FARKARKOR 21
Rariso Sbaryas Abar Ḇepyum ya Rai?
Kofawi kwar Yahwe nari ipyos kandera koḇena kam roro Karajan Ḇyedi. Imboi, kemir monda na ḇefawi abar ḇepyum ine ḇa. Yesus imarisen insama ḇeso i sya sbaryas abar ḇepyum ine faro snonggaku syakam! (Matius 28:19, 20) Moḇsa Saksi-Saksi Yahwe sifrur Yesus parenta ḇyenane rai?
1. Moḇsa wos ḇero Matius 24:14 nejadi kwar ro fafisu koḇedine rai?
Yesus ikofen ḇepon kwar bo doḇe, ”Abar ḇepyum ḇekur Karajan ine nari sbaryas na ro supswan ḇesiper.” (Matius 24:14, Terjemahan Dunia Baru [NW]) Saksi-Saksi Yahwe simarisen fa saksowarpu ro fararur ḇefandun kaku ine. Nggobaryas abar ḇepyum ine ro supswan ine ḇesiper nasyadi ro wos ri 1.000! Fararur ḇeba ine fyandun oras, samambraḇ, ma fasasos ḇepyum. Yahwe isaramper fararur ine, inja fararur ine imbran pyum.
2. Rosai monda na nggofrur kaku fa nggobaryas faro snonggaku sya?
Nggosewar fa nggosrow snonggaku sya ro moḇ sairirya kam. Raris snonggaku Kristen ḇero abad randak siwara, nggakbaryas ro rum ḇe rum. (Farfyar 5:42) Nyan ḇepyum ine nafnoḇek inggo fa nggosrow snonggaku sibor syadi. Ro swaf taun oser monda, bisa nggosrow snonggaku ri yuta. Ro moḇ ono, samswen fa nggosrow snonggaku sya ro rum sena, inja nggora ro moḇ kawasa sya sibor ro na. Nggosewar ker fa nggobaryas faro snonggaku ḇese insama sakfawi Yahwe I ma marisen Ḇyena.
3. Sbuk fararur ḇaḇebaryas abar ḇepyum ine faro mansei?
Fararur ḇaḇebaryas abar ḇepyum sbuk na faro ḇeso kaku Yesus i syakam. Nggomam na ḇe fararur ḇefarfnak ḇa, inja nggofrur kaku na. Nggosewar fa nggobaryas na imnis samambraḇ nggoḇena, kukro nggofawi roi ine dun kankenem faro snonggaku ḇese. (Kowasya 1 Timotius 4:16.) Sbak inggo ḇa, kukro Refo ya doḇe, ”Mkosma waworekna monda kwar, inja mkakḇuk waworek kako.” (Matius 10:7, 8) Angginem nggun ine, snonggaku syakam ḇa ḇemarisen ḇerower na. Ḇape nggosewar fa nggobaryas pdef, kukro nggosouser faro Yahwe I ma imbe nggofrur I fa imarisen.
SWEWAR KAKU WER
Nari farkor fa wafawi syadi rosai Saksi-Saksi Yahwe sifrur kwar fa sbaryas ro supswan ine ḇesiper, ma mam moḇsa Yahwe isaramper inggo raya.
Sbaryas ro supswan ḇesiper: (A) Kosta Rika, (B) Amerika Serikat, (C) Benin, (D) Thailand, (E) Yap, (F) Swedia
4. Nggosewar kaku fa nggobaryas faro snonggaku syakam
Saksi-Saksi Yahwe sya sisewar kaku fa sbaryas abar ḇepyum faro snonggaku ro moḇ sairirya kam. Komam VIDIO, raimnai kawos fakfuken ine.
Rosai mam Saksi-Saksi Yahwe sifrur kwar fa besyowi kaku si?
Kowasya Matius 22:39 ma Roma 10:13-15, raimnai kawos fakfuken suine:
Rosai ḇedif inggo fa nggobaryas ḇe snonggaku ḇesesya?
Moḇsa Yahwe myam snonggaku ḇekofenḇair abar ḇepyum sya rai?—Mam mnuk ḇe 15.
5. Nggoma nggofararur kayam fnoḇek Allah
Fawar ḇebor naisya nfasnai kaku Allah Yahwe isya fyarkin fararur nggoḇenane. Rupa ra, fawar ro mambesrar oso ḇeraker sup Selandia Babo, snoriso Paul. Ras oso ro arkok ya, mambesrar ine rya byaryas ro rum ḇe rum bo isrow bin oso. Ro ras ani arwo ya, bin ani ḇyenadi kwar bo dor ḇe Manseren Allah, dap snonsnon Ḇyedi, Yahwe, ma dor fa snonggaku oso ryama myamfar i. Naek Paul ikofen radine, ”Swaf oras ri kyor mura, yanuk kedwa ḇyeja.”
Kowasya 1 Korintus 3:9, raimnai kawos fakfuken ine:
Ro fawar ḇebor na, raris ro Selandia Babo ine, rosai ḇefasnai kaku Yahwe isya fyarkin fararur ḇaḇebaryas ya?
Kowasya Farfyar 1:8, raimnai kawos fakfuken ine:
Rosai ḇefnai fa kofandun Yahwe fafnoḇek Ḇyeja ro fararur ḇaḇebaryas koḇena?
Wafawi ke?
Ro fananjur minggu fadu ya, sfarkor inggo fa nggofawi moḇsa nggofrur fararur ḇaḇebaryas ine rai. Wakso ro fananjur ine kwar ido, moḇsa mam farkarkor ine rai?
6. Nggosouser Allah parenta Ḇyena naiso eḇewari nggobaryas
Ro abad randak naiwara, snonggaku ḇembroḇ Yesus manfamyan ḇyesi sisewar kaku fa sidwarek manfamyan ansine insama simnai sbaryas. Snonggaku Kristen ro fafisu ani, siḇriwarek manggunsi ro ḇarpon kankain karkara insama bisa sbaryas abar ḇepyum ine pdef. (Filipi 1:7) Ro baboine, Saksi-Saksi Yahwe sakfrur rarirya kako.a
Kowasya Farfyar 5:27-42, raimnai kawos fakfuken ine:
Rosai ḇefnai fa kopok komnai awer kobaryas?—Mam mnuk ḇe 29, 38, ma 39.
SIA SIFUKEN AU RADINE: ”Rosai ḇefnai fa Saksi Yahwe sya sra sbaryas ro snonggaku ḇesesya rum sena?”
Moḇsa na kwarem si rai?
FARKARKOR ḆYENA
Yesus iwan manfamyan ḇyesya fa sra sbaryas abar ḇepyum faro er nakam. Allah Yahwe isaramper kawasa Ḇyesi fa sifrur fararur ine.
Waswarepen Kaḇer
Moḇsa sbaryas abar ḇepyum ro supswan ine ḇesiper rai?
Rosai ḇefnai fa kobaryas faro snonggaku ḇesesya?
Kakso ro fararur ḇaḇebaryas ine ido, nari kosmai marasrisen ya ke? Kwarem rarirya kukro?
SWEWAR NABOR WER
Mam rariso Saksi-Saksi Yahwe sbaryas faro snonggaku ḇeḇarek ro kota-kota ḇeba na.
Rosai Saksi-Saksi Yahwe sifrur fa sifnoḇek kawasa ḇebur sup sena fa sḇarek ro sup ḇese?
Mam roi ḇefrur fa imbesrar oso imarisen byuk kenem ḇyedi fa duffarmyan ro fararur ḇesren ro oras nakam.
a Manseren Allah iso ḇewan inggo fa nggora nggobaryas ya. Inja Saksi-Saksi Yahwe nggoine imbe nggobaryas abar ḇepyum ido, na nggor ijin ro snonggaku ḇena papoik sya ḇa.