Fas Buk Blong Kronikel
18 Sam taem biaen, Deved i faet agensem ol man Filistia mo i winim olgeta, mo i tekemaot Gat+ wetem ol taon we oli dipen* long hem long han blong ol man Filistia.+ 2 Biaen hem i winim Moab,+ mo ol man Moab oli kam ol man blong wok blong Deved mo oli stap givim takis* long hem.+
3 Deved i faet agensem King Hadadesa+ blong Joba+ klosap long Hamat+ mo i winim hem. Long taem ya, Hadadesa i stap go blong mekem ol man long Yufretes Reva oli kam aninit long paoa blong hem.+ 4 Nao Deved i holemtaet 1,000 jariot blong hem, 7,000 soldia we oli ron long hos, mo 20,000 soldia we oli wokbaot.+ Biaen Deved i katem string blong leg blong olgeta hos we oli pulum jariot, be i lego 100 nomo i stap.+ 5 Taem ol man Siria we oli stap long Damaskes oli kam blong givhan long King Hadadesa blong Joba, Deved i kilim i ded 22,000 long olgeta.+ 6 Biaen Deved i putumap ol grup blong ol soldia blong hem long Siria long Damaskes, mo ol man Siria oli kam ol man blong wok blong hem mo oli stap givim takis* long hem. Mo long evri ples we Deved i go long hem, Jehova i stap mekem hem i win.*+ 7 Ol man blong wok blong Hadadesa oli gat ol raon sil we oli wokem long gol, be Deved i tekemaot long olgeta mo i karem i go long Jerusalem. 8 Mo tu, Deved i tekemaot plante plante kopa long tufala taon blong Hadadesa, hemia Tibat mo Kun. Biaen Solomon i yusum ol kopa ya blong wokem kopa Si,+ tufala bigfala pos, mo ol narafala samting long kopa we oli yusum long tempol.+
9 Taem King Tou blong Hamat i harem se Deved i winim ful ami blong King Hadadesa+ blong Joba,+ 10 kwiktaem nomo hem i sanem boe blong hem Hadoram, blong i go luk King Deved mo askem long hem se hem i oraet no olsem wanem, mo blong talem se hem i glad long hem from we hem i faet agensem Hadadesa mo i winim hem. Hemia from we plante taem Hadadesa i faet agensem Tou. Mo taem Hadoram i go luk Deved, hem i tekem ol defdefren kaen samting we oli wokem long gol, silva, mo kopa. 11 Nao King Deved i mekem ol samting ya oli kam tabu, oli blong Jehova,+ wetem ol silva mo gol we hem i tekemaot long olgeta nesen ya: Edom mo Moab, ol man Amon,+ ol man Filistia,+ mo ol laen blong Amalek.+
12 Abisae+ we i boe blong Jeruia+ i kilim i ded 18,000 man Edom long Vali Blong Sol.+ 13 Mo Deved i putumap ol grup blong ol soldia blong hem long Edom, nao olgeta man Edom oli kam ol man blong wok blong Deved.+ Mo long evri ples we Deved i go long hem, Jehova i stap mekem hem i win.*+ 14 Nao Deved i gohed blong rul long olgeta ples long Isrel,+ mo hem i rulum olgeta man blong hem long jastis mo long stret fasin.+ 15 Joab we i boe blong Jeruia, hem i lidim ol ami,+ mo Jehosafat+ we i boe blong Ahilud, hem i man blong raetemdaon samting, 16 Jadok we i boe blong Ahitub mo Ahimelek we i boe blong Abiata, tufala i pris, mo Safsa i sekretari. 17 Mo Benaea we i boe blong Jehoeada, hem i lidim ol man Keret+ mo ol Peletaet.+ Mo ol boe blong Deved oli ol haeman afta long king.