Fakfuken Ro Ḇewasya

’Rur ya bon ḇyena’ nama kyur monda ḇe rari-rari sap ro Galatia 5:22, 23 ke?

Mnuk ansuya suyapḇair rari risiw ḇeuser nane ḇe rur ya bon ḇyena, isoine ’saswar, raryaḇ, aski, ḇaḇekaḇaḇaḇ, ḇaḇenaḇye, ḇaḇesyowi, ḇaḇekakyar, ḇaḇerandun sne, ḇaḇefarmku mankun’. Mboi, na kokara ḇa Allah rur Ḇyedi ifnoḇek ko fa kona rari risiw ansine monda.

Kofawi na ro? Ro mnuk-mnuk ḇepon ya, Manwawan Paulus fyas, ”Fararur krafya . . . isoine: farbuk, mamas, rmomen, ḇaḇesyom amfyanir, mon, mbroḇ, fadḇan, masasor ro sne, msor, fandun mankun, rakrakrok, rur-makakok, ayin, masaser, munara marares, ma ḇese na.” (Gal. 5:19-21) Paulus dap ’fararur kraf ya’ kam ḇa. Paulus doḇe ”ma ḇese na”, raris neḇeyap kako ro Kolose 3:5. Rarirya kako, fafisu Paulus dapḇair rari risiw ro bon rur ḇesren ya, mnuk ḇe 23 doḇe, ”Roi ḇeradine sasoser oso isyaḇa faisampum na.” Inja rari ḇese naisya wer, mboi Paulus dapḇair kam ḇa rari na kona snar fafnoḇek ro Allah rur ḇesren Ḇyedi.

Insama kofawi pyum roi ine, kokara rur ḇesren bon ḇyena kuker sananai bon ḇyena. Paulus fyas ḇe sidang Efesus, ”Bon ro isnaiya isoine [ḇaḇesyowi] ma fararur ḇenapes ma ḇekaku faro Allah.” (Ef. 5: 8, 9) Inja, rari ”ḇaḇesyowi” ima bon ro sananai ya kako. Mboi, rari ine kako iso rur ḇesren bon ḇyenairi.

Oso wer, Paulus danun ḇe Timotius i fa syewar rari riwonem, isoine, napnapes, samsyom ḇe Allah, kakyar, saswar, farmkuepen, ma ḇaḇerandun sne. (1 Tim. 6:11) Mboi, rari rikyor monda kofawi ḇe bon rur ḇesren ya, isoine kakyar, saswar, ma ḇaḇerandun sne. Inja, Timotius imbe syewar fa fyasnai rari rikyor ḇese ḇedawer anna ido, fyandun kako fafnoḇek ro rur ḇesren.​—Mam kako Kolose 3:12; 2 Petrus 1:5-7.

Inja, Galatia 5:22, 23 dapḇair kam ḇa rari-rari fandun fa snonggaku Kristen sna na. Rur ḇesren na ifnoḇek ko fa kona rari risiw anna. Imbape, rur ḇesren ifnoḇek ko kako fa kofasnai rari ḇesena. Rarirya, koḇe snonggaku ḇemas ro rur ma ’kokenem babo, imnis raris Allah ifrur kwar ma marisen Ḇyedi isoine kankenem ḇenapes, ma ḇesren’.​—Ef. 4:24.