Esikel

15 Nao tok blong Jehova i kamtru bakegen long mi, i se: 2 “Pikinini blong man, ?olsem wanem rop blong grep i defren long wud blong eni narafala tri o branj blong ol tri blong bus? 3 ?Yu ting se oli save wokem wan pos long hem mo yusum long wan wok? ?O ol man oli save yusum blong wokem wan stik blong hangem ol samting long hem? 4 !Yu luk! Oli sakem rop ya i go long faea olsem faeawud, nao faea i laet long tufala en blong hem mo i bonem medel blong hem. ?Olsem wanem? ?Naoia oli save yusum long wan wok? 5 Nating we rop ya i fulwan yet, be oli no save yusum blong mekem eni samting. !Be oli no save yusum rop ya tu afta we faea i laet long hem mo i bonem!”

6 “Taswe, hemia samting we Hae Masta Jehova i talem: ‘Samting we mi mekem long rop blong grep we i stap long medel blong ol tri blong bus, we mi givim olsem faeawud blong mekem faea long hem, hemia sem samting we bambae mi mekem long ol man we oli stap long Jerusalem.+ 7 Mi mi fesem olgeta. Olgeta oli ronwe long faea, be faea bambae i bonem olgeta. Mo bambae yufala i mas save se mi mi Jehova taem mi fesem olgeta.’”+

8 “‘Mo bambae mi mekem kantri ya i emti nomo i stap,+ from we olgeta oli no holemstrong long mi,’+ hemia tok we Hae Masta Jehova i talem.”