Josua

20 Biaen Jehova i talem long Josua se: 2 “Yu talem long ol laen blong Isrel se: ‘Yufala i jusumaot ol taon blong haed+ we mi bin talem long Moses blong i talem long yufala. 3 Nao sipos wan man i kilim wan narafala man* i ded we i no minim,* bambae hem i ronwe i go long wan long ol taon ya. Ol taon ya bambae oli kam ples blong haed blong yufala, blong man we i gat raet blong givimbak i no kasem yufala.+ 4 Man ya i mas ronwe i go long wan long ol taon ya,+ i stanap long get blong taon ya+ mo i talemaot samting we hem i mekem, blong ol lida blong taon ya oli harem. Biaen ol lida ya oli mas tekem hem i go insaed long taon mo oli givim wan ples long hem blong i stap long hem. 5 Sipos man we i gat raet blong givimbak i go from hem blong kilim hem, ol lida ya oli no mas letem hem i go long han blong man ya, from we hem i no minim blong kilim man i ded,* mo i no min se tufala i enemi.+ 6 Hem i mas stap long taon ya gogo kasem we oli jajem hem long fored blong ful asembli,+ mo go kasem we hae pris+ we i wok long taem ya i ded. Mo biaen, hem i save gobak bakegen long taon blong hem mo long haos blong hem.’”+

7 Ale oli jusumaot sam taon blong haed mo oli mekem i kam tabu. Ol taon ya i gat Kedes+ we i stap long Galili long rijen blong ol hil blong Naftali, mo Sekem+ we i stap long rijen blong ol hil blong Efrem, mo Kiriataba+ we hemia Hebron we i stap long rijen blong ol hil blong Juda. 8 Long rijen blong Jodan Reva long is saed blong Jeriko, oli jusumaot Bejere+ we i stap long draeples long bigfala levelples antap long hil long graon blong traeb blong Ruben, mo Ramot+ we i stap long Gilead long graon blong traeb blong Gad, mo Golan+ we i stap long Basan long graon blong traeb blong Manase.+

9 Ol taon ya nao we oli jusumaot blong olgeta man Isrel mo ol man blong narafala kantri we oli stap wetem olgeta, oli save ronwe i go long ples ya taem oli kilim wan man* i ded we oli no minim.+ Olsem nao man we i gat raet blong givimbak i no save kilim hem i ded bifo we oli jajem hem long fored blong asembli.+