggunsi, siḇoryae, mura smun manggunsi.

Wakrower kwar soḇe fawawi dunya naiso ḇekofenḇair ḇe ko ḇekur kankenem ine ke? Syapram ḇeraker sup Jerman Die Woche ikofen radine, ”Roi fawawi dunya ikofen na rya kyaku yo, nya samambraḇ oḇa. Farkarkor evolusi rya nyapnap, ma roi sor ḇe fisika kuantum kako, nakofenḇair fararwei fama nasnaibos ḇa, nfasnai roi nakam fama nbuk kananon ma saneprei oḇa.” Roi manfawawi sisrow na nafnoḇek ko kwar fa kofawi kankenem ro roi ḇebor kam ma moḇsa kankenem ine naisya pdef raya. Imbape, fawawi dunya ine ikofenḇair ḇe ko ḇa rosai ḇefnai fa kokenem ro supswan ine ma rariso kenem koḇena na ḇyerai. Kokyar monda faro fawawi dunya ido, na kosmai kankarem faro fakfuken ḇekur kankenem ine ḇa. Nane namnis syapram Süddeutsche Zeitung roi ikofen ya, doḇe ”snonggaku ḇeraker moḇ sairirya kam sfandun farkankin”.

Inja mansei ḇesrow kaku fa ḇebuk farkankin faro snonggaku koine? Ḇefrur ko ḇae. Rofyor Yahwe ifrur randak snonggaku koine, ifawi kaku roi eḇedari ḇye ko fa kokenem ro supswan ine. Refo doḇe Yahwe ifrur snonggaku koine insama supswan ine ifo ma komamwarek pyum na. Roi snonggaku sya sifrur nakam sfasnai Manseren Allah rari Ḇyena, raris nanapes, fawawinanem, ma saswar. Kofawi roi ḇewar fa Manseren Allah ifrur snonggaku koine kada, insape na kofawi kaku rosai ḇefnai fa kokenem ro supswan ine.​—Kejadian 1:​26-​28.

Rosai Na Wakfrur ya?

Rosai na wakfrur ya snar ro fafisu naiwara wasmai kankarem faro fakfuken nane ḇaim: ’Rosai ḇefnai fa yakenem ro supswan ine? Kenem yena moḇsa na ḇyerai? Rosai imbe yasewar kaku ro kenem ine?’ Refo danun ḇe Au fa mambir pyum Yahwe I. Manseren Yesus doḇe, ”Kankenem ḇekain fyoroya, isoine mboi ssmambaḇir aw werer Allah [ḇekaku], ma ssmambaḇir Yesus Kristus wawan kwar ani.” Refo dor Au kako fa wakfasnai Manseren Allah rari-rari ḇepyum Ḇyena, ḇepon syadi isoine saswar ya, ma swewar kaku fa wawaira faro Allah Karajan Ḇyedi nari ḇerama ya. Rarirya, nari waḇoryae ro kenem Beja ḇa mboi wakyar kankenem ḇefo payamyum ro ras naiwama naisya. Oso wer ido, nari wafawi kankarem ro fakfuken ḇefandun kaku anna.​—Yohanes 17:3; Pengkhotbah 12:13.

Wafawi kankarem ḇyena ido na nafnoḇek kaku kenem Beja ke? Snon oso ḇenir ḇe Hans myam roi ine kwar.a Fyor iwara ikyar faro Allah, mboi ikyar manggun ḇa kero. Inja kakyar ḇyenane nafnoḇek kaku kenem ḇyeja ḇa. Hans imarisen dan ker roi sor ḇe narkoba, dun bin ḇembran famfnom sya, ifrur roi ḇeḇarḇor na, ma imarisen dek motor. Hans ikofen radine, ”Yana marisen ro kenem yenane ḇa.” Fafisu ḇyeumur rya taun ri 25, fyarkor mnis Refo ya fa myambir Manseren Allah. Fafisu myambir Yahwe I kwar ma ifawi kankenem ine, fyadwer kenem ḇyeja ma dakḇebaptis ḇe Saksi Yahwe. Hans daksun ro fararmyan oras nakam ma ifarmyan ro swaf taun ri samfur kwar. Ikofen ḇo doḇe, ”Yafarmyan ḇe Yahwe ima nyan kenem ḇepyum kaku dirya. Roi ono namnis kuker roi ine ḇa. Yamambir Yahwe I kwar, inja yafawi rosai imbe yafrur kaku ro kenem ine.”

Snonggaku ḇebor skara faro fakfuken ḇekur kankenem ine monda ḇa. Roi ḇero dunya ine naḇye ḇa syadi, inja nafrur fa kawasa sya sna fakfuken ḇefandun ḇesena wer.

Rosai Ḇefnai fa Roi Ine Ryariryani?

Rofyor roi ḇeḇye ḇa kyur snonggaku ono ido, na skara fakfuken ine ker: Rosai ḇefnai fa roi ine ryariryani? Sifawi kankarem faro fakfuken ine kada, nari sisambraḇ ro fafisu sismai samswen. Mboi sifawi ḇaim ido, nari sekandera ma sesanekar syadi. Komampan fawar ro bin oso ḇenir ḇe Bruni.

Bruni fyawar ḇo doḇe, ”Taun riḇeso aniwara kapira bin yedi ryoë. Yakyar Manseren Allah ima isya, inja yor ḇe imam ḇero moḇ ayena fa byuk sneprei ḇe aya. Imam ani ikofen ḇe aya ḇo doḇe Manseren dun Susanne i ḇe nanggi ma ḇye malaikat kwar. Susanne marmar ḇyedine nafrur fa yaḇesanekar monda ḇa, mboi yamsor Manseren I kukro dun i kwar.” Bruni ḇyekandera ma ḇyesanekar swaf taun riḇeso. Fyawar wer, ”Ḇarpur mura, Saksi Yahwe sfasnai ḇe aya mnuk ro Refo ḇekofenḇair yana roi fa yabukimsor Manseren Allah ḇa. Yahwe dun Susanne i ḇe nanggi ḇa ma dakḇe malaikat ro diwa ḇa. Iduf kukro dakna sasar ya kako. Susanne denef ro marmar ya ma iwaf Yahwe I fa ḇyawes kaḇer i. Yafarkor kako Yahwe ifrur snonggaku koine fa kokenem isof fyoro-fyoro ro Firdaus ro supswan ine. Ma kero wer, nari ifrur roi ine fa ryarirya. Yafawi Yahwe rari-rari Ḇyena kwar, inja nane nafrur fa yafanam syadi faro I ma yaḇesneso wer ḇa.”​—Mazmur 37:29; Farfyar 24:15; Roma 5:​12..

Snonggaku ḇebor sekandera kukro roi ḇeḇye ḇa kyur si, mamamun, basbiser, ḇaido, rim ḇeba. Bruni manggundi ismai sneprei fyor iwasya ro Refo snar Yahwe iso ḇefnai fa snonggaku sya sekandera ḇa, kyara fa byuk kandera faro si ḇa, ma kero wer nari ipyos kandera sena. Roi ḇeḇarḇor komam naisya nabor ro baboine nfasnaiḇair koisya kokenem ro ras-ras ḇepupes dunya ine. Kero wer, fararwei ḇeba na nejadi ro supswan ine. Snonggaku sya kenem sena nari napyum syadi wer.​—2 Timotius 3:​1-5; Matius 24:​7, 8.

Mambir Pyum Manseren Allah

Fafisu naiwara Hans ma Bruni sufawi kermgun Manseren Allah kwar. Sukyar ima isya, mboi sumambir pyum I ḇaime. Rofyor subuk swaf fa sufarkor fa sufawi Yahwe I wer, roi sufrur nane nun bon ḇepyum. Susmai kankarem ḇesrow faro fakfuken ḇefandun sifuken ro baboine na. Roi sufawi nane nbuk kananon ma nafrur su fa sukyar ras naiwama payamyum ya isya. Snonggaku riyuta ḇeyakfarmyan faro Yahwe I sakna roi ḇeradine kako.

Roi kofrur randak fa komambir Yahwe iso kofarkor pyum Refo ya, kukro Refo fyasnaiḇair mansei kaku Yahwe I ma rosai dor ro ko fa kofrur na. Nane naiso Allah manfamyan Ḇyesi ḇero abad randak siwara roi sakfrur na. Lukas doḇe snonggaku Yahudi ḇeḇe Kristen ḇero mnu Berea, ro Yunani, ”sikada simnaf wosya [ro Paulus ma Silas] kuker sne ḇemarisen syadi ma ras-ras kam sewasya Refoya fa ssḇuk karkara farkarkor simnaf na nkaku rariryake roḇa”.​—Farfyar 17:10, 11.

Snonggaku Kristen ro abad randak siwara siryur ro sidang jemaat na. (Farfyar 2:​41, 42, 46; 1 Korintus 1:​1, 2; Galatia 1:​1, 2; 2 Tesalonika 1:1) Saksi-Saksi Yahwe ro baboine sakfrur rarirya. Siryur ro sidang jemaat ma siso fananjur ari sfasos kwar fa nafnoḇek si insama sfanam syadi ḇe Yahwe I ma sismai marasrisen fa sfarmyan faro I. Na kosmai payamyum ḇese wer fyor koḇebati kuker Saksi-Saksi Yahwe sya. Snonggaku koine kona samambraḇ fa kofasnai rari-rari ḇepyum Allah nya na. Saksi-Saksi Yahwe sima snonggaku ḇenapes ḇa kako, mboi sisewar fa sfasnai Allah rari-rari ḇepyum Ḇyena. Inja kofanjur kayam fnoḇek Saksi-Saksi Yahwe sya mande, insape na komambir pyum Yahwe I.​—Ibrani 10:24, 25.

Mam ido rya fandun fa kofrur roi nabor kaku insape komambir pyum Manseren Allah ke? Imbe kosmai roi oso ro kenem koḇena ido, iso roi na kosewar fa kofrur kaku na ḇae. Kwara atlit ḇekir oso sasewar ḇyena kada. Snori Jean-Claude Killy ḇeraker Prancis, ismai medali brawen ro fanandi oso. Ikofen ḇo doḇe snonggaku oso dakḇe dakfnak ro internasional ido, roi ono naisya fandun fa ifrur na kada. Ikofen radine, ”Wafrur kaku na ro swaf taun ri samfur ḇerandak, wafrur aw bena ro taun ḇe taun, ma kwarauser na ras ḇe ras . . . Iso fararur wafrur ro swaruser ma baken bena ro swaf ras ri 365.” Swaf ma sasewar ikofen nane, nama ifrur na faro fanandi ḇembran ro swaf menit ri samfur monda! Isyadi wer, sasewar koḇena fa komambir pyum Yahwe I nari nun payamyum ḇekain fyoro.

Ḇaḇebati Ḇefanam Kaku

Snonggaku syakam na simewer siḇoryae ro kenem sena ḇae? Inja rofyor wakmom rosai imbe swewar ro kenem Beja ḇaido imbe wakfawi roi ḇefnai fa kandera na nabor naisya ido, wun snemuk ro fyor ine ḇeri fa wakmambir pyum Yahwe I kada. Farkor fa nwa fawawi nabor ḇekur I mande, nari kenem Beja ipyum syadi wer isof fyoro-fyoro.

Ras oso na komnai kofarkor fa komambir Yahwe I ke? Snonggaku ḇefarmyan ḇe Yahwe fyoro kwar sya smanen kaker faro roi sfarkor kwar na ma sfarkor babo na wer fa sifawi syadi Yahwe I. Kakfarkor na kako mande, na komarisen ma kofanam syadi faro I. Iḇye kada kakḇaḇir raris Manwawan Paulus moḇ ḇyaḇir raya. Fyas ḇo doḇe, ”Kaku ḇeri Allah arasa ḇyena naba! Kaku ḇeri fawawinananem ḇyena naba! Manseiso nari ḇekukeḇ rosai dawos namuk na? Manseiso nari befawi nyan byuk fararurya? Ro Refo sfas radine, ’Manseiso ḇefawi Manseren swaruser ḇyena? Manseiso nari ḇeḇuk ananun faroi?’”​—Roma 11:33, 34.

[Fasfas Kasun]

[Ḇeḇeyap]

Snonggaku sya sifakfuken kaker fakfuken ḇefandun nane: ’Rosai ḇefnai fa yakenem ro supswan ine? Kenem yena moḇsa na ḇyerai? Rosai imbe yasewar kaku ro kenem ine?’

[Ḇeḇeyap]

”Yafawi Yahwe rari-rari Ḇyena kwar, inja nane nafrur fa yafanam syadi faro I.”

[Ḇeḇeyap]

”Yafarmyan ḇe Yahwe ima nyan kenem ḇepyum kaku dirya. Roi ono namnis kuker roi ine ḇa. Yamambir Yahwe I kwar, inja yafawi rosai imbe yafrur kaku ro kenem ine.”