FARKARKOR 14
Rosai Na Kofrur Kaku Insama Manseren Allah Imarisen faro Samsyom Koḇena?
Raris kawos kwar ro farkarkor ḇepon ya, Manseren Allah imarisen faro agama nakam ḇa. Imbape, bisa kosyom I kuker nyan ḇepyum insama imarisen. Inja, ”ḇaḇeari ḇekaku” minsaiso Manseren Allah imarisen ya? (Yakobus 1:27) Na komam rosai Refo ikofen na.
1. Moḇsa na kofawi Manseren Allah imarisen faro samsyom koḇena rai?
Samsyom koḇena neknam ro Wos Refo ya kada. Yesus ḇyenadi bo ikofen faro Manseren Allah radine, ”Wos bedi kada [kakaku] rirya.” (Yohanes 17:17) Agama ḇebor spampum farkarkor ḇekaku ro Refo ya. Sfadwer na kuker farkarkor ḇerama ro snonggaku ma adat sena. Imbape, Manseren Allah imarisen ḇa faro snonggaku ḇesawen parenta Ḇyena. (Kowasya Markus 7:9.) Inja, samsyom koḇena neknam ro Wos Refo ma koso pyum Yahwe wos anun Ḇyena kada, nari imarisen.
2. Moḇsariso kosyom Yahwe I rai?
Kobuk samsyom koḇena ḇe Allah Yahwe I monda kukro iso ḇefrur ko. (Fasasna 4:11) Moḇsariso kofrur na rai? Fandun fa koswar kaku Yahwe I ma kosyom I monda. Kun awer amfyanir ro samsyom koḇena fa kobukisyom I.—Kowasya Yesaya 42:8.
Komam pyum samsyom koḇena ḇe Yahwe I fa nasren ma nafrur fa imarisen. (Roma 12:1) Kofrur roi ine kuker kokenem raris moḇ dor fa kokenem raya. Raris kofawi kwar, snonggaku ḇeswar Yahwe I sya, nari sesyowi ma sisouser parenta Ḇyena ḇekur farḇakḇuk ya. Ono wer ido, na sḇinggwanbur roi ḇeḇye ḇa raris anan tabaku, anan ropum ḇaido farandinem swan.a
3. Rosai ḇefnai fa kosyom Yahwe I warpu snonggaku ḇena kakyar oser kuker ko?
Fananjur ari koso ro minggu nakam nbuk swaf ḇe ko fa kosandik Yahwe I ro sidang jemaat. (Mazmur 111:1, 2) Ro fananjur ine, na kodisen dow fa koksandik Allah. (Kowasya Mazmur 104:33.) Yahwe dor ko fa koso fananjur ari ya kukro iswar ko ma ifawi kofrur roi nane ido, nari kosmai payamyum ḇekain fyoro. Ro fananjur ari ya, na kofrur fa ḇesesya sisambraḇ, ma sakfrur fa kosambraḇ kako.
SWEWAR KAKU WER
Nari kofarkor roi ḇefnai fa Yahwe imewer kun amfyanir ro samsyom koḇena. Na kofarkor kako nyan ḇepyum fa kobukisandik I.
4. Kun amfyanir ro samsyom koḇena awer
Manseren Allah imewer kun amfyanir ro samsyom koḇena. Kofawi na ro? Komam VIDIO, raimnai kawos fakfuken ine.
Ro fafisu naiwara, rosai ḇejadi ya rofyor Allah kawasa Ḇyesi ono sisya sun amfyanir fa sbukisyom I?
Sia sun amfyanir ro samsyom sena kukro skara na nasaramper si fa sfanam faro Manseren Allah. Ḇape ḇekaku ya, roi nane nafrur fa Manseren Allah ḇyinggwanbur si. Kowasya Keluaran 20:4-6 ma Mazmur 106:35, 36, raimnai kawos fakfuken nane:
Mam ido, amfyanir rosai monda snonggaku sya sun ro samsyom sena?
Moḇsa Yahwe myam snonggaku ḇeyun amfyanir ro samsyom sena rai?
Kwara ido, kun amfyanir ro samsyom koḇena ima ipyum ke? Kwarem rarirya kukro?
5. Kosyom Yahwe I monda kada nari komkei ro farkarkor ḇekaku ḇa na
Mampan moḇ kosyom Yahwe I ro nyan ḇekaku ya, nari imkei ko ro farkarkor ḇekaku ḇa na. Komam VIDIO.
Kowasya Mazmur 91:14, raimnai kawos fakfuken ine:
Kofasnai saswar faro Yahwe I kuker kosyom I monda ido, rosai nari ifrur yoḇ ko?
6. Kosyom Manseren Allah ro fananjur ari
Kosandik Yahwe I ma kosambraḇser ḇesesya kuker kodisen ma kobuk kankarem ro fananjur ari ya. Kowasya Mazmur 22:22, raimnai kawos fakfuken suine:
Wasmai payamyum rofyor rwower pyum kankarem sbuk ro fananjur ari ya ke?
Wamarisen fa wakbuk kankarem kako ke?
7. Yahwe imarisen kofawar roi kofarkor kwar na faro ḇesesya
Nyan nabor naisya fa kofawar kakaku ro Wos Refo faro snonggaku ḇese. Kowasya Mazmur 9:1 ma 34:1, raimnai kawos fakfuken ine:
Roi risai wafarkor kwar ro Refo fa imbe wakfawar na ḇe snonggaku ḇesesya?
SIA SOḆE: ”Koro agama risai monda sasar oḇa, kukro Manseren myam kosnesna.”
Moḇsa wakkara roi ine rai?
FARKARKOR ḆYENA
Kofrur fa Manseren Allah ḇefrur konya imarisen kuker kosyom I monda, kosandik I ro fananjur, ma kofawar roi kofarkor kwar na faro snonggaku ḇesesya.
Waswarepen Kaḇer
Moḇsa na kofawi Manseren Allah imarisen faro samsyom koḇena rai?
Rosai ḇefnai fa kosyom Allah Yahwe I monda?
Rosai ḇefnai fa kosyom Yahwe I warpu snonggaku ḇena kakyar oser kuker ko?
SWEWAR NABOR WER
Wawasya fawar ḇesaramper Au fa wamarisen wakbuk kankarem ro fananjur ari.
”Kosandik Yahwe ro Fananjur Koḇedi” (Syap Baryas paik Januari 2019)
Snonkbor oso samswen fa iso fananjur ari ya. Ḇape syewar kaku fa iso na pdef, inja ismai payamyum.
Snonggaku ḇebor sya soḇe aprop ima ḇyeḇair ḇe snonggaku Kristen, inja na kun aprop ro samsyom koḇena ke?
”Rosai Ḇefnai fa Saksi Yahwe Sima Sakkuf Aprop ro Samsyom Sena Ḇa?” (Fasfas ro situs jw.org)
a Nari insape kofarkor roi nane ro farkarkor ḇerama ya.