FARKARKOR 20
Nyan Yahwe Fyasos Pyum Sidang Kristen ya
Allah Yahwe imarisen roi nakam nambran pyum. (1 Korintus 14:33) Inja kokyar kawasa Ḇyesi nari sfasos pyum si. Inja moḇsa Yahwe fyasos sidang Kristen ya rai? Rosai na kakfrur fa kaksaramper sidang Kristen insama imbran pyum rarirya kwar?
1. Mansei ḇebukor ro sidang Kristen ya?
Refo ya doḇe, ”Kristus [ḇyebukor] ro jemaat.” (Efesus 5:23) Yesus isya ryo nanggi, mboi fyarkin fararur ro Yahwe kawasa Ḇyesi ro supswan ine ḇesiper. Yesus kyanow women ḇesouser ma ḇefawinanem sya, sima penatua ḇeḇeso ḇefarmyan fyoro kwar. Kofawi si kako ḇe Raryur Naek Ḇefarkin. (Kowasya Matius 24:45-47.) Raris manwawan ma penatua ro Yerusalem ro abad randak siwara, Raryur Naek Ḇefarkin ansine sbuk akurfasnai ḇe sidang-sidang ḇero supswan ine ḇesiper. (Farfyar 15:2) Ḇape, naek ansine sima manfarkin ro organisasi nggoḇedi sirya ḇa. Sisewar fa sifawi roi Yahwe imarisen na kuker siwasya Refo ya, ma sisouser Yesus farkankin ḇyena.
2. Mansei ḇeyuffarmyan ḇe penatua, ma rosai sifrur ya?
Ḇeyuffarmyan ḇe penatua siso snon Kristen ḇefasnai soasuser ro kenem sena kwar. Sbuk farkarkor ro Refo, smamwarek Yahwe kawasa Ḇyesi, sifnoḇek ma sisambraḇser si. Sḇak penatua ansine ḇa. Imbape, sfarmyan kuker sne ḇemarisen imnis Allah marisen Ḇyedi, ma sisewar nana ḇa kuker nyan ḇemnis ḇa, mboi suffarmyan kaku ḇeri. (1 Petrus 5:1, 2) Mambesrar ono sisya sifnoḇek penatua sya, sor si ḇe hamba pelayanan. Nari ras oso fyor sisyus kwar ido, sakfarmyan ḇe penatua kako.
Raryur Naek Ḇefarkin skanow penatua ḇeḇeso fa suffarmyan ḇe pengawas wilayah. Pengawas wilayah ansine na sra smamfar sidang-sidang fa sbuk farkankin ma sisambraḇser naek srar sya. Pengawas wilayah nari skur mambesrar ḇeso pyum kwar akurfasnai ro Refo ya fa sakfarmyan ḇe penatua ma hamba pelayanan ḇebabo.—1 Timotius 3:1-10, 12; Titus 1:5-9.
3. Fararur rosai Saksi Yahwe oser-oser sismai ya?
Snonggaku ḇero sidang syakam ”sisandik snonsnon Yahwe” ro fananjur ari kuker sbuk kankarem, sun faya, ma sidisen. Sisandik Yahwe I kako kuker sisewar fa sakbaryas abar ḇepyum.—Kowasya Mazmur 148:12, 13.
SWEWAR KAKU WER
Nari kofarkor fa kofawi Yesus ima manfarkin ḇefrur pyum, komam moḇ penatua sya siso nyan ḇepyum ḇyena raya, ma moḇsa na kaksouser Yesus i ma penatua sya.
4. Yesus ima manfarkin ḇefrur pyum dirya
Yesus dor ko fa korama faro i ma kofarkor ro i. Kowasya Matius 11:28-30, raimnai kawos fakfuken ine:
Yesus ima manfarkin ḇena kenem ḇerariso, ma imarisen insama moḇsa koḇaḇir rai?
Rariso penatua sya siso Yesus nyan ḇepyum ḇyena rai? Komam VIDIO.
Refo ikofenḇair moḇ penatua sya na simbran pyum fararur sena raya.
Kowasya Yesaya 32:2 ma 1 Petrus 5:1-3, raimnai kawos fakfuken suine:
Raris Yesus i, penatua sya sisewar fa sifrur pyum naek srar ḇero sidang ya dori. Wafawi roi ine inja moḇsa ḇaḇir rai?
Mam roi risai wer penatua sya siso ro Yesus i?
5. Penatua sbuk farkarkor kuker sfasnai nyan ḇepyum
Raris rosai Yesus ikofen na, moḇsa penatua sya smam fararur sena rai? Komam VIDIO.
Yesus ikofenḇair snonggaku ḇefarkin sidang Kristen sya kenem ḇerariso fandun fa sfasnai na. Kowasya Matius 23:8-12, raimnai kawos fakfuken suine:
Raris rosai Refo ikofen nane, kenem ḇerariso fandun fa penatua sya sfasnai na? Mam ido, manfarkin agama sya kenem sena namnis rosai Refo ikofen na ke?
Penatua sya smam pyum insama manggunsi ma kina sesi sfanam pdef ḇe Yahwe I
Penatua sya smamwarek ma sfandun naek srar ro sidang
Penatua sya simyaren sbaryas abar ḇepyum
Penatua sya sbuk farkarkor Refo. Sakfrur sren moḇ seari ro ya ma sifrur fararur ḇesena
6. Komarisen kosouser penatua sya
Yesus ikofenḇair roi ḇefnai kaku fa kosouser penatua sya. Kowasya Ibrani 13:17, raimnai kawos fakfuken suine:
Rosai ḇefnai fa Refo doḇe ipyum ya komarisen fa kosouser ḇeyuf fararur ḇe penatua sya? Moḇsa kwara rai, fandun fa koso anun ro Refo ine ke?
Kowasya Lukas 16:10, raimnai kawos fakfuken ine:
Rosai ḇefnai fa kosouser kaku penatua sya, ḇefandun syadi wer kosouser si ro roi komam ḇe roi ḇekasun monda na?
SIA SOḆE: ”Yaksun ro jemaat oso ḇa yo, sasar oḇa.”
Moḇsa kwara rai, koḇeari ro sidang Kristen sfasos pyum ido, payamyum rosai monda na kosmai ya?
FARKARKOR ḆYENA
Yesus iso ḇebukor ro sidang Kristen ya. Yesus fyarkin ko roro penatua ḇefarmyan ro sidang sya. Komarisen kosouser penatua sya kukro sifrur pyum ko ma sfarkor ko kuker sfasnai nyan ḇepyum.
Waswarepen Kaḇer
Mansei ḇebukor ro sidang Kristen ya?
Rosai penatua sifrur kaku fa sifnoḇek naek srar ro sidang sya?
Fararur rosai Yahwe manfamyan Ḇyesi oser-oser sismai na?
SWEWAR NABOR WER
Mam vidio ḇefasnai rariso Raryur Naek Ḇefarkin ma penatua ḇesesya sfasnai kaku siswar min sesi.
Mam vidio ine fa wafawi pengawas wilayah fararur sena.
Fararur rosai bar bin sya suf ro sidang Kristen ya?
”Bar Bin ro Saksi-Saksi Yahwe Sya Sakuffarmyan Kako Ke?” (Syap Baryas 1 September 2012)