Sasewar Snonkaku Sya faro Rosai Na Ḇeḇejadi ro Ras Ḇarpon Iyama
Imbude wafuken rosai na ḇeḇejadi kuker Au ma kina Bedi ro ras ḇarpon iyama ke? Nari wana arasai ḇaido pipi nabor ma siswar Au ke? Ḇaido barek ro mankundaw ma ḇekandera ke? Na wakenem fyoro ke wamar fasaw? Taun syaran ma syaran, snonkaku sya sisewar kankarem ḇyena.
Manfawinanem sya sifarkor roi ḇeḇejadi ro supswan ine ma sisewar fa sifawi rosai na ḇeḇejadi ro ras ḇarpon iyama. Fyorno ido, rosai sisewar na nasmai bon, mboi ḇesesya nasmai bon ḇa. Imnis raris ro taun 1912, Guglielmo Marconi ḇesrow randak radio komunikasi, ikofen, ”Fafisu iyama, kawos kuker alat ḇepake kabel wer ḇa ido, nari mamamun nasya wer ḇa.” Snonkaku oso ḇefararur ro perusahaan rekaman Decca, imewer grup musik the Beatles serekaman ro moḇ ḇyedi taun 1962. Snar ikofen grup musik ḇefnak gitar sya nari selaku wer ḇa.
Snonkaku ḇebor sya sisewar fa sifawi rosai na ḇeḇejadi ro ras ḇarpon iyama kuker nyan ḇesasar. Sino sisewar fafnoḇek ro snonkaku ḇefawinanem mak sya; imnis raris ramalan bintang ḇesae ker ro majalah ma koran na. Ḇesesya wer sraḇe snonkaku ḇekinsor sya snar sikyar bisa siwasya rosai na ḇeḇejadi ro ras ḇarpon iyama roro kartu tarot, angka, ḇaido garis tangan.
Ro fafisu iwara, snonkaku sya sisewar fa sifawi rosai na ḇeḇejadi ro ras ḇarpon iyama kuker sraḇe snonkaku ḇekinsor sya. Snaro sikyar snonkaku ansine bisa sḇuk akurfasna ḇeramuma ro dewa sya. Imnis raris, Raja Kroesus ro Lidia fyarem hadiah nabor kaku ḇe snonkaku ḇekinsor oso ro Delfi, Yunani. Ifuken ḇe snonkaku ḇekinsor ani, fyor myamunmun kuker Kores ḇerama ro Persia ido nari kyafyo i ke roḇa. Ḇekinsor ani ikofen Kroesus nari kyafyo ”karajan ḇeba oso” rofyor rya fa myamunmun kuker Kores i. Snar ikyar faro rosai ikofen na, inja myamunmun kuker karajan ḇeba ani ḇape ḇarpur ya siso ḇekafyo i!
Inja rosai snonkaku ḇekinsor ani ikofen na nasmai bon ḇa; kaku ya, rosai ikofen na ankarkar narya. Kroesus ḇyuk nabor arasai ḇyena kwar, ḇape isma royoḇa. Fafisu ine, snonkaku sisewar fa sifawi rosai na ḇeḇejadi ro ras ḇarpon iyama sisma bon ke?