FARKARKOR 02

Refo Ikofenḇair Payamyum ro Ras Iyama Isya

Ḇesnai ra Syap

Ro supswan ine ḇesiper, samswen ḇekur snonggaku sya nafrur si fa sesneso, simgakwarek kenem sena, ma sidafduf. Waksmai samswen ḇeradirya ro fafisu oso kwar ke? Imbude bekandera kukro waduf oroḇaido snonggaku waswar ya ryoë. Mura kwara ḇo woḇe, ’Kenem ine na ryadine ker ke?’ Moḇ Refo kyarem fakfuken ine nafrur sneprei kaku dam.

1. Payamyum rosai Refo ikofen ḇe ko na?

Refo isya ikofenḇair roi ḇefrur fa supswan ine ifo kuker samswen. Imbape, Refo iser abar ḇepyum kako, isoine kero wer samswen ḇekur snonggaku koine nari napromes. Roi Refo ikofen nane nbuk ”payamyum ḇesnai ro fafisu iyama ma saneraro”. (Kowasya Yeremia 29:11, 12.) Kokyar na kada, nari kosambraḇ pdef ro samswen na, kona kakara ḇepyum, ma kosmai payamyum ḇekain fyoro.

2. Rosai Refo ikofen nari ḇerarirya ro ras iyama na?

Refo ya ikofen ḇo doḇe ro ras ḇarpon iyama nari ’marmar ya isya ḇa kwar; sne ḇefafardun, kankanes, roḇa dafduf naisya ḇa kako’. (Kowasya Fasasna [Wahyu] 21:4.) Baboine snonggaku sya sekandera kukro sna roi oḇa, sifrur pyum si ḇa, sidafduf, ma simar. Imbape meser iyama, samswen ḇeradine kam nari naisya wer ḇa. Refo ya doḇe snonggaku sya nari sismai kankenem fyoro ro Firdaus ro supswan ine.

3. Moḇsa na kokyar roi Refo ikofen na nari ndarirya kaku rai?

Snonggaku ḇebor simarisen sismai roi ḇepyum na, mboi sikyar manggun ḇa roi simarisen na bisa sismai na ke roḇa. Imbape, rosai Refo ikofen na nari ndarirya kaku. Insama kokyar kaku roi ine, kofarkor pyum Refo ya kada. (Farfyar [Kisah] 17:11) Wafarkor Refo ya kada, na insape manggun kwara bisa wakyar faro rosai Refo ikofen ḇekur ras ḇarpon iyama.

SWEWAR KAKU WER

Kokarapan rosai monda Refo ikofen nari ḇerarirya ro ras iyama na. Nari komam rariso snonggaku ḇero baboine sismai payamyum kwar ro Wos Refo ya.

Sonin: Roi ḇekur snonggaku ro baboine naḇese ro roi ḇepyum Refo ikofen nari ḇejadi ro ras ḇarpon iyama. Sonin nane nari naisya wer ro sop ya.

4. Refo doḇe nari kokenem fyoro ma kosmai kandera wer ḇa

Mam mnuk-mnuk ḇero Refo ro sop ine ḇeḇair ras ḇarpon iyama. Minsai wamarisen kaku ya? Rosai ḇefnai fa wamarisen na?

Kowasya mnuk-mnuk srir nane kwar ido, kawos fakfuken nane:

Fafisu wawasya mnuk-mnuk insanja, moḇsa ḇaḇir rai? Kwara ido, mnuk-mnuk anna bisa nbuk sneprei ḇe kina ma bati Besya ke?

Wawasen Ausya wakenem ro supswan ine fafisu

SNONGGAKU OSO ḆAḆERI NARI . . .	SNONGGAKU SYA NARI . . .
iduf, ḇye mansar binsar, ḇaido imar.—Yesaya 25:8.	sisrow kaḇer kuker snonggaku siswar kaku ḇemar kwar sya kukro nari sikḇok kaḇer fa sikenem ro supswan ine.—Yohanes 5:28, 29.
ismai dafduf ḇemarḇak ḇaido nya baken ḇemnis ḇa.—Yesaya 33:24; 35:5, 6.	siprei kaku ma sisambraḇ kaḇer raris roma inai babo.—Ayub 33:25.
sifrur pyum i ḇa.—Yesaya 32:16, 17.	sismai roḇean nabor, rum ḇepyum, ma fararur ḇeyun doryaḇ.—Mazmur 72:16; Yesaya 65:21, 22.
ḇyekandera kukro mamamun na.—Mazmur 46:9.	sikenem kuker marasrisen ma siknon.—Mazmur 37:11.
ḇyesanekar kukro kakara ḇesasar ḇaido iswarepen kaker roi ḇepyum ḇa ḇekur i na.—Yesaya 65:17.	sikenem fyoro ro supswan ḇefo kuker payamyum.—Mazmur 37:29.

Roma mgun oso randak ya iduf, mura iprei ma fyorepen snari.

Snon oso ḇyesinan kwar mboi byabo kaḇer ma dun gerobak ḇeser wei na.

5. Rosai Refo ikofen na nbuk payamyum ḇe ko ro fafisu ine kako

Snonggaku ḇebor sya sesanekar oroḇaido simsor kukro ras ḇe ras smam samswen na nabore. Sia sisewar marmar kaku insama roi nakam napyum syadi wer. Rwama komam fawar ḇefasnai rosai Refo ikofen kwar ḇekur ras ḇarpon iyama bisa nbuk payamyum ḇe ko ro fafisu ine kako. Komam VIDIO, raimnai kawos fakfuken suine.

VIDIO: Randakya Yamarisen Yapampum Ḇaḇenapnapesḇa Ya (4:07)

Sonin: Fasasnai ḇero vidio ’Randakya Yamarisen Yapampum Ḇaḇenapnapesḇa Ya’. 1. Fafisu Rafika byabo kaker, iryur kayam kapas fnoḇek min ḇeraker keret ḇyedi. 2. Rafika imarisen fafisu iso randak munara sarawrow ro Saksi-Saksi Yahwe ma myam snonggaku ḇeraker er ḇesisye sebati kayam.

Ro vidio ine, rosai Rafika myam ḇe roi ḇenapes ḇa?
Rafika ipok fa ipyos samswen anya ḇa, mboi rariso Wos Refo nbuk payamyum ḇe i rai?

Kokyar faro rosai Refo ikofen ḇekur ras ḇarpon iyama kada, nari koryaḇ pdef ḇo koḇesanekar ḇa fafisu kosmai samswen. Kowasya Amsal 17:22 ma Roma 12:12, raimnai kawos fakfuken ine:

Manggundaw wakyar roi Refo ikofen ḇekur ras ḇarpon iyama nbuk payamyum faro kenem Beja ro fafisu ine kako ke? Kwarem rarirya kukro?

SIA SOḆE: ”Roi Refo ikofen ḇekur ras ḇarpon iyama rya mafafu monda nairi ma nari ryarirya kaku ḇa.”

Kwara ido, rosai ḇefnai fa farkor kaku insama wafawi roi ḇefasnai wos ḇero Refo nama nkaku?

FARKARKOR ḆYENA

Refo doḇe ro ras ḇarpon iyama, roi ḇepyum nabor nari ndarirya. Kokyar roi nane kada, nari kosmai payamyum ro kenem koḇena ro fafisu ine kako.

Waswarepen Kaḇer

Rosai ḇefnai kaku fa snonggaku sya sakfawi payamyum nari Manseren Allah byuk ro ras iyama na?
Rosai Refo ikofen ḇekur ras ḇarpon iyama na?
Payamyum rosai wasmai ro fafisu ine kwar kukro wakyar faro rosai Refo ikofen ḇekur ras iyama?

Farkor ine fa wamnai ro tanggal:

Wafrur Roi Nane Wer

Insama wafawi pyum rosai Refo ikofen kwar na, wawasya kaḇer mnuk-mnuk ḇero farkarkor ine.

Ḇesena:

Roi ḇese na wafrur wer

SWEWAR NABOR WER

Mampan snonggaku ḇeduf marḇak sya sismai payamyum kwar kukro sikyar faro roi ḇepyum ro ras meser iyama.

”Refo ya Bisa Isaramper Ko Fafisu Kosmai Dafduf Ḇemarḇak Ke?” (Fasfas ro situs jw.org)

Fafisu mam vidio musik ine, wawasen Au ma kina Besya mgoisya mgokenem ro Firdaus imnis rosai Refo ikofen na.

Wawasen Fafisu Ani (3:37)

Mam moḇsariso snonggaku oso syewar kaku fa fyadwer dunya ine. Imboi ḇarpur mura, fyadwer kakara ḇyena fafisu fyawi roi Refo ikofen ḇekur ras ḇarpon iyama.

”Yakara fa Yafadwer Dunya Ine Wer Ḇa” (Syap Baryas 1 Juli 2013)