FARKARKOR 25
Rosai Eḇewari Allah Ifrur Ko fa Kokenem ro Supswan Ine?
Refo ya doḇe snonggaku koine kankenem koḇena ’nakwan ḇa ma nafo kuker kandera’. (Ayub 14:1) Manseren Allah imarisen kenem koḇena ryadine ke? Imewer koḇeradine ido, rosai imarisen kaku fa kosmai ya? Roi imarisen fa kosmai na nari nejadi kaku ke? Komam kankarem ro Refo ḇebuk sneprei ḇe ko.
1. Kankenem ḇerariso Yahwe imarisen fa kosmai ya?
Yahwe imarisen insama kosmai payamyum kaku ro kenem koḇena. Fafisu ifrur sinan ḇepon koḇesu, Adam ma Eva su, ryir su fa suḇarek ro moḇ ḇepyum kaku sor ḇe Yaf Eden. Mura, Refo ya doḇe, ”Allah ḇyebarakas su, ma dawos yoḇ su: ’Mukapar romawa kpu sya fa sibor syadi insama supswan ine ifo ma mgoḇepoik na.’” (Kejadian 1:28) Yahwe imarisen insama suna romawa, mura sifrur supswan ine ḇesiper ḇe firdaus, ma smamwarek aiwan sya. Yahwe imarisen snonggaku syakam sismai payamyum kaku ro kenem sena isof fyoro-fyoro.
Kankenem ḇepyum kaku Manseren Allah imarisen anna nejadi ro kenem koḇena ro baboine ḇa,a ḇape imarisen kaker fa kosmai kankenem anya. (Yesaya 46:10, 11) Imarisen snonggaku ḇesouser sya sismai payamyum ro kenem sena isof fyoro-fyoro.—Kowasya Fasasna 21:3, 4.
2. Rosai na kofrur fa kosmai payamyum ro kenem koḇena ro fafisu ine?
Snonggaku koine kofandun kaku Yahwe farkankin Ḇyena, kukro moḇ Yahwe ifrur snonggaku koine ryariri. Iso ḇefnai fa komarisen kofawi pyum I ma kosyom I. (Kowasya Matius 5:3-6.) Imarisen fa kofanam yoḇ I, koso nyan Ḇyena, koswar I ma kofarmyan faro I kuker sne ḇesiper. (Ulangan 10:12; Mazmur 25:14) Kofrur na ro fafisu ine kada, samswen kyur ko rariryano, nari koryaḇ monda. Kofarmyan faro Yahwe kada, na komarisen kaku kukro kofawi kofrur rosai imarisen na ro kenem koḇena kwar.
SWEWAR KAKU WER
Nari kawos rariso Yahwe fyasnai saswar ḇeba kaku fafisu fyasos supswan faro snonggaku koine. Ma nari kawos roi ḇefnai fa Yahwe ifrur ko fa kokenem ro supswan ine.
3. Yahwe imarisen snonggaku koine kenem koḇena napyum kaku
Komam VIDIO, raimnai kawos fakfuken ine.
Rosai ḇefnai fa Manseren Allah ifrur supswan ine fa ipyum kaku?
Kowasya Pengkhotbah 3:11, raimnai kawos fakfuken ine:
Raris mnuk ine, rosai Yahwe imarisen fa kosmai ya?
4. Roi Yahwe imarisen fa kosmai ya nfadwer ḇa
Kowasya Mazmur 37:11, 29 ma Yesaya 55:11, raimnai kawos fakfuken ine:
Rariso kofawi roi Yahwe imarisen fa kosmai ya nfadwer ḇa rai?
Rum oso naḇye ḇa kwar ido, bisa sifrur na fa napyum kaḇer. Supswan ine kako snonggaku sya sifrur na fa naḇye ḇa kwar, mboi nari Manseren Allah ifrur na fa napyum kaḇer ma byuk na faro snonggaku ḇeswar I sya
5. Kofarmyan faro Yahwe I, dun marisen ḇekaku ro kenem ine
Kofawi roi eḇewari Manseren Allah ifrur ko fa kokenem ro supswan ine kada, nari komarisen kaku. Komam VIDIO, raimnai kawos fakfuken ine.
Fafisu Terumi ifawi roi ḇefnai fa Allah ifrur ko fa kokenem ine, payamyum rosai ismai ya?
Kowasya Pengkhotbah 12:13, raimnai kawos fakfuken ine:
Yahwe ifrur roi nabor ḇe ko kwar, inja moḇsa kofasnai kasumasa faro I rai?
SIA SIFUKEN AU RADINE: ”Rosai na kofrur kaku insama kosmai marisen ro kenem ine?”
Moḇsa na kwarem si rai?
FARKARKOR ḆYENA
Yahwe imarisen insama kosmai payamyum kaku ro kenem koḇena ro supswan ine isof fyoro-fyoro. Kofarmyan faro I kuker sne ḇesiper kada, nari kosmai marisen ḇekaku ro kenem koḇena ro fafisu ine kako.
Waswarepen Kaḇer
Rosai Yahwe imarisen fa Adam ma Eva susmai ro randak ya?
Rariso kofawi roi Yahwe imarisen fa snonggaku koine kosmai na nfadwer ḇa rai?
Rosai na kofrur kaku insama kosmai marisen ḇekaku ro kenem koḇena?
SWEWAR NABOR WER
Wawasya roi ine fa wafawi roi ḇefrur fa kokyar supswan ine na kyain isof fyoro.
Refo fyasnaiḇair roi eḇewari Allah ifrur ko fa kokenem ine.
”Rosai Ḇefnai Kaku fa Kokenem Ine?” (Fasfas ro situs jw.org)
Mam moḇsa snon oso insape ismai roi syewar kaku ro kenem ine.
a Ro farkarkor ḇerama ya, insape nari wafawi roi ḇefnai fa kankenem koḇena nejadi raris moḇ Allah imarisen ro randak ya ḇa.