”Insape Yakara Kaku Nyan Kenem Ayedine”

KENEM AYEDI RO RANDAKYA:

Yasur yaba ro Warialda, mnu kasun ro New South Wales. Kawasa ḇero Warialda sifan domba ma sapi ḇaido sikaker. Kota ani isren kaku, ma snonggaku ḇefur roi ḇeḇye ḇa nabor manggun ḇa.

Nggoḇe manḇekanaek ri samfur, aya iso eba epon ya, inja fyor yaḇeumur taun ri 13, yafararur kwar fa yafnoḇek fandandun ras-ras nggoḇena. Yafarkor pdef ḇa, inja yafararur ro peternakan. Rofyor yaḇeumur taun ri 15, yafararur fa yamamwarek rofanfan sya. Fararur yediso yafrur kuda sya fa sfarfir.

Yafararur ro peternakan roi ḇepyum naisya ma roi ḇeḇyeḇa kako naisya. Yamam ido, fararur yena ma moḇ yaro ine nafrur marisen kaku. Ro roḇ ido, yakain yafanam for ḇesak bo yamam ḇe paik ma farsyos iyaswa ḇefo kuker mak sya, mura yadiref sananarem ro abris ḇero maper wam ya isopum na. Ro fafisu anya, yakain yakara oso Isya ḇefrur roi ḇepyum nanekam. Ḇape, roi oso ḇese iso yafararur rodine dun kako roi ḇeḇye ḇa ḇe aya. Rodine snonggaku sya sifanfadak ker ma tabaku ima napyan fa kosmai na. Inja, fyoro mura aya kako yakmnis si yakun tabaku ma yafanfadak.

Rofyor yaḇeumur taun ri 18, yara fa yaḇarek ro Sydney. Yamarisen fa yaksun ro anggota militer, ḇape spampum fararyor yena kukro ijazah yena nasrow ḇa. Mura ido, yasmai fararur ḇese ma yaḇarek ro Sydney swaf taun oser. Ro swaf anya iso yasrow randak Saksi-Saksi Yahwe sya. Yaso fananjur ari sena ma insape yafawi siso ḇebuk farkarkor ḇekaku ya.

Ḇape, fyoro ḇa mura yun snemuk fa yakaḇer wer fa yarararur ro yaf. Yara fa yaḇarek ro Goondiwindi, Queensland. Rodiwa, yafararur mura yafarḇuk. Ḇape, faḇye kaku kukro rodine yafarandinem wer.

Swa yedi nuna roma risuru. Fafisu suḇeaben kwar, yakara kaku kenem ayedine moḇsa na nḇerai. Yaswarepen kaku rosai yarower ro sarawrow Saksi sya sifrur ro Sydney ani, ma ine nadif aya fa yafadwer kenem yena.

Yasrow syap Baryas ḇesae fyoro kwar, ro syap anya naser alamat ro kantor cabang Saksi-Saksi Yahwe ḇero Australia. Yafarem surat yoḇ si, mura Saksi Yahwe oso ḇefrur pyum ma ḇeswar kaku ryama yoḇ aya. Inja yafarkor Refo ḇeri kuker i.

RARISO REFOYA FYADWER KENEM YEDI:

Farkarkor Refo nafrur fa yafawi kaku roi nabor fandun fa yafadwer ro kenem yenaine. Mnuk ro Refo ḇefnoḇek kaku aya iso 2 Korintus 7:1. Mnuk ani danunepen ko fa ”kofasren mankun ko ro roi ḇeḇor kam ḇefrur mamas baken ma rur koḇesi”.

Yun snemuk fa yamnai ro yakun tabaku ma farandinem. Samswen kaku ḇe aya fa yamnai ro roi nane, kukro roi anna yafrur na fyoro kaku kwar. Imḇape, yasewar kaku fa yakenem imnis Allah marisen Ḇyena. Roi ḇefnoḇek kaku aya iso yasomnis wos farkin ḇero Roma 12:2, ”Mkoso awer nyan famfnom ro supswan ine. Naek buk mankundaw fa Allah ifrur fa babo wer, insa beḇesadwer.” Yafawi kaku insama yamnai ro kenem ḇeḇye ḇa yena ine ido, fandun fa yafadwer nyan kakara yena. Fandun fa yamam kenem yenaine ḇe roi ḇeḇye ḇa, imnis moḇ Allah myam na rai. Kuker fafnoḇek ro Allah, yamnai yakun tabaku ma yafarandinem wer ḇa.

Roi ḇesamswen kaku ḇe aya iso yamnai yafanfadak. Yafawi kaku wos anun ro Efesus 4:​29, ”Wawos ḇemamas nasasyar awer ro mkosḇamna.” Ḇape, yafara roi yawos na ḇeri ḇa. Roi ḇefnoḇek aya iso yakara wos ḇero Yesaya 40:26. Mnuk ine dawosḇair ḇekur mak ḇero farsyos iyaswa, ”Mam mura ḇe farsyos ma kwara. Mansei ḇefrur roi nanekam? Ima Allah ḇewan sordade Ḇyesi fa sisae, imnis kuker ḇarbor seja; Sikame dor si kuker sisnosna oser-oser. Kukro samambraḇ ḇeba Ḇyedi ma papoik Ḇyena, oso ḇaḇeri ḇerama ḇa.” Yakara Allah nya samambraḇ fa ifrur farsyos ḇeba yamanen kaku ine, inja nari syambraḇ fa byuk ḇe aya papoik fa yafadwer kenem yena insama yafrur imarisen ḇae. Iso ḇewar fa yaḇenadi kuker kakaku ma yasewar marmar kaku insama bisa yafara wos yena.

BARAKAS YASMAINA:

Rofyor yafararur ḇe ḇemamwarek rofanfan, snonggaku ḇero diwa sibor ḇa, inja yawos manggun ḇa. Imḇape, farkarkor yasmai ro fananjur ari Saksi-Saksi Yahwe sya, nfarkor aya moḇsa yawos pyum rai ḇe ḇesesya. Inja ine nafnoḇek aya fa yawos ḇe snonggaku ḇesesya angginem ḇepyum ro Karajan Allah faro si.​—Matius 6:​9, 10; 24:14.

Taun ḇeḇeso ḇarpur ine, yamarisen kaku fararur yedi ḇe manfarandows ro sidang jemaat. Ine syowi ḇeba kaku kukro bisa yafnoḇek min Kristen yesya kuker samambraḇ yena kam. Imbape, barakas ḇeba syadi yasmai ya iso bisa yafarmyan ḇe Yahwe fnoḇek swa yedi ḇesoasuser ma ḇesawarwar warpu romawa nuswar kaku suya.

Yakofen kasumasa kaku kukro Yahwe imarisen fyarkor aya, snonggaku ḇefarkor mnis ḇa ine. (Yesaya 54:13) Yamarisen kaku wos ḇero Amsal 10:22 ḇekofen, ”Barakas ro Yahwe​—iso ḇefnai kona nana arasai.” Nggokame nggoḇekina oser ine nggowaf kaku ras ḇarpon iyama, fafisu nari nggofarkor roi nabor wer ḇekur Yahwe ma nggofarmyan ḇe I isof fyoro.