Esikel
27 Nao tok blong Jehova i kamtru bakegen long mi, i se: 2 “Mo yu, pikinini blong man, yu singsing long wan singsing sore* from Taea,+ 3 mo yu talem long Taea se:
‘Yu we yu stap long get blong go long solwota,
Yu bisnesman blong ol man long plante aelan,
Hemia samting we Hae Masta Jehova i talem:
“O Taea, yu nomo yu talem se: ‘Mi mi naes tumas.’+
4 Ol teritori blong yu oli stap long hat blong solwota,
Mo ol bilda blong yu oli mekem yu yu kam naes tumas.
5 Olgeta oli wokem olgeta plang blong yu long junipa tri blong Seniri,+
Mo oli tekem wan sida blong Lebanon blong wokem mas blong yu.
6 Oli wokem ol parel blong yu long ol oktri blong Basan,
Mo fored blong yu oli wokem long tri ya saepres, mo oli blokem long tut blong elefen we i kam long ol aelan blong Kitim.+
7 Ol sel blong yu oli ol kalakala linen blong Ijip,
Mo ol kaliko blong yu blong blokem san long dek, oli wokem long blu tred mo pepol wul we i kam long ol aelan blong Elisaha.+
8 Ol man blong yu we oli stap pul, oli ol man Saedon mo Avad.+
O Taea, ol man blong yu we oli gat gudhan, hemia ol boskru blong yu.+
9 Ol man Gebal we oli gat ekspiriens* mo oli gat gudhan,+ olgeta nao oli blokem ol ples we ol timba blong yu oli joen long hem, blong wota i no kam insaed.+
Olgeta sip long solwota mo ol boskru blong olgeta, oli kam long yu blong mekem bisnes.
10 Ol man Pesia, Lud, mo Put,+ oli stap long ami blong yu, oli ol man blong faet blong yu.
Olgeta oli hangem ol sil mo ol hat blong faet blong olgeta long yu, mo oli mekem yu yu kam naes we yu naes.
11 Ol man Avad we oli stap long ami blong yu, oli stanap rere raonabaot long ol stonwol blong yu,
Mo ol man we oli no fraet, oli lukaot long ol taoa blong yu.
Olgeta oli hangem ol raon sil raonabaot long ol wol blong yu
Mo oli mekem yu yu kam naes tumas.
12 “‘“Tasis+ i mekem bisnes wetem yu from we yu gat plante sas samting.+ Olgeta oli pem ol samting blong yu long silva, aean, tin, mo led.+ 13 Javan, Tubal,+ mo Mesek,+ oli mekem bisnes wetem yu, olgeta oli givim ol slef+ mo ol samting we oli wokem long kopa, blong pem ol samting blong yu. 14 Ol man long haos blong Togama+ oli givim ol hos, ol hos blong faet, mo ol hafkas dongki, blong pem ol samting blong yu. 15 Ol man Dedan+ oli mekem bisnes wetem yu. Yu yu mekem ol bisnesman long plante aelan oli wok blong yu, mo olgeta oli givim ol tut blong elefen+ mo ol wud ya eboni blong pem yu. 16 Edom i mekem bisnes wetem yu from we yu gat plante samting. Olgeta oli pem ol samting blong yu long sas ston ya takwoes, pepol wul, kalakala kaliko we oli somap ol pija long hem, ol gudfala kaliko, ol korel, mo ol rubi.
17 “‘“Juda mo kantri blong Isrel oli mekem bisnes wetem yu, olgeta oli pem ol samting blong yu long wit blong Minit,+ ol gudfala kakae, hani,+ oel, mo balsam.+
18 “‘“Damaskes+ i mekem bisnes wetem yu from we yu gat plante samting mo from olgeta sas samting blong yu, olgeta oli pem ol samting blong yu long waen blong Helbon, mo wul blong Sahar.* 19 Vedan mo Javan blong Usal, oli yusum ol samting we oli wokem long aean, kasia,* mo waelken* blong pem ol samting blong yu. 20 Dedan+ i givim ol klos* long yu we oli yusum olsem sadel, blong pem ol samting blong yu. 21 Yu yu mekem ol man Arebia wetem olgeta jif blong Kedara+ we oli ol bisnesman, oli wok blong yu. Ol bisnesman ya oli stap salem ol smol sipsip, ol man sipsip, mo ol nani.+ 22 Ol bisnesman blong Seba mo Rahama+ oli mekem bisnes wetem yu. Olgeta oli pem ol samting blong yu long ol defdefren kaen senta we oli beswan, ol sas ston, mo gol.+ 23 Haran,+ Kanei, Iden,+ ol bisnesman blong Seba,+ Asuru,+ mo Kilmad, oli mekem bisnes wetem yu. 24 Long ples blong maket blong yu, olgeta oli stap mekem bisnes long ol naesfala klos, ol longfala kot we oli wokem long blu kaliko mo oli somap ol pija we oli gat plante kala long hem, mo ol kapet we oli gat ol defdefren kaen kala long hem, mo evri samting ya oli putum tugeta mo oli fasem long ol rop.
25 Ol sip blong Tasis+ oli olsem ol bisnesman blong yu we oli wokbaot i go long ol defdefren ples wetem ol kamel blong olgeta,
Taswe oli fulumapgud yu mo oli mekem yu hevi gud* long medel blong open si.
26 Ol man blong yu we oli stap pul, oli tekem yu yu go insaed long ol hevi wef.
Iswin i mekem yu rek taem yu stap long medel blong open si.
27 Ol sas samting blong yu, olting blong yu, ol samting we yu salem, ol boskru blong yu, mo ol sela blong yu,
Olgeta we oli stap blokem ol ples we timba blong yu i joen long hem, olgeta we oli stap mekem bisnes wetem yu,+ mo olgeta man blong faet,+
Olgeta evriwan* we oli stap insaed long yu,
Bambae olgeta evriwan oli draon long medel blong open si long dei we bambae yu yu foldaon.+
28 Taem ol boskru blong yu oli krae strong, ol ples klosap long solwota bambae oli seksek.
29 Olgeta man we oli stap parel, ol boskru, mo ol man blong solwota
Bambae oli goaot long sip blong olgeta mo oli stanap long graon.
30 Bambae oli singaot bigwan mo oli krae strong from yu+
Taem oli stap saksakem das long hed blong olgeta mo oli rolem olgeta long asis.
31 Bambae olgeta oli sevemaot hea long hed blong olgeta i kam bolhed, mo oli werem ol klos we oli wokem long bag.
Bambae oli krae strong from yu, we oli singsingaot strong.
32 Taem oli stap krae, bambae oli singsing wan singsing sore, mo oli singsing from yu se:
‘?Hu i olsem Taea we naoia i no moa mekem noes long medel blong solwota?+
33 Taem olting blong yu oli aot long open si oli kam, yu yu mekem plante man oli harem gud.+
Ol sas samting blong yu, mo ol samting we yu salem oli mekem ol king blong wol ya oli kam rij.+
34 Naoia yu yu rek finis long open si, long ples we i dip we i dip,+
Mo olgeta samting blong yu we i blong salem mo ol man blong yu, olgeta oli draon wetem yu.+
35 Evri man blong ol aelan bambae oli lukluk yu we oli sapraes tumas,+
Mo ol king blong olgeta bambae oli seksek from we oli fraet tumas.+ Mo fes blong olgeta bambae i soemaot se oli wari.
36 Ol bisnesman we oli stap long medel blong ol nesen, bambae oli wesil from samting we i hapen long yu.
En blong yu bambae i kasem yu kwiktaem nomo mo bambae i nogud we i nogud,
Mo bambae yu yu no moa stap blong olwe.’”’”+