Fafisu Komar ya Na Moḇsa Koḇerai?

Ras oso kwanes kukro snonggaku waswar ya ryoë ke? Ro fafisu anya, imbude na wafuken radine: ’Fafisu komar ya na moḇsa koḇerai? Snonggaku koswar sya simar sibur ko kwar, mboi bisa kosrow kaḇer kuker si wer ke?’ Ro farkarkor ine ma farkarkor ḇerama ya, nari komam roi Refo ikofen na. Roi Refo ikofen nane nbuk sneprei ḇe ko.

1. Fafisu komar ya na moḇsa koḇerai?

Yesus doḇe snonggaku ḇemar kwar ima imnis snonggaku ḇeyenef moser kaku. Yesus ikofen radine kukro? Snonggaku ḇeyenef moser na ifawi roi oḇa. Imnis rarirya, snonggaku oso imar kwar ido, na ifawi ḇa isya ḇyekandera ke idufe. Refo ya doḇe, ”Snonggaku ḇemar sya sifawi roi oḇaḇeri.”​—Kowasya Pengkhotbah 9:5.

2. Payamyum rosai na kosmai snar kofawi roi Refo ikofen ḇekur snonggaku ḇemar sya?

Snonggaku ḇebor sya simgak faro marmar ya, imboi simgak syadi snonggaku ḇemar sya. Imbape, wafawi rosai Refo ikofen kaku ḇekur snonggaku ḇemar sya ido, nari wasmai sneprei kaku. Yesus doḇe, ”[Kakaku ya] nari ḇyuk ḇaḇemkei faro mko.” (Yohanes 8:32) Agama ḇebor sya soḇe rofyor snonggaku oso imar, roi ono ro snonggaku ani nari ikenem pdef. Ḇape, Refo dakkofen roi ḇerarirya na ḇa. Inja kofawi snonggaku ḇemar sya na sekandera ḇaḇeri. Oso wer ido, sima sifawi roi oḇa, inja na sifrur susa ko ḇa. Rarirya, kopok kosyom awer snonggaku ḇemar kwar sya. Oroḇa ido kofrur roi ono faro si awer kukro komgak nari simsor ko.

Sia sisya soḇe bisa sawos kuker snonggaku ḇemar kwar sya. Ḇape roi ine kyaku ḇa. Kofawi kwar snonggaku ḇemar sya sifawi roi oḇaḇeri. Ḇekaku ya, snonggaku ḇeyoḇe dawos kuker snonggaku ḇemar kwar, ima isya dawos kuker rur ḇeḇarḇor sya. Rur ḇeḇarḇor ansine sifrur si ra simnis snonggaku ḇemar kwar sya. Kofawi rosai Refo ikofen ḇekur snonggaku ḇemar sya kada, nari nakadaunwarek ko ro rur ḇeḇarḇor sya farawrowes sena. Yahwe byuk swarapepen ḇe ko insama kawos awer kuker snonggaku ḇemar sya kukro ifawi kona wis kuker rur ḇeḇarḇor sya ido, nari sun roi ḇemun ḇe ko.​—Kowasya Ulangan 18:10-12.

3. Refo ikofenḇair snonggaku ḇemar sya moḇsa sḇerai

Snonggaku ḇero supswan ine ḇesiper sna kakara ḇesisye ḇekur snonggaku ḇemar sya. Kaku ḇae, roi sikyar na nkaku kam ḇa.

• Kawasa ḇebor ḇero moḇ Beja, rosai sikyar ro snonggaku ḇemar sya?

VIDIO: Snonkaku Ḇemar Sya Moḇsa Sḇerai?—Ḇeknampu (1:19)

Kowasya Pengkhotbah 3:20, raimnai kawos fakfuken suine:

• Raris rosai mnuk ine ikofen ya, snonggaku oso imar ido na moḇsa ḇyerai?

• Roi ono ro snonggaku ani na isya ikenem pdef ke?

Refo ikofenḇair Yesus bati ḇyedi, Lazarus, moḇ imar raya. Kokara rosai Yesus ikofen ḇekur Lazarus marmar ḇyedine. Kowasya Yohanes 11:11-14, raimnai kawos fakfuken ri kyor nane:

• Yesus ḇyeḇair snonggaku ḇemar ya imnis ra?

• Wafawi kwar moḇ Yesus ḇyeḇair snonggaku ḇemar ansine, inja rosai wafawi ro snonggaku ḇemar sya?

• Wafawi rosai Refo ikofen ḇekur snonggaku ḇemar sya, inja moḇsa ḇaḇir rai?

4. Roi Refo ikofen ḇekur snonggaku ḇemar sya dun payamyum ḇe ko

Kofawi roi Refo ikofen ḇekur snonggaku ḇemar sya nafrur fa komgak faro si wer ḇa. Kowasya Pengkhotbah 9:10, raimnai kawos fakfuken ine:

• Snonggaku ḇemar kwar sya bisa sifrur susa ko ke?

Sia sisya simgak faro snonggaku ḇemar sya, inja sisyom si oroḇa ido sifrur roi ono faro ḇemar ansine insama sifrur susa si ḇa. Kowasya Yesaya 8:19 ma Fasasna 4:11, raimnai kawos fakfuken ine:

• Moḇsa Yahwe ḇyaḇir rai fafisu myam snonggaku oso isyom ḇaido syewar fafnoḇek ro snonggaku ḇemar sya?

5. Roi Refo ikofen ḇekur snonggaku ḇemar sya nbuk sneprei ḇe ko

Snonggaku ḇebor sya sikyar bo soḇe sifrur roi ḇeḇye ḇa ro kenem sena ido, fafisu simar nari sismai wayam. Imbape, kofarkor kwar snonggaku oso imar ido, na dakfawi ḇyekandera ḇa, snonggaku ḇefrur roi ḇeḇye ḇa kako. Nane nafrur fa kosnesna naprei kaku. Kowasya Roma 6:7, raimnai kawos fakfuken ine:

• Raris roi mnuk ine ikofen ya, fafisu snonggaku oso imar, na ḇyekandera snar sasar ifrur ro fafisu naiwara ke?

Komambir syadi Yahwe I kada, nari kofawi ima ipok ḇyewayam snonggaku ḇemar sya ḇaḇeri. Kowasya Ulangan 32:4 ma 1 Yohanes 4:8, raimnai kawos fakfuken nane:

• Allah ḇena rari-rari ḇepyum sap ro mnuk anine, imarisen ḇyewayam snonggaku ḇemar sya ke?

• Wasmai sneprei kukro wafawi rosai Refo ikofen ḇekur snonggaku ḇemar sya ke? Kwarem rarirya kukro?

FARKARKOR ḆYENA

Fafisu snonggaku oso imar, na ifawi roi oḇa ma ifrur roi oḇaḇeri. Snonggaku ḇemar kwar sya sifawi sekandera ḇa ma sifrur susa snonggaku ḇekenem kaker sya ḇa.

Waswarepen Kaḇer

• Snonggaku ḇemar sya moḇsa sḇerai?

• Rariso roi Refo ikofen ḇekur snonggaku ḇemar sya dun payamyum ḇe ko rai?

• Rariso roi Refo ikofen ḇekur snonggaku ḇemar sya nbuk sneprei ḇe ko rai?

SWEWAR NABOR WER

Wawasya moḇ Refo fyasnaiḇair knam kaku ro wos ”jiwa”.

”Jiwa Ido Rosairirya?” (Fasfas ro situs jw.org)

Manseren Allah ḇye for ḇembrer ḇa fa byukiwayam snonggaku ḇeḇarḇor sya ke?

For Ḇembrer Ḇa Ima Moḇ Srap Si Kaku Ke? (3:07)

Snon oso ismai sneprei kaku fafisu ifawi rosai Refo ikofen ḇekur snonggaku ḇemar sya.

”Refo Byuk Kankarem Ḇesnai Kaku ḇe Aya” (Syap Baryas 1 Februari 2015)