• Karajan Allah Ido Rosairirya?
    Wasmai Payamyum Ḇekain Fyoro!—Wafarkor Refo ya
    • Farkarkor 31. Yesus Kristus ḇye Raja ro nanggi ro ḇarpon Yahwe baba Ḇyena.

      FARKARKOR 31

      Karajan Allah Ido Rosairirya?

      Angginem ḇefandun kaku ro Wos Refo ya iso Karajan Allah. Roro Karajan ine, Yahwe nari ifrur marisen Ḇyena ro randak anya faro supswan ine fa ryarirya. Karajan Allah ine ido rosairirya? Rariso kofawi Karajan ine isya ḇyepoik ro fafisu ine kwar? Rosai Karajan ine ifrur kwar ya? Ma rosai nari ifrur wer ro fafisu iyama? Nari kofawi na ro farkarkor ine ma farkarkor ri suru ḇerama ya.

      1. Karajan Allah ido rosairirya, ma mansei na ḇepoik ḇe Raja ya?

      Karajan Allah iso pamarenta oso ma Allah Yahwe iso ḇefrur na. Yesus Kristus iso Raja ro Karajan ine ma ḇyeparenta ro nanggi mumfes. (Matius 4:17; Yohanes 18:36) Refo ya doḇe Yesus ’nari ḇyepoik ḇe Raja . . . isof fyoro-fyoro’. (Lukas 1:32, 33) Yesus nari ḇyepoik faro snonggaku ḇero supswan ine syakam.

      2. Yesus na ḇyepoik ro manggundi ke?

      Yesus na ḇyepoik ro manggundi ḇa. Snonggaku ḇeraker keret, wos, kawasa, ma er nakam nari sakḇe raja fnoḇek i fa sḇepoik supswan ine ḇesiper. (Fasasna 5:9, 10) Fafisu Yesus ryama ḇe supswan ine isof ro baboine, snonggaku ḇeso i sya seyuta kwar. Sikam na sḇepoik ḇe raja fnoḇek Yesus i ke? Oroḇa. Snonggaku ri 144.000 monda na ḇeyek ḇe nanggi fa sḇepoik kayam fnoḇek Yesus i. (Kowasya Fasasna 14:1-4.) Ḇape, Yesus manfamyan ḇese ḇyesya kam nari sḇe kawasa ro Karajan ani.​—Mazmur 37:29.

      3. Rosai ḇefrur fa Karajan Allah ipyum syadi ro snonggaku sya pamarenta sena?

      Snonggaku ḇena papoik sya sisewar fa sifrur roi ḇepyum, fama sna samambraḇ fa sifrur roi simarisen anna ḇa. Oso wer ido, snonggaku ḇepoik fadwer si imbude sfaḇri manggunsi ma simewer sifnoḇek kawasa sesya. Imbape ine iḇese ro Raja ḇepoik ro Allah Karajan Ḇyedine, Yesus i, ima na oso ḇaḇeri ḇeparenta fadwer i. Refo ya doḇe Allah ’ḇyawes karajan oso nari ḇepok ḇepromes ḇa’. (Daniel 2:44) Yesus nari ḇyepoik supswan ine ḇesiper, ma nari myamfarfir snonggaku sya ḇa. Ima isawarwar, ifrur pyum, ma inapes. Inari fyarkor kawasa ḇyesi kako fa sakfasnai saswar, frur pyum, ma nanapes.​—Kowasya Yesaya 11:9.

      SWEWAR KAKU WER

      Nari kawos roi ḇefrur fa Karajan Allah ine ipyum syadi ro snonggaku sya pamarenta sena kam.

      Yesus Kristus kyain ro karapesa ḇero nanggi bo ḇyepoik supswan ine. Ḇepoik kayam fnoḇek i sya skain ro ḇarpur. Yahwe sananai Ḇyedi isnaiser si.

      4. Karajan Allah nari ḇyepoik supswan ine ḇesiper

      Yesus Kristus nya papoik ḇeba syadi ro manḇepoik ḇesesya. Kowasya Matius 28:18, raimnai kawos fakfuken ine:

      • Rosai ḇefrur fa Yesus nya papoik ḇeba syadi ro manḇepoik snonggaku sya?

      Snonggaku sya pamarenta sena ro supswan ine nfadadwer ker, ma oser-oser sḇepoik ro moḇ oser monda. Mboi Karajan Allah ine ryariso? Kowasya Daniel 7:14, raimnai kawos fakfuken suine:

      • Karajan Allah nari ipok ipromes ḇa, inja kwara ido na kosmai payamyum ke?

      • Karajan Allah nari ḇyepoik supswan ine ḇesiper, inja kwara ido na kosmai payamyum ke?

      5. Karajan Allah nari ḇyepoik fadwer snonggaku sya pamarenta sena

      Rosai ḇefnai fa Karajan Allah nari ḇyepoik fadwer snonggaku sya pamarenta sena? Komam VIDIO, raimnai kawos fakfuken na.

      VIDIO: Karajan Allah Ido Rosairirya?—Ḇeknampu (1:41)

      • Rosai kawasa sya sismai ro pamarenta snonggaku dunya ine?

      Kowasya Pengkhotbah 8:9, raimnai kawos fakfuken ine:

      • Kwara ido, fandun fa Karajan Allah fyadwer snonggaku sya pamarenta sena ke? Kwarem rarirya kukro?

      6. Ḇepoik ro Allah Karajan Ḇyedi sima sifawi pyum ko

      Fafisu naiwara Raja koḇedi, Yesus i, dakkenem kwar ḇe snonggaku, inja ifawi pyum samswen koḇena. (Ibrani 4:15) Yahwe kyinfir snon ma bin ri 144.000 ’ḇeraker keret, wos, kawasa, ma er nakam’ fa sḇepoik kayam fnoḇek Yesus i.​—Fasasna 5:9.

      • Wakyar kaku Yesus ma ḇepoik kayam fnoḇek i sya na sifawi pyum roi kokara na ma samswen koḇena ke? Kwarem rarirya kukro?

      Snon ma bin ḇesmai ramrem kuker rur ḇesren sramaker moḇ ma fafisu ḇesisye.

      Yahwe kyinfir snon ma bin ḇeraker er nakam fa sepoik kayam fnoḇek Yesus i

      7. Karajan Allah sasoser ḇyena napyum syadi ro pamarenta snonggaku sya sasoser sena

      Snonggaku sya pamarenta sena sifrur sasoser fa nbuk payamyum ma nakadaunwarek kawasa sesya. Inja, Karajan Allah kako nya sasoser fa kawasa ḇyesya sisouser na. Kowasya 1 Korintus 6:9-11, raimnai kawos fakfuken nane:

      • Snonggaku sya sisouser pyum Allah sasoser Ḇyena ido, moḇsa kankenem ro dunya ine na isnai rai?a

      • Kwara ido, Manseren Allah dor faro kawasa ro Karajan Ḇyedi fa sisouser pyum sasoser Ḇyena, ine roi ḇepyum ke? Kwarem rarirya kukro?

      • Rosai ḇefnai fa kokyar snonggaku sya bisa sisouser pyum sasoser nane?​—Mam mnuk ḇe 11.

      Polisi lalu lintas byuk aḇyair insama oto ya imnai. Snonggaku sya bisa simbranuk sampak na.

      Snonggaku sya pamarenta sena sifrur sasoser fa nbuk payamyum ma nakadaunwarek kawasa sesya. Sasoser ro Karajan Allah napyum syadi kukro nbuk payamyum ma nakadaunwarek kawasa kam ḇero Karajan ani

      SIA SOḆE: ”Karajan Allah ima isya ro kosnesna.”

      • Moḇsa na kwarem rai?

      FARKARKOR ḆYENA

      Karajan Allah ima pamarenta ḇekaku ro nanggi ma nari ḇyepoik faro supswan ine ḇesiper.

      Waswarepen Kaḇer

      • Mansei monda ḇepoik ro Allah Karajan Ḇyedine?

      • Rosai ḇefrur fa Allah Karajan Ḇyedi ipyum syadi ro snonggaku dunya ine pamarenta sena?

      • Rosai Yahwe dor ro kawasa ro Karajan Ḇyedi fa sifrur ya?

      Wafrur Roi Nane Wer

      SWEWAR NABOR WER

      Rosai Yesus ikofen ḇekur moḇ nari Karajan Allah ḇyepoik ro ya?

      ”Karajan Allah Isya ro Kosnesna Ke?” (Fasfas ro situs jw.org)

      Allah Yahwe kyinfir snon ma bin ri 144.000 fa sḇepoik kayam fnoḇek Yesus i ro nanggi.

      ”Mansei Nari Ḇeyek ḇe Nanggi?” (Fasfas ro situs jw.org)

      Rosai ḇewar fa bin oso ḇero bui ikyar Manseren Allah derer monda iso na ḇebuk roi ḇenapes ro supswan ine?

      ”Insape Yafawi Mansei Na Ḇepyos Roi Ḇenapes Ḇa Na” (Syap Sedarlah! paik November 2011)

      a Sasoser ḇeḇeso nari insape kawos na ro Bar 3 ya.

  • Karajan Allah Isya Ḇyepoik Kwar!
    Wasmai Payamyum Ḇekain Fyoro!—Wafarkor Refo ya
    • Farkarkor 32. Yesus Kristus ḇye Raja ro nanggi bo duf angkyon ma ḇyepoik supswan ine ḇesiper.

      FARKARKOR 32

      Karajan Allah Isya Ḇyepoik Kwar!

      Karajan Allah irandak fa ḇyepoik ro nanggi ro taun 1914. Ro taun anya kako, koisya kokenem ro randak ras-ras ḇepupes faro snonggaku sya pamarenta sena. Kofawi na ro? Nari komam rosai Refo ikofen ḇepon kwar ma rosai ḇejadi ro dunya ine, ma snonggaku sya moḇ sikenem raya ro taun 1914 isof ro fafisu ine.

      1. Rosai Refo ikofen ḇepon kwar na?

      Syap Daniel ro Refo ikofenḇair ḇepon Karajan Allah nari irandak fa ḇyepoik ro papupes ”swaf fafisu ri fik”. (Daniel 4:16, 17) Taun ri utin nawas mura, Yesus dakkofen bo doḇe ”isof fafisu er ansi sedi imnis”. Roi dawos ine kyur faro swaf fafisu ri fik Daniel ikofen ḇepon anya. Inja kofawi rofyor Yesus ikenem ro supswan ine kaker, ”swaf fafisu ri fik” ine imnai ḇaime. (Lukas 21:24) Insape nari kofarkor fa komam swaf fafisu ri fik anya imnai ro taun 1914.

      2. Ro taun 1914 ḇe bo, rosai ḇejadi ya, ma moḇsa snonggaku sya kenem sena nasnai rai?

      Yesus manfamyan ḇyesi sifuken i bo soḇo, ”Aḇyair rosaiso ḇefasnai raramuma bedi ma aḇyair ḇefasna papupes supswan ya?” (Matius 24:3) Yesus kyarem fakfuken sena bo ikofenḇair roi nari ḇejadi rofyor irandak fa ḇyepoik ro nanggi ḇe Raja ro Allah Karajan Ḇyedi. Roi na ḇejadi ya iso mamamun, basbiser, ma tatawai. (Kowasya Matius 24:7.) Refo ya ikofenḇair ḇepon kwar snonggaku sya kenem sena ro ’ras-ras ḇepupes na’ moḇ nasnai raya. Refo ya doḇe kenem sena ”nari ndama kuker kandera nabor”. (2 Timotius 3:1-5) Roi ḇeḇesya anna ma snonggaku sya kenem sena nasnaibos kaku ro taun 1914 naiwara isof ro baboine.

      3. Rosai ḇefnai fa kenem ine naḇye ḇa syadi rofyor Karajan Allah ḇyepoik ro nanggi?

      Fyoro ḇa rofyor Yesus ḇye Raja ro Karajan Allah ro nanggi, myamunmun kuker Ibiris ma rur ḇeḇarḇor sya. Yesus kyafyo Ibiris i. Refo ya doḇe Ibiris ’ḇyeḇesawen fnoḇek malaikat ḇyesi ḇe supswan ine’. (Fasasna 12:9, 12) Ibiris imsor fafaya ḇa kukro ifawi kero wer nari imar isof fyoro-fyoro. Inja ifnai kandera nabor kaku ro supswan ine ḇesiper. Nane nafrur ko fa kofawi roi ḇefnai fa kenem ro dunya ine naḇye ḇa syadi! Kero wer, nari Karajan Allah ipyos samswen nane kam.

      SWEWAR KAKU WER

      Nari kawos moḇsa kofawi Karajan ani irandak fa ḇyepoik ro taun 1914 ma nari kawos rariso kofasnai kokyar kaku Karajan ani isya ḇyepoik kwar.

      4. Ḇardadi ro Refo ḇekurfasnai ḇe taun 1914

      Komam VIDIO.

      VIDIO: Karajan Allah Irandak fa Ḇyepoik ro Taun 1914 (5:02)

      Manseren Allah ḇye Raja Nebukhadnezar ḇepoik ro sup Babilon ḇepon iwara fa ismai mafu. Ro mafu ḇyena, Allah fyasnai ḇeri rosai nari ḇejadi ro ras-ras ḇerama na. Kowasya ro Refo ya kada, na kofawi mafu ani ma moḇ Daniel ḇyeḇair mafu ani. Komam snai kaku mafu ani kyur ḇe Nebukhadnezar Karajan ḇyedi ma Manseren Allah Karajan Ḇyedi kako.​—Kowasya Daniel 4:17.a

      Kowasya Daniel 4:20-26, raimnai mam ro sonin na fa kwarem fakfuken nane:

      • (A) Rosai Nebukhadnezar myam ro mafu ḇyeja?​—Mam mnuk ḇe 20 ma 21.

      • (B) Rosai sifrur faro ai knam ani?​—Mam mnuk ḇe 23.

      • (C) Ro papupes ”swaf fafisu ri fik” anya, rosai na ḇejadi ya?​—Mam mnuk ḇe 26.

      Mafafu Ḇekur Ai Knam Ani Nya Fasfes kuker Karajan Allah

      ḆARDADI (Daniel 4:20-36)

      Karajan ani ḇyepoik

      (A) Ai knam ḇeba

      Ai knam ḇeba ma ḇekaki kaku.

      Karajan ani imnai

      (B) ”Kwar ai knam ani” ma ḇe na fa nbarek isof ro ”swaf fafisu ri fik”

      Sfes ai knam ani knam ḇyeja kuker manggarmom ma sarak.

      Karajan ani ḇyepoik wer

      (C) ”Nari ḇepoik kaḇer”

      Ai knam ḇeba ma ḇekaki kaku.

      Ḇardadi ine ryarirya ro nyan ḇerandak . . .

      • (D) Ai knam ani kyur ḇe mansei?​—Mam mnuk ḇe 22.

      • (E) Fafisu risai imnai fa ḇyepoik?​—Kowasya Daniel 4:29-33.

      • (F) Ro papupes ”swaf fafisu ri fik” anya, rosai ḇejadi faro Nebukhadnezar i?​—Kowasya Daniel 4:34-36.

      RYARIRYA RO NYAN ḆERANDAK

      Karajan ani ḇyepoik

      (D) Nebukhadnezar, Raja ḇeraker sup Babilon

      Raja Nebukhadnezar dores bo fyasnai ararer ḇyena.

      Karajan ani imnai

      (E) Taun 606 MḆ nawas mura, Nebukhadnezar syawo, inja jadi fa ḇyepoik ro swaf taun ri fik ḇa

      Nebukhadnezar kyain dan abris raris aiwan sya.

      Karajan ani ḇyepoik wer

      (F) Nebukhadnezar swaruser ḇyena namnis kaḇer ma irandak fa ḇyepoik wer

      Raja Nebukhadnezar myam ḇe bo ma ikanow bramin ḇyeja.

      Ḇardadi ine ryarirya ro nyan ḇesuru . . .

      • (G) Ai knam ani kyur ḇe mansei?​—Kowasya 1 Tawarikh 29:23.

      • (H) Fafisu risai simnai fa sḇepoik? Rariso kofawi sḇepoik ḇaim kaker fafisu Yesus isya ryo supswan ine?​—Kowasya Lukas 21:24.

      • (I) Ro fafisu risai ma ro moḇ risaiso Karajan ani ḇyepoik ya?

      RYARIRYA RO NYAN ḆESURU

      Karajan ani ḇyepoik

      (G) Raja-raja ḇero sup Israel sḇefaker faro Allah pamarenta Ḇyedi

      Syos ro raja-raja ḇepoik ro sup Israel. Sananai ya isnaiyar si.

      Karajan ani imnai

      (H) Simkok Yerusalem, raja-raja ḇero sup Israel sḇepoik wer ḇa ro swaf taun ri 2.520

      For ya ikunpres Yerusalem ḇero fafisu naiwara ro taun 607 MḆ. Raimnai swaf taun ri 2.520 nawase.

      Karajan ani ḇyepoik wer

      (I) Yesus irandak fa ḇyepoik ro nanggi ḇe Raja ro Karajan Allah

      Yesus ḇyepoik ro nanggi mumfes ḇe supswan ine ro taun 1914 M. Sananai ya isnaiyar i.

      ”Swaf fafisu ri fik” ine kawanwan ya ḇyefis?

      Syap ono ro Refo nafnoḇek ko fa kofawi pyum syap-syap ḇesena. Rupa ra, syap Fasasna isya dap swaf fafisu ri kyor warpu munya. Kawanwan ro fafisu ine iso ras ri 1.260. (Fasasna 12:6, 14) Inja, imbe kosrow barbor ro ”swaf fafisu ri fik” anya ido, kokor monda barbor ine rarwan ri suru. Kokor na rarwan ri suru ido, na kosrow ras ri 2.520. Nano ido, Refo dap taun ri oser ḇe ras oser monda. (Yehezkiel 4:6) Inja, kofawi ”swaf fafisu ri fik” sap ro syap Daniel anya, kawanwan ya iso swaf taun ri 2.520.

      5. Kenem ro dunya ine nfadwer kwar ro taun 1914

      Komam VIDIO.

      VIDIO: Kenem ro Dunya Ine Nfadwer Kwar ro Taun 1914 (1:10)

      Yesus ikofen ḇepon kwar roi nari ḇejadi fafisu ḇyepoik ḇe Raja kwar. Kowasya Lukas 21:9-11, raimnai kawos fakfuken ine:

      • Mam ro dunya ine kada, rosai ḇejadi kwar raris Yesus ikofen ḇepon kwar na?

      Manwawan Paulus fyasnaiḇair snonggaku sya kenem sena ro ras-ras ḇepupes ro snonggaku sya pamarenta sena. Kowasya 2 Timotius 3:1-5, raimnai kawos fakfuken ine:

      • Raris rosai mnuk ine ikofen ya, snonggaku sya moḇsa kenem sena nasnai rai?

      Sonin: Sonin ḇefasnai roi ḇejadi ro supswan ine ma snonggaku sya kenem sena ro ras-ras ḇepupes. 1. Mananir sordade dores ro panggung ma ikanow bramin ḇyedi bo dar naba. 2. Tatawai nafrur fa aidrom na namkok. 3. Udara sbukimamun. 4. Snonggaku ḇebor sepake masker rofyor simbran ro bandi. 5. Menara Kembar ḇero New York sunanem fafisu ḇemamun sya smun kanandor na. 6. Snon oso ḇyepake narkoba. 7. Snon oso imbe ikuk swari ma ifyow i. 8. Narkoba ma aninem swan na. 9. Bin ri suru ḇefamanggor syadi su suḇefoto manggunsu. 10. Snon oso sor ḇe DJ ifnak pyan musik na ḇe kawasa sya. 11. Snon oso isawen bom Molotov fa ifrur napnap moḇ ya.

      6. Kofasnai kaku koma kokyar Karajan Allah isya ḇyepoik kwar

      Kowasya Matius 24:3, 14, raimnai kawos fakfuken suine:

      • Fararur ḇefandun rosaiso na ḇefasnai Karajan Allah isya ḇyepoik kwar?

      • Moḇsa na wakso ro fararur ine rai?

      Karajan Allah isya ḇyepoik kaku kwar, ma kero wer nari ḇyepoik kaku supswan ine. Kowasya Ibrani 10:24, 25, raimnai kawos fakfuken ine:

      • Rosai ko oser-oser na kofrur kaku snar kofawi kero wer Yahwe ras Ḇyedi ryama?

      Sonin: 1. Bin oso ḇefarkor Refo dakso Saksi-Saksi Yahwe sya fananjur ari sena. 2. Bin ḇefarkor Refo ani byaryas ḇe bati ḇyedi.

      Wafawi kwar roi nari ḇefrur fa snonggaku ḇesesya siḇye ido, rosai na wafrur ya?

      SIA SIFUKEN AU RADINE: ”Rosai ḇefnai fa Saksi-Saksi Yahwe soḇe taun 1914 ima taun ḇefandun kaku?”

      • Moḇsa na kwarem si rai?

      FARKARKOR ḆYENA

      Ḇardadi ro Refo, ma roi ḇejadi ro dunya ine, nfasnai kaku Karajan Allah isya ḇyepoik kwar. Kofasnai koma kokyar Karajan Allah isya ḇyepoik kwar kuker kokofenḇair na ḇe snonggaku ḇesesya ma komyaren koso ro fananjur ari koḇena.

      Waswarepen Kaḇer

      • Raris ḇardadi ḇero syap Daniel, rosai na ḇejadi ro papupes ”swaf fafisu ri fik” ya?

      • Rosai ḇefrur fa wakyar Karajan Allah irandak fa ḇyepoik ro taun 1914 ya?

      • Moḇsa na wakfasnai wakyar Karajan Allah isya ḇyepoik kwar?

      Wafrur Roi Nane Wer

      SWEWAR NABOR WER

      Snon oso fyadwer kenem ḇyedi rofyor ifawi ḇardadi ro Matius 24:14.

      ”Yaswar Syadi Kaku Farfnak Bisbol ro Roi Nakam!” (Syap Baryas No. 3 2017)

      Rariso kofawi ḇardadi ḇero Daniel fasal 4 nya fasfes kuker Karajan Allah rai?

      ”Fafisu Risai Karajan Allah Irandak fa Ḇyepoik ya? (Bar 1)” (Syap Baryas 1 Oktober 2014)

      Rosai ḇefasnai ”swaf fafisu ri fik” sap ro Daniel fasal 4 imnai ro taun 1914 ya?

      ”Fafisu Risai Karajan Allah Irandak fa Ḇyepoik ya? (Bar 2)” (Syap Baryas 1 November 2014)

      a Mam awawos ri suru ro bar Swewar Nabor Wer ḇero farkarkor ine.

  • Rosai Nari Karajan Allah Ifrur ya?
    Wasmai Payamyum Ḇekain Fyoro!—Wafarkor Refo ya
    • Farkarkor 33. Snonggaku sya sikenem ro firdaus ro supswan ine.

      FARKARKOR 33

      Rosai Nari Karajan Allah Ifrur ya?

      Karajan Allah isya ḇyepoik kwar. Inja, kero wer nari fyadwer kaku kenem ḇeḇye ḇa ro supswan ine. Rwama kawos roi ḇepyum nari Karajan Allah ifrur ya.

      1. Rosai nari Karajan Allah ifrur insama sifrur pyum snonggaku sya ma skain kuker payamyum?

      Raja ḇepoik ro Allah Karajan Ḇyedi, Yesus i, nari myunpres snonggaku ma pamarenta ḇeḇarḇor sya ro ras mamun Armagedon. (Fasasna 16:14, 16) Ro swaf anya, asas sfas ro Refo ine nari ryarirya kaku, doḇe, ”Kero wer, snonggaku ḇeḇarḇor sya nari sisya wer ḇa.” (Mazmur 37:10) Roro Karajan ine, nari Yesus myam kaku insama sifrur pyum snonggaku ro supswan ine syakam ma skain kuker payamyum.​—Kowasya Yesaya 11:4.

      2. Fafisu Manseren Allah marisen Ḇyena nejadi ro supswan ine kwar ido, snonggaku sya kenem sena na ryariso?

      Mansei nari ḇekenem ro Allah Karajan Ḇyedine? Refo ya doḇe, ”Snonggaku ḇenapes siso nari ḇena supswan, ma nari sḇarek ro na isof fyoro-fyoro.” (Mazmur 37:29) Kowasen pan koisya kokenem ro supswan ine, mboi snonggaku syakam sifrur roi ḇenapes, siswar Yahwe I ma siswar min sesi! Oso ḇaḇeri nari iduf, ma sikame sikenem isof fyoro-fyoro.

      3. Fafisu snonggaku ḇeḇarḇor sya simar fa sibro kwar, rosai nari Karajan Allah ifrur wer?

      Fafisu snonggaku ḇeḇarḇor sya simar kwar mura, Yesus nari ḇyepoik ḇe Raja ro swaf taun ri 1.000. Ro swaf anya, Yesus ma ḇepoik kayam fnoḇek i eḇe 144.000 ansi, nari sifnoḇek kawasa sya fa sna kenem ḇe snonggaku ḇemnis kaku. Ro papupes taun syaran oser ani, nari supswan ine ḇye firdaus kaḇer wer, ma snonggaku sya nari simarisen kukro sisouser Yahwe parenta Ḇyena kwar. Raimnai, Yesus byuk kaḇer Karajan ani ḇe Kmari, Yahwe I. Rarirya, Yahwe snonsnon Ḇyedi nari isren. (Matius 6:9, 10) Roi nane nfasnaiḇair Yahwe ima Manḇepoik ḇepyum kaku ma ima iswar kawasa Ḇyesi. Yahwe nari myunpres Ibiris i, rur ḇeḇarḇor sya, ma mansei monda ḇepampum moḇ ḇyepoik raya. (Fasasna 20:7-10) Payamyum ḇerama ro Karajan Allah ine nari nakain fyoro-fyoro.

      SWEWAR KAKU WER

      Nari kawos roi ḇefrur fa kokyar Manseren Allah nari ḇye Karajan Ḇyedi fa ifrur asas ḇekur fafisu iyama fa ryarirya kaku.

      4. Karajan Allah nari ḇye snonggaku sya pamarenta sena fa simnai sḇepoik

      ”Snonggaku sḇepoik snonggaku isof sismai kandera ro manggunsi.” (Pengkhotbah 8:9) Snonggaku sya pamarenta sena sifrur pyum kawasa sesya ḇa. Inja, Yahwe nari ḇye Karajan Ḇyedi fa dores bo ḇye si fa simnai separenta.

      Kowasya Daniel 2:44 ma 2 Tesalonika 1:6-8, raimnai kawos fakfuken suine:

      • Rosai nari Yahwe ma Yesus sufrur faro manḇepoik snonggaku ma ḇesaramper si sya?

      • Moḇsa mam roi Yahwe ma Yesus sufrur anna rai?

      Yesus ḇye Raja ro nanggi fa ḇyepoik supswan ḇe firdaus kwar.

      5. Yesus ima Raja ḇesrow kaku

      Yesus iso Raja ḇepoik ro Karajan Allah ma nari dun payamyum nabor kaku faro kawasa ḇyesi ro supswan ine. Komam VIDIO fa kofawi moḇsa Yesus fyasnai ḇepon kwar ima imarisen isaramper snonggaku koine ma Manseren Allah byuk papoik ḇe i kwar fa isaramper ko.

      VIDIO: Yesus Fyasnai Rosai Nari Karajan Allah Ifrur ya (1:13)

      Fafisu Yesus isya ryo supswan ine, fyasnai ḇepon kwar rosai nari Karajan Allah ifrur ya. Roi ḇepyum sfas ro mnuk-mnuk ḇerama nane, minsai wamarisen syadi fa mam na? Kowasya mnuk-mnuk ḇekofenḇair roi ḇepyum anna.

      FAFISU YESUS ISYA RYO SUPSWAN INE . . .

      YESUS ḆYEPOIK RO NANGGI BO NARI . . .

      • ḇye wam doḇer ya fa ibrin.​—Markus 4:36-41.

      • ifrur supswan ine fa ipyum kaḇer.​—Yesaya 35:1, 2.

      • ifrur mujisat fa fyan snonggaku syaran.​—Matius 14:17-21.

      • ipyos basbiser ro supswan ine ḇesiper.​—Mazmur 72:16.

      • byuk pararei faro snonggaku ḇebor ḇeduf sya.​—Lukas 18:35-43.

      • myam kaku insama snonggaku sya siduf wer ḇa.​—Yesaya 33:24.

      • ḇyawes snonggaku ḇemar sya fa sikenem kaḇer.​—Lukas 8:49-55.

      • ḇyawes snonggaku ḇemar sya ma ipyos marmar ya.​—Fasasna 21:3, 4.

      6. Karajan Allah nari dun payamyum ro ras iyama

      Karajan Allah nari dun payamyum faro snonggaku sya raris Yahwe marisen Ḇyena ro randak ya. Nari sikenem isof fyoro-fyoro ro firdaus ro supswan ine. Komam VIDIO fa kofawi rariso Yahwe ḇye Roma Ḇyedi, Yesus i, fa ifrur marisen Ḇyena ryarirya.

      VIDIO: Fasasnai Ḇepon ro Roi Ḇepyum ḇero Fafisu Iyama (4:38)

      Kowasya Mazmur 145:16, raimnai kawos fakfuken ine:

      • Moḇsa ḇaḇir rai snar wafawi Yahwe nari myam fa roi ḇekenem syakam sismai rosai simarisen na?

      SIA SOḆE: ”Koḇeoser ma kofararur kayam mande, na kofrur samswen ro dunya ine fa namnai.”

      • Samswen rosai nari Karajan Allah ifrur na fa namnis?

      FARKARKOR ḆYENA

      Karajan Allah nari ifrur Allah marisen Ḇyena fa ndarirya. Karajan ani nari fyadwer supswan ine ḇe firdaus ma snonggaku ḇeḇarek ro diansya nari sisyom Yahwe I isof fyoro-fyoro.

      Waswarepen Kaḇer

      • Rariso Karajan Allah nari fyasren snonsnon Yahwe rai?

      • Rosai ḇefrur fa kokyar Karajan Allah nari ifrur asas ḇero Refo na fa ndarirya?

      • Ro roi ḇepyum nari Karajan Allah ifrur na, minsai wamarisen syadi fa mam na?

      Wafrur Roi Nane Wer

      SWEWAR NABOR WER

      Wawasya fa wafawi knam kaku ro wos ”Armagedon” ya.

      ”Rosai Sor ḇe Mamun Armagedon ya?” (Fasfas ro situs jw.org)

      Mam rariso kina oso siwasen mura ḇe roi ḇepyum nari sismai ro Firdaus ya.

      Mkowasen Mkoisya ro Firdaus (1:50)

      Snon oso nya fakfuken nabor ro kenem ḇyedi ma ima pyampum kaku pamarenta sya, mboi ḇarpur mura ismai roi syewar kaku na.

      ”Refo Fyadwer Kankenem” (Syap Baryas 1 Januari 2012)