Ḇesyowi Roi Yahwe Ḇyuk Kwar ḇe Au Na Ke?

1-2. Raris wos ḇero Mazmur 40:5 ya, roi ḇepyum rosai Yahwe ḇyuk ḇe ko kwar, ma rosai ḇefnai fa kawos roi anna?

YAHWE ima Allah ḇefasnai sawarwar ḇesya kwar. Ḇyuk ḇe ko roi ḇepyum nabore. Ḇyuk moḇ ḇepduk fa koḇarek ro na, raris supswan ine. Ḇyuk ḇe snonggaku koine kako akuk ḇepyum ḇeḇuk samambraḇ fa kokara ma kawose. Oso wer ido, ḇyuk ḇe ko Wos Ḇyena, Refo ya, insama kosmai kankarem faro fakfuken ḇefandun kaku ro kenem koḇena.​—Wasya Mazmur 40:5.

² Ro farkarkor ine, nari kawos roi ḇepyum rikyor anna. Kokarauser na ido, nari koḇesyowi syadi roi ḇepyum anna. Roi nane na nadif ko fa kosewar kaku insama rosai kofrur na nafrur fa Yahwe I, ḇefrur ko, imarisen. (Why. 4:11) Ma nari kofawi pyum nyan fa kofnoḇek snonggaku ḇekyar faro farkarkor evolusi ya kwar.

SUPSWAN ḆEPYUM KAKU

3. Rosai ḇefnai fa supswan koḇedine iḇese ro planet ḇesena?

³ Yahwe ifrur supswan ine kuker nyan ḇepyum kaku. Ine fyasnai fawawinanem Ḇyena. (Rm. 1:20; Ibr. 3:4) Supswan ine derer ḇa ḇeyaryar ori ya. Mboi, supswan koḇedine iḇese ro planet ḇesena. Kukro? Supswan ine monda moḇ ḇesrow kaku fa snonggaku sya sikenem ro na.

4. Rosaiso roi ḇero supswan ine ḇefasnai Yahwe fawawinanem Ḇyena?

⁴ Ro farsyos ḇeba ine, supswan koḇedine imnis ra wai ḇeba ḇeyayun ro soren ḇeba ḇo ḇeyek ro i sya sibore. Imbape, roi ḇeḇeso naisya ḇefrur fa supswan ine iḇese kaku ro wai ya. Kokarapan, ḇeyek ro wai oso na sor si fa sfasos roḇean, war, ma wam ro manggunsi. Sor si fa sisawen famfnom awer papus na ḇe ḇandi. Ro fafisu ḇeradine, nari bisa sikenem pdef ke? Na oroḇa. Mboi, supswan ine dakmnis ra wai ani ḇa. Supswan ine isaramper roi ḇekenem syakam fa sikenem pdef. Supswan koḇedine fyasos wam, roḇean, ma war kofandun na. Nane kam napok nabro ḇa. Sisawen papus ḇero supswan ine ḇe farsyos iyaswa ḇa. Rarirya mboi, supswan ine ipduk kaker ma bisa koḇarek ro na. Kukro? Yahwe ifrur supswan ine insa syambraḇ fa manggundi fyadwer papus ḇe roi ḇepyum fa bisa sun na wer. Nari kawos roi risuru ḇefasnai Yahwe fawawinanem Ḇyena, isoine marandan ro wam ma war.

5. Rariso wam ḇesren naisya pdef rai, ma rosai kofarkor ro roi nane?

⁵ Wam iso roi snonggaku ma aiwan sya sfandun kaku fa sikenem pdef. Ono soḇe ro swaf taun oser monda, ḇekenem syakam sisyor wam ḇesren nabor kaku. Mboi, wam ya ipok ibro ro supswan ine ḇa. Roi ḇekenem ansi kam sisasyar wam ḇesren ḇa kako. Rarirya mboi, sun wam ḇesren na fa nabro ḇa, ma farsyos ya ifo kuker wam ḇesren kaker. Rosai ḇefnai ya? Yahwe ifrur rokaker na fa nabor, ḇeba ma kasun sya, fa sun wam ḇesren ḇa ma sisasyar wam ḇesren na rarirya kwar. Roi nane nfasnai kaku Yahwe ”iso ḇeḇuk kenem ma knaref”.​—Kis. 17:24, 25.

6. Rariso war na naisya pdef rai, ma rosai kofarkor ro roi nane? (Mam kako ”War Ima Roi Ḇepyum Ḇeramuma ro Yahwe I.”)

⁶ Supswan ine kyain ro swaf ḇesrow kaku ro ori ya, iso ḇefnai fa war ḇero supswan ine fyadwer ḇa rarirya kwar. Supswan ine kyain fanam ro ori ido, nari war na nasyor. Supswan ine na isam kaku, isyor, ma ono sḇarek ro dine ḇa. Mboi, supswan ine kyain ḇinggwan kermgun ro ori ido, nari war nakam nfadwer ḇe es ḇepakrek, ma nari salju isya ro moḇ nakam. Yahwe ryir supswan ine ro moḇ ḇesrow kaku, inja marandan ro war isya fa isaramper kankenem ine. Snar samsam ro ori, war ḇero ḇanda ma ḇande nari nek ma neḇeryur ḇe mandep. Ro taun ḇe taun, war ḇeyek ḇe diyaswa snar samsam ro ori, nabor syadi ro war danosen ḇero supswan ine kam. War anna nek muryas ḇo nkain ro farsyos rawo swaf ras risamfur mura, nado mumfes, naiso komam na ḇe mekem war ḇaido salju. Mura, war anna nadaf ḇe soren ḇaido warḇeki rarirya ker. Yahwe ifrur nyan ḇeradine insama war isya pdef ro supswan ine. Ine fyasnai Yahwe fawawinanem ma papoik Ḇyena naba kaku.​—Ayb. 36:27, 28; Pkh. 1:7.

7. Rosai na kofrur fa kofasnaiḇair koḇesyowi roi ḇepyum ḇeyap ro Mazmur 115:16 ya?

⁷ Rosai na kofrur insama koḇesyowi syadi supswan ḇepyum kaku ine ma roi ḇepyum ḇero dori na? (Wasya Mazmur 115:16.) Nyan oser ya iso kokarauser Yahwe fararur Ḇyena kam. Ine nari nadif ko fa kofasnai kasumasa faro Yahwe I ro ras nakam faro roi ḇepyum ḇyuk ḇe ko kwar na. Kofasnai koḇesyowi supswan ine kuker kofaduru moḇ koḇarek ro na insama nasren pdef.

AKUK KOḆENA NAPYUM KAKU

8. Rosai ḇefasnai akuk koḇena napyum kaku?

⁸ Yahwe ifrur akuk koḇena fa napyum kaku. Fafisu koro awin snekapar ḇyedi kaker, akuk koḇena fyararur imnis rosai Allah fyasos kwar na. Ma ro menit nakam, sel ḇebabo risyaran nasur wer. Manḇesewar fawawi sya soḇe snonggaku ḇeba sya akuk sena naser sel ḇese fanam miliar ri 100, sor sel nane ḇe neuron. Sel nane naiso ḇesaramper akuk koḇenane, marḇak ḇyena indokada kilogram ri 1,5. Nari kawos samambraḇ ḇepyum kaku ro akuk koḇenane.

9. Rosai ḇefrur fa kokyar samambraḇ fa kawose, nama roi ḇepyum ḇeramuma ro Allah?

⁹ Samambraḇ fa kawos inema roi ḇepyum kaku. Kwarapan rosai ḇejadi rofyor kawose. Kawos wos oser monda ido, akuk koḇena fyasos pyan otot ri 100 ḇero ramar, aroren, swardip, urkor, ma anderkor koḇena. Otot anna kam fandun fa nawawai ro fafisu ḇemnis insama roi kawos na snonggaku ḇese sifawi mnis na. Oso wer ido, manfawawi sya soḇe snonggaku koine kona samambraḇ kwar fa kofawi ma kofarkor wos koḇukidawos na rofyor kosnasi skapar ko. Roi sfarkor ro taun 2019 ḇekur samambraḇ fa kawose, nfasnai kapira ḇeaḇen babo bisa ryower ma ifawi wos kawos na. Inja, samambraḇ fa kawose nama roi ḇepyum Yahwe ḇyuk ḇe ko nairi.​—Kel. 4:11.

10. Moḇsa kofasnai koma koḇesyowi roi ḇepyum Allah ḇyuk ḇe ko, isoine samambraḇ fa kawose?

¹⁰ Moḇsa na kofasnai koḇesyowi roi ḇepyum Allah ḇyuk ḇe ko isoine samambraḇ fa kawose? Nyan ya iso kokofen faro snonggaku ḇekyar faro farkarkor evolusi sya roi ḇefnai fa koma kokyar Allah iso ḇefrur roi nakam. (Mz. 9:1; 1 Ptr. 3:15) Snonggaku ḇekyar faro farkarkor evolusi sikyar supswan ma roi ḇekenem syakam ro dori na Allah iso ḇefrur na ḇa, mboi naisya ro manggundi. Kofasnai mnuk ḇero Refo ma rosai kawos ro farkarkor ine, nari nafnoḇek ko fa kawoswarek Kma koḇedi Yahwe I. Simarisen srower ko ido, bisa kofasnaiḇair yoḇ si roi ḇefnai fa kokyar Yahwe iso ḇefrur supswan ma farsyos ine.​—Mz. 102:25; Yes. 40:25, 26.

11. Rosai ḇefnai fa akuk koḇena ipyum kaku?

¹¹ Samambraḇ koḇena fa koḇukiswarepen ima ipyum kakubos. Fafisu iwara, manfasfas oso doḇe snonggaku oso akuk ḇyena bisa ḇyukiswarepen roi nabor kaku, barbor ya namnis kuker syap yuta ri 20. Mboi ro baboine, manfawawi sya soḇe ḇekaku ya, akuk koḇena bisa iswarepen roi nabor syadi wer. Inja, samambraḇ ḇeba kaku kosmai ine, rosai bisa kofrur ya?

12. Rosai ḇefnai fa snonggaku koinema koḇese ro aiwan sya?

¹² Roi ḇekenem ro supswan ine kam, snonggaku koine monda iso ḇena samambraḇ fa kofawi moḇsa kokenem pyum raya. Inja, bisa kofadwer kakara ma kenem koḇena insama koḇe snonggaku ḇefrur pyum syadi. (1 Kor. 6:9-11; Kol. 3:9, 10) Bisa kofarkor kako sneuser koḇena fa koḇukimambir roi ḇekaku ma ḇesasar na. (Ibr. 5:14) Bisa kosewar fa kofasnai saswar, frur pyum, ma sawarwar. Ma bisa kosewar fa koso Yahwe rari Ḇyena, isoine nanapes.

13. Imnis wos ro Mazmur 77:11, 12, moḇsa koḇuk pyum samambraḇ koḇena fa koḇukiswarepen rai?

¹³ Rariso koḇesyowi kaku samambraḇ kosmai fa koḇukiswarepen ine? Nyan oser ya iso koswarepen roi Yahwe ifrur kwar fa ifnoḇek ma syambraḇser ko. Rarirya, kokyar na ifnoḇek ko ḇesya kwar. (Wasya Mazmur 77:11, 12; 78:4, 7) Nyan ḇese wer iso koswarepen roi ḇepyum snonggaku ḇese sifrur yoḇ ko na, ma kokofen kasumasa faro roi sifrur kwar na. Sasewar fawawi oso doḇe snonggaku ḇefawi ḇekofen kasumasa, sima sna marasrisen syadi. Nyan ḇese wer naisya fa kofasnai koma koḇesyowi roi ḇepyum Yahwe ḇyuk ine. Yahwe iswarepen ker sasar koḇena ḇa, inja komarisen kakso nyan Ḇyenane. Yahwe ima nya samambraḇ fa iswarepen pyum kaku roi oso, mboi imarisen ḇyefnder sasar koḇena ma ḇyuk ampun ḇe ko rofyor kombror kaku. (Mz. 25:7; 130:3, 4) Imarisen kofrur raris I fafisu sia sifrur fa kosnesna nadosam.​—Mat. 6:14; Luk. 17:3, 4.

14. Moḇsa kofasnai koḇesyowi kaku akuk Yahwe ḇyuk ḇe ko na?

¹⁴ Akuk koḇena nama roi ḇepyum kaku ḇeramuma ro Yahwe I. Bisa kofasnai koḇesyowi kaku roi ḇepyum ine kuker koḇuk na fa kosandik I. Ono sisya sḇuk akuk sena fa skinfir ro manggunsi roi ḇekaku ma ḇesasar na. Imbape, kofawi Yahwe iso ḇefrur ko, inja farkankin Ḇyena napyum syadi ro rosai kokinfir ro manggunko na. (Rm. 12:1, 2) Koso Yahwe farkankin Ḇyena ido, na kenem koḇena napyum. (Yes. 48:17, 18) Na kofawi kako rosai imbe kofrur ro kenem koḇena, isoine kofrur Yahwe imarisen ma kosandik I ḇe Manḇefrur ma Kma koḇedi.​—Ams. 27:11.

REFO—ROI ḆEPYUM ḆERAMUMA RO YAHWE I

15. Rosai ḇefnai fa kokyar Yahwe iswar ko inja ḇyuk Refo ya ḇe ko?

¹⁵ Refo ima roi ḇepyum ḇeramuma ro Yahwe I. Fyarkin snon ḇeḇeso fa sfas Refo ine kukro iswar kaku ko. Roro Refo ya, Yahwe ḇyuk kankarem faro fakfuken-fakfuken ḇefandun kaku raris: Rariso snonggaku koine koisya ro dine? Rosai ḇefnai fa kokenem? Moḇsa kenem koḇena ro ras ḇarpon iyama na ḇyerai? Yahwe imarisen kokam kofawi kankarem ḇyena. Inja, fyarkin snonggaku ḇeḇeso fa sfarwei Refo na ḇe wos ḇebor. Fafisu ine, sfarwei Refo na ro ḇar nakam ḇaido bar kermgun na ḇe wos nasyadi ro 3.000! Ro marandan kankenem ro snonggaku sya, Refo iso syap oso sfarwei wos ḇyena nabor kwar ma sirwas na kwar ḇe moḇ ḇebor. Ro moḇ risai monda sḇarek ro na, ḇaido wos risai sḇukidawos na, indokada snonggaku sya bisa siwasya Refo ro wos manggun sena.​—Mam kotak ”Sfarwei Refo ya ḇe Wos-Wos ḇero Sup Afrika.”

16. Ro Matius 28:19, 20 ya, rariso kofasnai koḇesyowi kaku Refo ya?

¹⁶ Bisa kofasnai koḇesyowi kaku Refo ya kuker kowasya na ro ras ḇe ras, kokarauser na, ma kosewar kaku fa kokenem imnis rosai kofarkor kwar na. Oso wer ido, ko kako kosewar kaku fa koḇaryas abar ḇepyum ro Refo ine faro snonggaku ḇebor sya. Kofrur na ido, ima kofasnai kokofen kasumasa faro Allah.​—Mz. 1:1-3; Mat. 24:14; wasya Matius 28:19, 20.

17. Roi ḇepyum rosai monda kawos kwar ro farkarkor ine, ma rosai nari kawos ro farkarkor ḇerama ya?

¹⁷ Ro farkarkor ine, kawos roi ḇepyum ḇeḇeso Yahwe ḇyuk ḇe ko kwar na. Ḇyuk supswan ine ḇe moḇ ḇepyum fa koḇarek ro na, akuk ḇepyum kaku, ma Wos Ḇyena, Refo ya. Mboi, Yahwe ḇyuk kako roi ḇepyum ḇese kopok komam ma kopan ro na ḇa. Nari kawos roi ḇepyum ine ro farkarkor ḇerama ya.