Sasar Ido Rosairiri?

Kankarem ro Refo

Sasar ima roi kofrur na, koḇaḇir na, ḇaido roi kokara ḇemnis kuker Allah marisen Ḇyena ḇa. Ine kako koyuk Allah parenta Ḇyena kuker kofrur roi Allah ikofen na ḇe roi ḇesasar.(1 Yohanes 3: 4; 5:​17) Refo ikofen kako snonggaku ḇemewer ḇefur roi ḇenapes ikada ifur sasar.​—Yakoḇus 4:​17.

Ro wos ḇekaku ḇyeja, sbukifas Refo ya, wos ”sasar” ine kyurfasnai ”ḇyinggwan ro moḇ ya”. Imnis ra sordade Israel ḇepon siwara sisonanem kuker karui ma ”nsasar kermgun oḇaḇeri”. Wos ”nsasar kermgun oḇaḇeri” kyurfasnai kako ”sifur sasar ḇa”. (Hakim-Hakim 20:16) Inja, fyor snonggaku oso roi ifur na nḇinggwan ro Yahwe sasoser ḇenapes Ḇyena ido, isya ifur sasar.

Ima Manḇefrur koḇedirya, inja isyus fa ifur sasoser faro snonggaku fa siso na. (Fasasna Faro Yohanes (Wahyu) 4:11) Nari kokam kobuk kankarem koḇena ḇe I faro roi kofrur na.​—Roma 14:12.

Snonggaku oso na dakfrur sasar oḇaḇeri ke?

Na jadi ḇa. Refo ikofen ”Snonggaku sya sḇesasar kwar ma sḇingwanḇur Allah ḇeḇuk koreri ḇesia.” (Roma 3:​23; 1 Raja 8:​46; Pengkhotbah 7:​20; 1 Yohanes 1:8) Sai ḇewar fa ndariri?

Snonggaku ḇerandak, Adam ma Eva, suma randak ya su sasar ḇa. Allah ifur su ḇe snonggaku ḇenapes kaku ma suna rari-rari ḇepyum raris Yahwe I. (Kejadian 1:​27) Ḇape, sunapes wer ḇa snar susouser Allah parenta Ḇyena ḇa. (Kejadian 3:​5, 6, 17-​19) Ramnai suḇuk sasar ine ḇe romawa up suḇesya imnis dafduf ḇepampam. (Roma 5:​12) Iso ḇeḇedar fa Raja Daud ḇeraker Israel fyas ḇo doḇe, ”Yaro sasar ya kwar rofyor skapar aya.”​—Mazmur 51:5.

Sasar ono naḇye ḇa syadi ro ḇesena ke?

Imbo, naisya. Rupa ra, Refo doḇe snonggaku Sodom ro fyor iwara sya ”sḇarḇor ma sifur sasar ḇeba”. Sasar sena ”nmarḇak kaku”. (Kejadian 13 :13 ; 18: 20) Mam roi rikyor ḇefasnaiḇair baba ro sasar oso.

1. Baba ro sasar kofrur na. Refo byuk swarapepen insa koḇinggwan ḇur sasar ḇeba, raris kofur farḇakḇuk famfnom, samsyom amfyanir, karawraw, marsarser, dafdifer, mamamun, ma roi ḇefesepen kuker rur ḇeḇarḇor sya. (1 Kor 6:​9-​11; Wahyu 21:8) Refo dap sasar annane naḇese kuker sasar sifrur na mboi skara ḇa na, imnis ra sawos ḇaido sifrur roi skara ḇepon na ḇa inja nafur duf snonggaku ḇesesya sisnesna. (Amsal 12:18; Efesus 4:​31, 32) Rariryano, Refo byuk swarapepen ḇe ko insa komam kyof awer sasar kasun na. Ine snaro, sasar ḇekasun na nafnai sasar ḇeba syadi.​—Matius 5:​27, 28.

2. Roi ḇefnai kofrur sasar. Sia sifur sasar snar sifawi pyum ḇaim roi Allah imarisen na. (Farfyar ro Manwawansya (Kisah) 17:30; 1 Timotius 1:​13) Ima sasar nairi, imboi Refo fyasnaḇair ima iḇese bur kuker sasar sifrur snar simewer siso Allah parenta Ḇyena. (Bilangan 15 :30, 31) Sifawi kwar nama sasar nairi ḇape sifrur na ker inema ndramuma ro ’sne ḇeḇarḇor’ sena.​—Yeremia 16:12.

3. Kofrur ker na ke roḇa. Refo ya ikofen kako sasar sifrur rarwan oser monda iḇese ro sasar sifrur ker ro swaf ḇekawane. (1 Yohanes 3:4-8) Snonggaku ono ’sifrur sasar ḇesyakwar’, ḇesyadi fafisu sifawi kwar moḇ sariso insama sifrur sasar ya werḇa. Snonggaku ḇeradine sya na sismai samamyai ro Allah.​—Ibrani 10:26, 27.

Snonggaku ḇefur sasar ḇeba nari ḇyaḇir isasar kaku. Imnis ra Raja Daud fyas, ”Sasar ayena nabor fafayaḇa rawo nafrur fa yapok ḇa kwar; imnis ra kamnam ḇemarḇak yapok yaḇar na ḇa.” (Mazmur 38:4) Ḇape, Refo byuk saneraro ine, ”Iḇye kada snonggaku ḇeḇarḇor ibur nyan ḇyena, ma snonggaku ḇefur roi ḇeḇye ḇa ibur aw ḇyena; ma iḇye kada kyaḇer ḇe Yahwe, Allah koḇedi, kukro nari fyasnai sawarwar faro i, ma byuk ampun kuker sne ḇesiper.”​—Yesaya 55:7.