Rosai Na Wakfrur Kaku Insama Kina Bedi Kyain kuker Payamyum?​—Bar 2

Romawa sya sima roi ḇepyum Yahwe byuk ḇe sinan sya. Inja Yahwe dor kaku faro eḇe sinan sya fa sfaduru pyum romawa sesya. Byuk wos anun faro sinan sya fa sifawi moḇsa na sifrur roi anine rai. Byuk wos anun faro romawa sya kako fa siso na insama kina sesya skain kuker payamyum.

1. Wos anun risaiso Yahwe byuk faro sinan sya?

Yahwe dor kaku faro sinan sya fa siswar romawa sesya ma sbuk swaf nabor fa skainus si. Imarisen fa sinan sya skadaunwarek romawa sesi ro roi ḇemun na, ma sfarkor si kuker wos ḇepyum ḇero Refo ya. (Amsal 1:8) Manseren Yahwe iwan kma sya bo doḇe, ”Mkofarkor [romawa mgoḇesi] kuker farkarkor ma ananun Manseren.” (Kowasya Efesus 6:4.) Yahwe imarisen fa sinan sya sfaduru romawa sesi imnis farkankin Ḇyena ma sipok sbuk fararur senane awer ḇe snonggaku ḇese. Rarirya kada, nari Yahwe imarisen.

2. Wos anun risaiso Yahwe byuk faro romawa sya?

Yahwe byuk parenta faro romawa sya radine: ”Mkoḇeuser sna-kma mkoḇesi.” (Kowasya Kolose 3:20.) Romawa sya sesyowi sinan sesya ma sisouser si kada, na sifrur fa Yahwe imarisen ma sinan sesya kako na sakmarisen. (Amsal 23:22-25) Yesus fyasnai nyan ḇepyum kaku faro romawa sya. Yesus ima snonggaku ḇenapes dirya, ḇape fafisu ḇye romawa kaker ḇyesyowi sinan ḇyesu ma isouser su.​—Lukas 2:51, 52.

3. Rariso kina Bedi mgofanam syadi faro Manseren Allah rai?

Auma sinan disau ido, na wamarisen fa romawa Bansya sakswar Yahwe I raris moḇ waswar I raya. Inja moḇsa na wafnoḇek si rai? Refo ya doḇe, ”Mgokofenḇair ker [Yahwe Wos Ḇyena] faro romawa mgoḇansi. Mgawos na rofyor mgokain ro rum, ma rofyor mgofrur marandan.” (Ulangan 6:7) Rupa ra, na wakofenḇair ker roi ono ḇe romawa Bansya insama sefnder na ḇa. Imnis rarirya, na wafarkor si rarirya ker insama siswarepen na. Inja, mnuk ine doḇe fandun fa swewar swaf ḇesrow fa wawosḇair Yahwe I ḇe romawa Bansya ḇesya kwar. Nyan oso ḇepyum syadi iso wap ḇepon ro swaf minggu oser, ras risai na mgofrur nadi ro kina. Nwa romawa ḇa yo, farkor Refo ro minggu nakam ido na wasmai payamyum.

SWEWAR KAKU WER

4. Farkor romawa Bansya ro nyan saswar ya

Kofarkor romawa koḇesyama roi ḇepyan risya ḇa. Inja moḇsa wos Refo nafnoḇek ko rai? Kowasya Yakobus 1:19, 20, raimnai kawos fakfuken suine:

• Moḇsa sinan sya sfasnai saswar fafisu sawos yoḇ romawa sesya rai?

• Rosai ḇefnai fa sinan sya sbuk awer wos aprer fafisu sisya simsor kaker?a

5. Kwadaunwarek romawa Bansya

Nyan ḇefandun kaku fa kwadaunwarek romawa Bansya iso wakofenḇair ḇepon ḇe si oser-oser ḇekur fararur farḇuk ya. Imbude na wamai fa wakofenḇair roi ḇeradine. Komam VIDIO, raimnai kawos fakfuken suine.

VIDIO: Mamwarek Romawa Bedi ro Roi Ḇeḇarḇor Na (2:58)

• Rosai ḇefnai fa sinan ḇeḇeso sya samswen fa sawosḇair fararur farḇuk ya ḇe romawa sesya?

• Moḇsa na sikofenḇair fararur farḇuk ya ḇe romawa sesya rai?

Raris rosai Refo ikofen ḇepon kwar, snonggaku ḇero Ibiris dunya ḇyedine nari sḇarḇor syadi. Kowasya 2 Timotius 3:1, 13, raimnai kawos fakfuken ine:

• Snonggaku ḇeḇarḇor sap ro mnuk 13 ya kyur kako ḇe snonggaku ḇefrur roi ḇeḇye ḇa ḇe romawa sya. Inja, rosai ḇefnai kaku fa sinan sya sawosḇair fararur farḇuk ya ḇe romawa sesya fa isnai ma sikofenḇair nyan fa skadaunwarek si ro snonggaku ḇeḇarḇor ansine?

Wafawi ke?

Saksi-Saksi Yahwe sifrur syap ma vidio insama sinan sya sikfarkor romawa sesya ḇekur fararur farḇuk ma nyan fa skadaunwarek si ro snonggaku ḇeḇarḇor sya. Rupa ra, mampan:

• Mgokadaunwarek Romawa Mgoḇesi (vidio)

• Kofarkor ro Guru Ḇepyum Syadi, fasal 10 ma 32

• ”Farkor Romawa Bansya ḇekur Fararur Farḇuk ya” (Syap Sadarlah! No. 5 2016)

6. Besyowi sna ma kma Besuya

VIDIO: Nyan ya Rariso Insama Bisa Yawos Pyum kuker Sinan Ayesuya? (2:19)

• Rosai ḇefnai fa ipyum kaku ḇe roma ḇaido inai babo oso fa dawos pyum yoḇ sinan ḇyesuya?

• Moḇsa roma ḇaido inai babo oso fyasnai syowi fafisu dawos yoḇ sinan ḇyesuya?

Kowasya Amsal 1:8, raimnai kawos fakfuken ine:

• Romawa oso sinan ḇyesu suwan i fa ifrur roi ono ido, rosai fandun fa ifrur ya?

7. Mgoḇenadi ḇe Yahwe I ḇe kina oser

Saksi-Saksi Yahwe ḇena kina sya sap ḇepon kwar fafisu risai na senadi kayam ro swaf minggu oser. Rosai sifrur ro swaf ḇeradine? Komam VIDIO, raimnai kawos fakfuken nane.

VIDIO: Nadi ro Kina—Samswen Ḇyena ma Barakas Sismai Na (8:04)

• Rariso kina oso sifrur nadi ro kina sena fa imbran pdef rai?

• Rosai sinan sya sifrur insama nadi ro kina sena nafrur marisen?​—Mam sonin ro randak farkarkor ine.

• Kwara rosai ḇefrur samswen kina Besi fa mgofarkor Refo kayame?

Yahwe dor kina ro Israel ḇepon siwara fa sawos ker Wos Ḇyena. Kowasya Ulangan 6:6, 7, raimnai kawos fakfuken ine:

• Moḇsa na wasouser anun nane rai?

Anun fa wafrur nadi ro kina Bedi:

• Mgofrur fasasos faro fananjur ari ya.

• Mgowasya ma mgawos farfyar ḇero Refo mgomarisen syadi na.

• Nwa romawa ido, wun ḇaido be-cetak rofarfnak faro romawa ḇero jw.org na.

• Nwa roma inai babo ido, wawos roi ḇero awawos faro roma inai babo ḇero jw.org na.

• Mgowasen fawar ḇero Refo ma mgofnak raris snonggaku ḇero fawar ani.

• Mgomam ma mgawos vidio oso ro jw.org.

FARKARKOR ḆYENA

Yahwe dor sinan sya fa siswar romawa sesya, sfarkor si, ma skadaunwarek si. Dor romawa sya fa sesyowi sinan sesi ma sisouser si. Oso wer ido, Yahwe dor ḇero kina sya fa senadi kayame.

Waswarepen Kaḇer

• Rosai na sinan sya sifrur kaku fa sfarkor romawa sesya ma skadaunwarek si?

• Rariso romawa sya sfasnai sesyowi sinan sesya rai?

• Wap ḇepon ras oso ro swaf minggu oser fa mgofrur nadi ro kina ido, payamyum rosai nari mgosmai ya?

SWEWAR NABOR WER

Wawasya anun ro Refo faro snonggaku ḇemamfaduru sinan sesya ḇesinan kaku kwar.

”Rosai Refo Ikofen ḇekur Fadaduru Sna ma Kma Ḇesinan Kaku Kwar Sya?” (Fasfas ro situs jw.org)

Mam fawar ro snon oso randak ya ifawi fyaduru romawa ḇyesya ḇa, ḇape ḇarpur mura ifawi nyan ḇepyum fa fyaduru si.

Nufaduru Kina Nuḇesya ro Yahwe Nyan Ḇyena (5:58)

Rosai ḇefnoḇek kma oso fa fyanam pdef yoḇ romawa ḇyedi rai?

”Rariso Kma Oso Fyanam Pdef yoḇ Roma Ḇyedi Rai?” (Syap Baryas 1 November 2011)