FARKARKOR 39
Moḇ Manseren Allah Myam Rik ya
Snonggaku koine kofandun kaku rik ya. Kona rik oḇa ido, na kopok kokenem ḇa. Manseren Yahwe iso ḇefrur ko, inja iso na ḇekofenḇair moḇsa komam rik na raya. Inja rosai Yahwe ikofen ḇekur rik ya? Bisa kan na ḇe roḇean ke? Bisa kosun rik na ḇe baken koḇena ke? Ma rariso kun nyan ḇepyum fa komam rik anine?
1. Moḇsa Yahwe myam rik ya rai?
Yahwe ikofen ḇe kawasa Ḇyesi ro fafisu naiwara radine, ”Kankenem ro roi ḇekenem nakam iso rik ḇyena.” (Imamat 17:14) Yahwe myam rik ima ḇyeḇair ḇe kankenem. Kankenem ima roi ḇepyum Yahwe byuk nairi, inja myam na ḇe roi ḇefarfnak ḇa. Iso ḇefnai fa ḇyesyowi kaku rik na.
2. Moḇsa na koḇinggwanbur rik ya rai?
Rofyor sidang Kristen dores ḇaime, Yahwe iwan kawasa Ḇyesi fa san awer rik na. (Kowasya Kejadian 9:4 ma Imamat 17:10.) Rofyor sidang Kristen dores kwar kako, Yahwe dap kaḇer parenta ine. Raryur naek ḇefarkin ḇero fafisu anya siwan snonggaku Kristen sya fa ’sḇinggwanbur rik’ ya.—Kowasya Farfyar 15:28, 29.
Rosai na wafrur kaku insama ḇinggwanbur rik ya? Dokter iwan Au fa winem awer swan ido, nari wamarisen wan roḇean sḇaren kuker swan ya ke? Oroḇa ido nari swun na ḇe baken Beja ke? Na oroḇa. Rupa radiri, Manseren Yahwe iwan ko fa koḇinggwanbur rik ya. Ine ḇyeḇair nari kopok kinem ḇaido kan rik ya ḇa ma kopok kan awer kraf ro aiwan sisasyar rik ḇyena ḇa. Oso wer ido, nari kan roḇean sḇaren kuker rik na ḇa.
Ro rumḇeduf, na smam snonggaku ḇeduf sya kuker sepake rik ya kako. Nyan ine ido na ryariso? Nyan pararei ono naisya nasrow kuker Allah parenta Ḇyena ḇa. Rupa ra, siser rik derer ḇe baken sena ḇaido roi sor ḇe sel rik ḇerik, sel rik ḇepyoper, trombosit, ma plasma. Nyan sbuk pararei ono naisya rya nasnai manggun ḇe ko ḇa. Nane nafrur fa kokorwanan inema roi Manseren Allah imarisen dirya ke roḇa. Rupa ra, sbuk bar ḇekasun syadi ro sel ri fyak sap ro diyasne. Ono wer ido, sun snonggaku ḇeduf oso manggundi rik ḇyena. Ro fafisu ḇeradine, manggunko oser-oser na kokinfir imbe kun na ke roḇa.a—Galatia 6:5.
SWEWAR KAKU WER
Nari kawos nyan fa kwinfir nyan ḇepyum ḇekur moḇ sbuk pararei ḇena fasfes kuker rik ya.
3. Kwinfir nyan sbuk pararei ḇefrur fa Yahwe imarisen
Moḇsa na kwinfir nyan sbuk pararei ḇefrur fa Yahwe imarisen? Komam VIDIO, raimnai kawos rosai ḇefnai fa koso kaku anun ḇero sop nane.
Benadi wor fawawinanem.—Yakobus 1:5.
Swewar wos farkin ro Refo ma waso nyan ḇepyum na.—Amsal 13:16.
Swewar fa wafawi nyan dokter sya sbuk pararei ro moḇ Beja.
Mam pyum nyan sbuk pararei minsai na wapok fa wun na ḇa.
Kwara pyum insama roi wafrur na nakyaren sneuser Beja ḇa.—Farfyar 24:16.b
Snonggaku oso ḇaḇeri, swambri ke, penatua ke, snonggaku ḇebuk farkarkor Refo ḇe Au ke, sikame na sipok fa skinfir pyan nyan fa waso na ḇa, kukro roi ḇeradine ryamuma ro snembri.—Roma 14:12.
Fasepen rosai na kwinfir fa wakfrur ya insama snonggaku ḇese sifawi.
4. Saksi-Saksi Yahwe sisewar nyan ḇepyum fa siprei
Na kosouser Yahwe parenta Ḇyena fa koḇinggwanbur rik ma kosewar nyan sbuk pararei kuker rik ya ḇa. Komam VIDIO.
Kowasya Titus 3:2, raimnai kawos fakfuken ine:
Rofyor kawos kuker dokter sya, rosai ḇefnai fa kofasnai syowi ma kawos myaren asuser yoḇ si?
Komewer na ḇeri |
Kokinfir ro manggunko |
|---|---|
A. Plasma ro rik |
Fraksi ro plasma |
B. Sel rik ḇepyoper |
Fraksi ro sel rik ḇepyoper |
C. Trombosit |
Fraksi ro trombosit |
D. Sel rik ḇerik |
Fraksi ro sel rik ḇerik |
5. Nyan sbuk pararei kuker sepake fraksi darah
Bar ri fyak ro rik naiso sor ḇe sel rik ḇerik, sel rik ḇepyoper, trombosit, ma plasma. Roi nane sirwas na wer ḇe bar ḇekasun syadi wer sor ḇe fraksi darah.c Bar ono ro fraksi darah nane sifrur na kako ḇe aryawin fa sikmam dafduf na insama namnai ḇaido sikfrur rik ḇesasyar na fa namnai.
Ḇape bisa kosun fraksi darah ḇe baken koḇena ke? Snonggaku Kristen oser-oser fandun fa manggunsi skinfir imnis farkankin ro Refo sfarkor kwar na. Imbude ono sisya simewer sun nyan sbuk pararei kuker sepake fraksi darah. Imboi, ḇesesya wer sneuser sena nadwarek si ḇa.
Fafisu imbe kwinfir ro manggundaw ido, kwara fakfuken suine ari:
Rosai ḇefnai fa yamewer ḇaido yamarisen yun fraksi darah na? Moḇsa na yakofenḇair na ḇe dokter sya rai?
SIA SIFUKEN AU RADINE: ”Rosai ḇefnai fa Saksi-Saksi Yahwe sima simewer sisun rik na ḇe baken senandi?”
Moḇsa wakkara rai?
FARKARKOR ḆYENA
Yahwe imarisen insama koḇesyowi kaku rik na.
Waswarepen Kaḇer
Rosai ḇefnai fa Yahwe ḇyesyowi kaku rik na?
Yahwe iwan ko fa koḇinggwanbur rik na. Inja rariso kofawi ine kyur kako faro roi sor ḇe transfusi rik ya?
Fafisu imbe kwinfir nyan pararei ḇena fasfes kuker rik ya, moḇsa na wafrur fa Yahwe imarisen rai?
SWEWAR NABOR WER
Rosai na kwara pyum kaku rofyor imbe kwinfir nyan sbuk pararei kuker sepake rik manggun Bena?
Rosai ḇefnai fa dokter oso ikyar moḇ Yahwe myam rik na namnis?
”Yakyar Moḇ Yahwe Myam Rik Na” (Syap Sedarlah! 8 Desember 2003)
Mam penatua ḇefarmyan ḇe Panitia Penghubung Rumah Sakit sisaramper naek srar sya.
a Mam Farkarkor 35, ”Kokinfir fa Koso Nyan Ḇepyum”.
b Mam nomor 5, ”Nyan Sbuk Pararei kuker Sepake Fraksi Darah”, ma Fasfas Ḇewarpu 3, ”Nyan Pararei kuker Sbuk Rik”.
c Dokter sia sisya soḇe bar ri fyak ro rik nane kako iso fraksi darah nairi. Rarirya ido, fandun fa kokofenḇair pyum yoḇ si snar koma komewer sisun rik derer, sel rik ḇerik, sel rik ḇepyoper, trombosit, ḇaido plasma ḇe baken koḇena.