Fas Buk Blong Kronikel

10 Nao ol man Filistia oli faet agensem ol man Isrel, mo oli kilim i ded plante long olgeta long Hil Ya Gilboa. Ale ol man Isrel oli ronwe long ol man Filistia.+ 2 Be ol man Filistia oli kam klosap long Sol wetem ol boe blong hem, nao oli kilim i ded Jonatan, Abinadab, mo Malkisua,+ hemia ol boe blong Sol. 3 Nao oli faet strong agensem Sol, mo ol man blong sut long bonara oli sutum hem, nao hem i kasem kil.+ 4 Ale Sol i talem long man ya we i stap karem ol tul blong faet blong hem, se: “Yu pulumaot naef blong faet blong yu mo yu stikim mi mi ded, olsem nao ol man ya we oli no sakomsaes bambae oli no mekem i nogud+ long mi.”* Be man blong karem ol tul blong faet blong hem i no wantem mekem, from we hem i fraet tumas. Ale Sol i tekem naef blong faet mo i foldaon antap long hem.+ 5 Taem man blong karem ol tul blong faet blong Sol i luk se hem i ded, hem tu i foldaon antap long naef blong faet blong hem, mo i ded. 6 Taswe Sol wetem trifala boe blong hem, mo olgeta man long haos blong hem, oli ded tugeta.+ 7 Taem olgeta man Isrel we oli stap olbaot long vali* oli luk se evriwan oli ronwe mo Sol wetem ol boe blong hem oli ded, oli girap oli aot long ol taon blong olgeta mo oli ronwe, nao ol man Filistia oli kam stap long ol taon ya.

8 Long nekis dei, taem ol man Filistia oli kam blong tekemaot olting blong ol man ya we oli ded, oli faenem Sol wetem ol boe blong hem oli foldaon i stap long Hil Ya Gilboa.+ 9 Ale oli tekemaot olting blong hem, oli tekemaot hed blong hem, mo klos blong faet blong hem, mo oli sanem tok i go long olgeta ples long Filistia blong oli talemaot nius ya long ol aedol blong olgeta+ mo long ol man. 10 Biaen oli putum klos blong faet blong hem long haos* blong god blong olgeta, mo oli fasem bun blong hed blong hem long haos blong Dagon.+

11 Taem olgeta man Jabes+ long Gilead oli harem olgeta samting we ol man Filistia oli mekem long Sol,+ 12 olgeta strong man blong faet oli girap, mo oli go tekemaot dedbodi blong Sol mo dedbodi blong ol boe blong hem. Nao oli kambak long Jabes, mo oli berem bun blong olgeta aninit long bigfala tri long Jabes,+ mo oli fasting blong seven dei.

13 Long fasin ya, Sol i ded from we i no holemstrong long Jehova, taem i no obei long tok blong Jehova,+ mo tu from we hem i go askem kwestin long wan woman we i stap toktok wetem ol dedman,+ 14 be i no traem faenemaot tingting blong Jehova. Nao God i kilim hem i ded mo i putumap Deved we i boe blong Jese, i kam king.+