Fafisu oso kwara fa wawasya Refo ḇape jadi fa wafrurna ḇa snar wakbabir raris rosai snonkaku rikyor sikofen ro ḇoiyasne ke? Faro snonkaku ḇebor sya, ḇaḇewasya Refo smamna ḇe roi ḇemarḇak kaku. Ḇape, fyor wafawi snar Refoya nari nafnoḇek Au fa nwa aski syadi ro kankenem Bedi ido, na kwara rariso? Ma rofyor wafawi nyan ḇepyan riḇeso ḇefrur fa wamarisen wawasya Refoya ido, rosai nari wafrurya? Wamarisen fa wakfawi rosai na Refo ḇyuk ḇe Au ke?

Kwarapan kankarem riḇeso ro snonkaku ḇesmai fainda snar sisewar fa siwasya Refoya.

Ezekiel, umur ḇyeja syadi ro 20, doḇe, ”Randak iwara, yamnis kuker snonkaku ḇeyun oto ḇape ifawi moḇ imbe ryarona ḇa. Ḇape ḇaḇewasya Refo nafnoḇek aya fa yana payamyum ro kankenem ayedi. Refoya naser ananun ḇemnis ḇefnoḇek aya ro ras ḇe ras.”

Frieda, umur ḇyeja syadi ro 20, fyasnaiḇair kako, ”Ayama yamsor fasawsaw ker. Ḇape snar yawasya Refoya, nane nafnoḇek aya fa yafarkor fa yamkuepen mankundaya. Ine nafrur fa napyan syadi ḇe aya fa yafanam faro snonkaku sya, inja kirine yana bati sibor syadiwer.”

Bin oso ḇenir ḇe Eunice umur ḇyeja syadi ro 50, doḇe, ”Refoya ifnoḇek aya fa yaḇe snonkaku ḇepyum syadiwer, fa yafadwer rari ḇeḇyeḇa ayena.”

Raris snonkaku rikyor skoya ma snonkaku yuta ma yuta ḇesesya, ḇaḇewasya Refoya na nafnoḇek Au fa nwa aski syadi ro kankenem Bedi. (Yesaya 48:17, 18) Ine na nafnoḇek Au fa (1) wun snemuk ḇepyum, (2) nwa bati ḇekaku, (3) wafrur mnis samswen Bena, ma (4) ḇefandun syadiya iso, wafarkor napnapes ro Allah I. Ananun ḇero Refo ndramuma ro Allah, inja rofyor waso na ido nari wasmai bon ḇepyum. Allah ipok fa ḇyuk ananun ḇeḇyeḇa ḇe Au ḇa.

Roi ḇefandun kakuya iso wafrur ḇaḇewasya Refoya ḇeri. Inja, ro nyan ḇepyan risai bisa fa wafrurna insama nun marisen syadiwer ḇe Au?

Nyan risai nari ḇefnoḇek Au fa wasmai marisen ma payamyum nabor syadi ro ḇaḇewasya Refoya? Mam anun ririm ro sop nane ḇefnoḇek snonkaku ḇebor kwar.

Kwinfir moḇ ḇemnis. Swewar moḇ ḇeknon. Buk swaruser Bena faro rosai wawasya na monda, mboi roi oso nawyae awer Au. Osower ido, wawasya ro moḇ ḇesnai kuker wamḇeso pyum ḇeyun pararei na nafrur fa ḇaḇewasya Bedi nun marasrisen.

Nwa nyan kakara ḇemnis. Snar Refoya ryamuma ro Kma koḇedi ro nanki, inja nari wasmai payamyum nabor rofyor nwa rari raris romawa oso ḇemarisen ḇefarkor ro sinan ḇesawarwar ḇyedi. Nwa kakara ḇesasar kuker Refoya ido, swewar fa wasawen na insama Allah fyarkor Au.​—Mazmur 25:4.

Ḇenadi rofyor wawasya ḇaim. Refoya iser Allah kakara Ḇyena, inja iso ḇefnai fa kofandun farfnoḇek ro I insama kofawi pyum na. Allah ḇyeasas nari ”ḇyuk Rur Ḇesrenya faro mansei ḇeyor faroiya.” (Lukas 11:13) Rur ḇesrenya na nafnoḇek Au fa wafawi pyum Allah kakara Ḇyena. Ma nari ḇyas swaruser Bena fa wafawi ”Allah aw ḇyena ḇeyokef kako.”​—1 Korintus 2:10.

Swewar fa wafawi na. Wawasya na fa nabro fasaw monda awer. Kwarauser rosai wawasya na. Wafuken ro mankundaw: ’Rari ḇepyum risai yamam ro snonkaku ḇero fawar yawasya ine? Rariso yasouser mnis na ro kankenem ayena rai?’

Nwa aw fa wasmai fainda oso. Insama wasmai fainda ro ḇaḇewasya Refo ido, nwa aw fa wafarkor roi ḇeyun payamyum ro kankenem Bedi. Imnis raris: ’Yamarisen fa yafarkor nabor kuker Allah I.’ ’Yamarisen yaḇe snonkaku ḇepyum syadi, snonswa ḇaido binswa ḇepyum syadiwer.’ Ramnai kwinfir ḇar ḇero Refo nari ḇefnoḇek Au fa wafrur roi ine.a

Anun ririm anine nari nafnoḇek Au fa wafrur ḇeri ḇaḇewasya Refo Bedi. Ḇape rosai na wafrurya insama ḇaḇewasya Bedi nun marasrisen syadiwer ḇe Au? Artikel ḇeuserya na nḇuk anun ḇeḇeso ḇe Au.

Au ido rariso mam ḇaḇewasya Refoya rai? Nafrur papum ke nun marisen? Nanekam ndramuma ro nyan rariso wawasya na rai. Rwama komam rosai na wafrurya insama waryaḇ ma nwa marasrisen syadi ro ḇaḇewasya Refo.

Kwinfir terjemahan sikyarna ma wos ḇyena napyan. Rofyor roi wawasya na naser roi ḇesamswen ḇaido sḇuk wos ḇekwar wafawi pyumna ḇa ido, nari wamewer fa wawasya na. Inja, swewar Refo ḇena wos ḇepyan fa wafawi ma wos ḇyena nḇuk sneprei. Ḇape, fandun fa terjemahan ḇyena namnis ma nkaku.a

Buk teknologi ro baboine. Baboine Refo nasya nabor sifrurna ḇe syap-syap monda ḇa ḇape nasya ro elektronik kako. Refo riḇeso bisa fa siwasya na ro internet ḇaido sikram na ro komputer, tablet, ḇaido hp sena fa siwasya ro mankunsi. Refo elektronik ḇesena naser roi ḇefnoḇek Au insama fasaw fa ḇukimam mnuk-mnuk ḇese ḇero Refo faro wos knam oso ḇaido ḇukimambir terjemahan ḇesena. Wamarisen syadi fa rwower ḇardibur ro wawasya ido, Refo sḇerekam nasya kako. Snonkaku sibor simarisen fa srower rofyor sifrur marandan kuker oto, simnaisu ro fararur sena, ḇaido rofyor sifrur fararur ḇese. Nyan oser risai wamarisen wafrurpan ya?

Buk roi ḇefnoḇek fa wafarkor Refo. Roi ḇefnoḇek Au fa wafarkor Refo nari nafrur fa wasmai payamyum nabor syadi ro ḇaḇewasya Bedi. Peta ḇefasnai sup-sup ḇero Refo naisya. Ine na nafnoḇek Au fa wafawi mnis moḇ-moḇ ḇero farfyar rosai wawasyana ma nafnoḇek Au fa wawasenkara moḇsa sarisa ḇyena isnai rai. Artikel ḇese, imnis ḇero majalah ine ḇaido ḇero ”Ajaran Alkitab” ro situs Web jw.org, nari nafnoḇek Au fa swewar fa wafawi knam ro ḇar-ḇar ḇese ḇero Refoya.

Buk nyan oser monda awer. Ḇaḇewasya Refo ro fasal ḇe fasal ine rya samswen ḇe Au ido, bisa fa wawasya ḇepon ḇar risai wamarisen syadi ya. Wamarisen fa mambir snonkaku sfas ro Refoya ido, wawasya mnuk-mnuk ḇefawarḇair si. Nyan fa wafrurpan roi ine nasya ro kotak ”Swewar fa Mambir Kaku Snonkaku Ḇeḇefas ro Refoya”. Imbude wamarisen wawasya Refoya fawar ḇe fawar ḇaido syos-syos ḇero sarisa na. Wamarisen wafrurpan na ke?

Refo ima iḇese kuker syap ḇesena. Iser ananun ḇerama ro Manḇedaw koḇedi. (2 Timotius 3:16) Anun ḇyena nafnoḇek kaku kankenem koḇena. Kakuḇae, Refoya doḇe, ”Allah wos ḇyena wos ḇekenem ma ḇepok”. (Ibrani 4:12) Refo nya papoik fa fyadwer kankenem koḇena ro nyan risuru isoine, nḇuk farkankin faro kankenem koḇena ro ras ḇe ras ma nafnoḇek ko fa komambir Allah I ma asas Ḇyena.​—1 Timotius 4:8; Yakobus 4:8.

Nafnoḇek kankenem Bedi fa ipyum syadiwer. Refoya na ifnoḇek Au ro samswen Bena oser-oser. Nḇuk ananun ḇemnis kaku faro roi ḇeḇeuser nane.

• Ḇaḇebati kuker snonkaku ḇesesya.​—Efesus 4:31, 32; 5:22, 25, 28, 33.

• Pararei ro sne ma baken.​—Mazmur 37:8; Amsal 17:22.

• Kenem ḇepyum.​—1 Korintus 6:9, 10.

• Payamyum ro kankenem.​—Amsal 10:4;28:19; Efesus 4:28.a

Inbeswa ḇefarḇuk babo ro Asia, suḇesyowi kaku ananun ḇero Refoya. Raris ḇefarḇuk babo ḇebor sya, su kako samswen fa sufawi mnis rari suḇena oser-oser ma susewar fa suyawawos kuker kakaku. Ḇape susouser ḇeri rosai suwasya ro Refoya. Rosai bon ya? Snonswa ine, snori Vicent, doḇe, ”Rosai yawasya ro Refo nafnoḇek aya fa yafrur mnis roi ḇedwarek ro farḇakḇuk nuḇena kuker nyan saswarya. Snar nuso mnis ananun ḇero Refo, inja nusmai marasrisen ro kankenem nuḇena.” Swari, Annalou i, dakofen, ”Nuwasya farari ḇero Refoya nane nafnoḇek nu. Kirine yamarisen kaku ma yasmai payamyum ro farḇakḇuk nuḇena ma nusmai aw ḇepyum ro kankenem nuḇena.”

Mambir kaku Allah I. Vicent dawos farḇakḇukya monda ḇa, ikofen kako, ”Snar yawasya Refoya, kirine yaḇaḇir yafanam syadi kuker Yahwe I.” Roi Vicent ikofen ine knam ya iso, Refoya na ifnoḇek Au fa mambir kaku Allah I. Inja nari wasmai payamyum ro Allah ananun Ḇyena ine monda ḇa, ḇape nari ḇebati kuker I kako. Ma Allah ḇyeasas nari ḇyuk payamyum ro fafisu iyama ḇe Au, iso fafisu ḇeyun marasrisen ro ”kankenem ḇekakuya” isoine kankenem fyoro-fyoro. (1 Timotius 6:19) Syap osoḇaḇeri ḇeḇuk saneraro ḇeradine mboi Refo demir monda.

Rofyor Ausya wawasya Refoya ma wafrurna pdef ido, nari kankenem Bedi ipyum syadiwer ma nari mambir kaku Allah I. Imbape, rofyor wawasya na ido, nari nwa fakfuken nabore. Rarirya ido, waswarepen muraḇe farari ḇepyum ro ḇebarara mananir Etiopia ḇekenem ro swaf pasi barek ri 2.000 naiwara. Nya fakfuken nabor kaku. Rofyor Filipus ifuken ḇe i snar ifawi kaku rosai iwasyana ke roḇa, kyarem bo doḇe, ”Yafawi rariso rofyor oso fyarkin aya ḇa?”b Imarisen rofyor Yesus manfamyan ḇekir ḇyedi ḇenir ḇe Filipus ifnoḇek i. (Farfyar 8:30, 31, 34) Rarirya kako, wamarisen wafawi nabor syadi Refoya ido, nkor Au fa waser fararyor Bena ro formulir ḇero internet ro www.pr418.com ḇaido fas syapram ḇe alamat ḇero majalah ine. Bisa fa swewar kako Saksi-Saksi Yahwe ro moḇ Bedi ḇaido rwama ḇe Balai Karajan ro moḇ Bedi. Inja iḇye fa wawasya Refoya ro rasine ḇeri, ma iḇye kada fyarkin Au fa wambran ro nyan kankenem ḇepyum.