Roi Refo Ikofen ḇekur Snonggaku Ḇefarḇuk Ḇa ma Ḇefarḇuk Kwar Sya

Snonggaku ḇeraker sup ḇeḇeso soḇe snon ḇaido bin, fyarḇuk mande na ismai marasrisen. Imbape, snonggaku ḇefarḇuk kwar sya sia sisya sna marasrisen oḇa ma ḇefarḇuk ḇa sya sia sisya sismai marasrisen. Inja ḇekaku ya iso Refo doḇe snonggaku ḇefarḇuk ḇa ke ḇefarḇuk kwar ke, sikam sismai roi ḇepyum sena ḇardi.

1. Payamyum rosai na snonggaku ḇefarḇuk ḇa sya sismai na?

Refo ya doḇe, ’Snonggaku ḇeḇekawin fararur ḇyedi iḇye ma snonggaku ḇeḇekawin ḇa fararur ḇyedi iḇye syadi wer.’ (Kowasya 1 Korintus 7:32, 33, 38.) Moḇsa na snonggaku ḇefarḇuk ḇa ansine sifrur roi ’ḇeḇye syadi wer’ rai? Snonggaku ḇefarḇuk kwar sya nari smam pyum siswasi fandun sena, ḇape ḇefarḇuk ḇa sya sima oroḇa. Inja, simkei syadi ro snonggaku ḇefarḇuk kwar sya. Rupa ra, sia sisya sbuk swaf nabor syadi ro fararur ḇesren raris, sra sḇarek ro moḇ ḇese fa sbaryas abar ḇepyum ro diwa. Ḇepyum syadi wer, sbuk swaf nabor syadi fa sfarmyan ḇe Yahwe I.

2. Payamyum rosai na snonggaku ḇefarḇuk kwar sya sismai na?

Raris ḇefarḇuk ḇa sya, snonggaku ḇefarḇuk kwar sya saksmai payamyum kako. Refo ya doḇe, ”Snonggaku ri suru ipyum syadi ro oser ya derer.” (Pengkhotbah 4:9) Wos ine ryarirya kaku faro snonggaku Kristen ḇesouser farkankin ro Refo ya ro farḇakḇuk sena. Snon ma bin ḇefasepen farḇakḇuk suḇena, na sufrur asas fa suswaryae ma suḇesyowi su ḇesya kwar. Payamyum nari susmai ya iso na sukenem pyum syadi. Ine iḇese ro snon ma bin ḇeḇarek kayam boi suḇe mambeswa imbeswa ḇaim. Oso wer ido, eḇe mambeswa imbeswa kwar suine na farḇakḇuk suḇena nfasos ḇepon moḇ ḇepyum faro romawa suḇesya kako.

3. Moḇsa Yahwe myam farḇakḇuk ya rai?

Fafisu Yahwe ifrur snon ma bin ḇerandak fa suḇeoser ro farḇakḇuk ya, ikofen radine, ”Snon oso nari ibur kma ma sna ḇyesu ma nari kyainus swari pdef, ma nari suḇeoser.” (Kejadian 2:24) Yahwe imarisen insama snon ma bin ḇefarḇuk kwar suswaryae su ma sukain kayam ro swaf sukenem kaker. Doḇe imbe sumuk farḇakḇuk suḇena ido, sumin ya ifrur fararur farḇuk kuker oso ḇese mande. Ro fafisu ḇeradine, Yahwe doḇe ḇefrur sasar ḇa ani bisa dun wos oser fa imbe fyaspar swari ke roḇa, ine ryama ro manggundi.a (Matius 19:9) Yahwe imewer kaku snonggaku Kristen sya sfarḇuk sapsaper.​—1 Timotius 3:2.

SWEWAR KAKU WER

4. Wafarḇuk ḇa ido wafnak awer swaf ine

Yesus myam snonggaku ḇefarḇuk ḇa ima fakamaman dirya. (Matius 19:11, 12) Kowasya Matius 4:23, raimnai kawos fakfuken ine:

• Snar Yesus dakfarḇuk ḇa inja rariso fyasos pyum swaf ḇyena fa fyarmyan ḇe Kmari ma isaramper snonggaku ḇese?

Snonggaku Kristen ḇefarḇuk ḇa sya na sismai marasrisen kako kuker sakfrur raris Yesus i. Komam VIDIO, raimnai kawos fakfuken na.

VIDIO: Snonggaku Ḇefarḇuk Ḇa Ḇesoasuser Sya (3:11)

• Ro nyan risai monda snonggaku Kristen ḇefarḇuk ḇa sya sfasos pyum swaf sena?

Wafawi ke?

Refo ya dapḇair snai ḇa isof ro umur fis snonggaku oso insape fyarḇuk. Imbape, danunepen roma ḇaido inai babo oso fa iwaf rawo fafisu ”nafsu ḇepok fa fyarmku na ḇa” imnai resari, kukro fafisu ḇeradine samswen fa dun nyan ḇepyum.​—1 Korintus 7:36.

5. Kwinfir pyum mansei nari nwa ḇe swa

Imbe kwinfir mansei nari nwa ḇe swa ima roi ḇefandun kaku fa wafrur nairi. Kowasya Matius 19:4-6, 9, raimnai kawos fakfuken ine:

• Rosai ḇefnai fa snonggaku Kristen oso kyara fasawsaw awer fa fyarḇuk?

Wos Refo ya na nafnoḇek Au fa wafawi rari ḇepyum risai mam ro snon ḇaido bin imbe buk ya. Mboi ḇefandun syadi ya iso, snon ḇaido bin ani iswar Yahwe I.b Kowasya 1 Korintus 7:39 ma 2 Korintus 6:14. Raimnai kawos fakfuken suine:

• Rosai ḇefnai fa kofarḇuk monda kuker min Kristen ḇena kakyar oser kuker ko?

• Kofarḇuk kuker snonggaku ḇeyakswar Yahwe I ḇa ido, moḇsa na Yahwe ḇyaḇir rai?

6. Mam farḇakḇuk ya raris moḇ Yahwe myam na raya

Snon Israel ḇepon siwara, sia sisya sfaḇri manggunsi mura sfaspar bin sesi. Kowasya Maleakhi 2:13, 14, 16, raimnai kawos fakfuken ine:

• Rosai ḇefnai fa Yahwe dayin kaku snonggaku ḇemuk famfnom farḇakḇuk sena?

Komam VIDIO, raimnai kawos fakfuken na.

VIDIO: Farḇakḇuk Yama—Roi Ḇekain Fyoro Rirya (4:30)

• Farḇuk kuker snonggaku ḇeyaksyom Yahwe I ḇa ido, rosai na wafrur kaku insama wasmai marasrisen ro farḇakḇuk Bena?

7. Wasouser Yahwe farkankin Ḇyena faro farḇakḇuk ya

VIDIO: Bisa Kosouser Yahwe Farkankin Ḇyena faro Farḇakḇuk ya (4:14)

Kowasya Ibrani 13:4, raimnai kawos fakfuken ine:

• Yahwe farkankin Ḇyena faro farḇakḇuk ya bisa waksouser na ke? Kwarem rarirya kukro?

Ro sup ḇebor, pamarenta sya sor kawasa sesi fa sfasepen farḇakḇuk sena ma rofyor imbe simuk farḇakḇuk sena kako sfasepen na. Yahwe iwan snonggaku Kristen sya fa sisouser faro sasoser anine. Kowasya Titus 3:1, raimnai kawos fakfuken ine:

• Snon ḇaido bin ḇefarḇuk kwar disau ido, mam fa farḇakḇuk Bena sfasepen na ro kantor pamarenta sya kwar ke?

FARKARKOR ḆYENA

Snonggaku ḇefarḇuk ḇa ma ḇefarḇuk kwar sya sismai fakamaman ro Yahwe I. Sfarḇuk kwar ke sfarḇuk ḇa yo, na sismai marasrisen ma sikenem ro payamyum rofyor sifrur roi Yahwe imarisen na.

Waswarepen Kaḇer

• Moḇsa snonggaku ḇefarḇuk ḇa fyasos pyum swaf ḇyena rai?

• Rosai ḇefnai fa Refo dor ko fa kofarḇuk monda kuker min Kristen ḇena kakyar oser kuker ko?

• Raris Refo ikofen ya, rosai na ḇefnai kaku insape mambeswa imbeswa sukara fa sumuk farḇakḇuk suḇena?

SWEWAR NABOR WER

Mam rosai sor kaku ḇe ”Fakawin Kristen” ya.

”Fakfuken ro Ḇewasya” (Syap Baryas 1 Juli 2004)

Mam fawar ro mambesrar oso ḇekara roi Yahwe byuk kwar ḇe i na nemaeja syadi ro roi ibur kwar nakam.

Yamarisen Yamam Dakfarkor Kakaku ya (1:56)

Snonggaku oso kyara imbe ḇyesisye kuker swari ḇaido imuk farḇakḇuk ḇyena ido, rosai fandun fa kyara ḇepon na?

”Koḇesyowi ’Rosai Allah Fyesepen Kwar’” (Syap Baryas paik Desember 2018)