Jajes
10 Afta we Abimelek i ded, Tola boe blong Pua, we papa blong hem Dodo, wan laen blong Isakara, i stanap blong sevem Isrel.+ Hem i stap long Samiri, long rijen blong ol hil blong Efrem. 2 Hem i jaj blong ol man Isrel blong 23 yia. Biaen hem i ded, nao oli berem hem long Samiri.
3 Afta long hem, Jaere we i man Gilead i kam jaj, mo hem i stap olsem jaj blong ol man Isrel blong 22 yia. 4 Hem i gat 30 boe, mo oli gat 30 dongki we olgeta wanwan oli stap raed long hem. Mo oli gat 30 taon long graon blong Gilead, mo oli singaot ol taon ya se Havotjaere, mo nem ya i stap kam kasem tede.+ 5 Biaen Jaere i ded, mo oli berem hem long Kamon.
6 Ale ol laen blong Isrel oli mekem samting we i nogud bakegen long ae blong Jehova.+ Oli stat blong wosipim ol Bal,+ mo ol pija blong Astoret, mo ol god blong Aram,* ol god blong Saedon, ol god blong Moab,+ ol god blong ol man Amon,+ mo ol god blong ol man Filistia.+ Olgeta oli lego Jehova, mo oli no wosipim hem. 7 Nao Jehova i kros long ol man Isrel, mo i putum* olgeta long han blong ol man Filistia mo ol man Amon.+ 8 Long yia ya, oli mekem i strong long ol laen blong Isrel mo oli spolem gud olgeta. Blong 18 yia, oli stap spolem ol laen blong Isrel we oli stap long Gilead, narasaed long Jodan Reva, long graon ya we bifo ol man Amoro oli stap long hem. 9 Ol man Amon tu oli stap krosem Jodan Reva blong go faet long ol laen blong Juda, laen blong Benjamin, mo long ol famle long laen blong Efrem. From samting ya, ol man Isrel oli stap harem nogud tumas. 10 Nao ol laen blong Isrel oli singaot i go long Jehova blong i halpem olgeta.+ Oli se: “Mifala i mekem sin agensem yu, from we mifala i lego yu we yu God blong mifala mo go wosipim ol Bal.”+
11 Be Jehova i talem long ol laen blong Isrel se: “?I no mi we mi tekemaot yufala long han blong ol man Ijip,+ Amoro,+ Amon, Filistia,+ 12 Saedon, Amalek, mo ol man Midian, taem oli stap spolem yufala? Taem yufala i krae i kam long mi, mi mi tekemaot yufala long han blong olgeta. 13 Be yufala i lego mi mo yufala i go wosipim ol narafala god.+ From samting ya, bambae mi no moa sevem yufala bakegen.+ 14 Yufala i go long ol god ya we yufala i jusum, mo yufala i askem olgeta blong oli givhan long yufala.+ I gud yufala i letem olgeta oli tekemaot yufala long trabol ya.”+ 15 Be ol laen blong Isrel oli talem long Jehova se: “Mifala i mekem sin. Yu mekem eni samting long mifala olsem we yu wantem. Be plis, mifala i wantem se yu sevem mifala tede.” 16 Nao oli sakemaot ol god blong ol narafala kantri, mo oli mekem wosip long Jehova,+ blong hem i no moa letem ol trabol ya i gohed blong spolem olgeta.+
17 Samtaem biaen, ol man Amon+ oli kam wanples mo oli kamp long Gilead. Ale ol laen blong Isrel tu oli kam wanples, oli kamp long Mispa. 18 Nao ol man mo ol prins blong Gilead oli stap asaskem long olgeta se: “?Hu bambae i lidim yumi blong go faet agensem ol man Amon?+ Man we i lidim yumi i go, i gud hem i kam jif blong olgeta man Gilead.”