Manseren Allah Ima Mansei Ḇefrur I?

Kwarapan kma oso dawos yoḇ romawa ḇyedi ḇeumur taun ri fik. Doḇe, ”Randak naiwara, Manseren Allah ifrur supswan ma roi nayafa kam, ifrur ori, paik ma mak sya.” Romawa ani kyara koper ḇo doḇe, ”Inja, Manseren Allah Ima Mansei Ḇefrur I?”

Kmari kyarem ḇo doḇe, ”Manseren Allah ima oso ifrur I ḇa. Ima isya kwar isof fyoro-fyoro.” Ro swaf anya, kankarem kmari ḇyuk anya rya nasrow kwar. Imbape, fafisu romawa ani iba muryas ido na isewar kaker fa ifawi kankarem ḇyena. Samswen fa ikyar roi ono naisya nya randak oḇa. Farsyos ḇeba ine monda nya randak. Inja ifakfuken wer, ’Manseren Allah ima ryamuma ro?’

Moḇsa Refo kyarem fakfuken anya rai? Ḇekaku ya, kankarem ro Refo namnis kuker kankarem ro kma ani. Moses fyas, ”Sye Yahwe, . . . fafisu wafrur bon na naisya ḇaim, fafisu wafrur supswan ma saprop ḇedufen ḇyena ḇaim, Auso Allah ḇekain isof fyoro-fyoro bis.” (Mazmur 90:​1, 2) Nabi Yesaya kako dakkofen radine, ”Wafawi ḇa ke? Rwower ḇaim ke? Yahwe, Manḇefrur supswan ḇesiper, iso Allah ḇekain isof fyoro-fyoro.” (Yesaya 40:28) Syapram Yudas fyas anya kako doḇe Allah isya kwar ”ro awar ḇepon isof baboine”.​—Yudas 25.

Mnuk-mnuk anna nfasnaiḇair Manseren Allah iso ’Raja ro awar nakam’, raris rosai Paulus ikofen ro 1 Timotius 1:​17 ya. Ine kyurfasnai kokaḇer ḇe fafisu naiwara yo, Allah isya kwar. Ma isya ḇesya kwar isof ro ras-ras naiwama. (Fasasna [Wahyu] 1:8) Inja, rari ḇeba kaku ro Allah Ḇepoik Syadi ine iso ikenem isof fyoro-fyoro.

Rosai ḇefnai samswen fa kofawi roi anine? Snonggaku koine kokenem kawan ḇa, inja nyan komam oras na iḇese ro Allah Yahwe I moḇ myam na rai. Snar Manseren Allah ima ikenem fyoro-fyoro, inja ro mamam Ḇyedi swaf taun syaran oser imnis ra ras oser monda. (2 Petrus 3:8) Kwarapan wos sarḇer ine: Kampam oso ikenem ro swaf ras ri 50, na bisa ifawi kankenem ro snonggaku ḇekenem ro swaf taun ri 70 isof 80 ke? Na oroḇa! Refo doḇe kobukimam ko kuker Manseren Allah ḇefrur ko ido, koinema komnis ra kampam monda. Samambraḇ ro swaruser koḇena namnis kuker Allah swaruser Ḇyena ḇa. (Yesaya 40:22; 55:​8, 9) Inja, na kokandor ḇa fyor kofawi mnis Allah Yahwe kenem Ḇyena ḇa.

Fawawi ḇekur Allah bekain isof fyoro-fyoro nama roi ḇesamswen fa kofawi na, mboi kokara na ido ine roi ḇesrow kaku. Oso ḇese isya ifrur Manseren Allah ido, iso nari ḇesmai nasan Manḇefrur. Fama, Refo fyasnai kaku Manseren Allah iso ’ḇefrur roi ḇebor kam’. (Fasasna 4:​11) Oso wer ido, kofawi randak ya farsyos ḇeba ine naisya ḇaim. (Kejadian 1:​1, 2) Rarirya ido, farsyos ḇeba ine ryamuma ro? Manḇefrur ya na isya ḇepon ḇae. Isya ḇepon kwar fyor ḇekenem ro nanggi sya sisya ḇaim, imnis ra Allah Rumgun mandos Ḇyedi ma malaikat sya. (Ayub 38:4, 7; Kolose 1:15) Inja nasnai kwar, ro randak kaku Manseren Allah derer kyain ro manggundi. Oso isya ḇefrur I ḇa. Oso isya ḇepon ro I fa ifrur I ḇaḇeri.

Farsyos ḇeba ine ma snonggaku koine koisya ro dine ine ḇyeḇair Manseren Allah ḇekain isof fyoro ima isya kaku. Manḇefasos roi ḇero farsyos ḇeba ine, ḇeyap sasoser fa nfara na, ima isya kwar ro randak naiwara. Iso monda ḇebuk kankenem faro roi ḇebor kam.​—Ayub 33:⁠4.