Aesea
22 Wan strong tok agensem Vali Blong Vison:*+
?Wanem i rong long yu, we i mekem se yufala evriwan i go antap long ol ruf blong haos?
2 Taon blong yu i fulap long noes blong ol man we tingting blong olgeta i paspas,
Yes wan taon we i fulap long noes, wan taon we i praod tumas.
Ol man blong yu we oli ded, oli no ded from we man i kilim olgeta long naef blong faet,
No long taem blong faet.+
3 Olgeta lida blong yufala we fasin blong olgeta i strong tumas, olgeta evriwan oli ronwe finis.+
Taem ol enemi oli kam tekem olgeta i go olsem ol prisena, oli no yusum bonara nating.
Eni man we oli faenem hem, oli tekem hem olsem prisena i go,+
Nating se man ya i ronwe i go longwe finis.
4 From samting ya, mi talem se: “Yufala i tanem yufala, yufala i no moa lukluk mi,
Mo bambae mi krae we mi krae.+
Yufala i no mas traem blong mekem mi mi harem gud bakegen
From trabol ya we i spolem gud dota blong ol man blong mi.*+
5 Hem i wan dei we tingting blong man i paspas, mo ol enemi oli winim faet, mo tingting blong man i lus,+
From we dei ya i kam long Hae Masta, Jehova komanda blong ol ami,
Mo i hapen long Vali blong Vison.
Bambae ol man oli brebrekemdaon stonwol+
Mo oli krae i go long bigfala hil, blong man i givhan long olgeta.
7 Ol vali* we yu laekem moa
Bambae oli fulap gud long ol wo jariot,
Mo ol hos* bambae oli stanap rere long get,
8 Mo samting we i stap protektem gud Juda, bambae i kamaot.
“Long dei ya, bambae yu lukluk i go long ol tul blong faet we oli putumgud i stap long Haos Blong Ol Tri,+ 9 mo bambae yufala i luk se long stonwol blong Taon Blong Deved, i gat plante ples we i brobrok.+ Mo bambae yufala i stap karem wota long pul blong wota we i stap daon.+ 10 Bambae yufala i kaontem ol haos long Jerusalem, mo bambae yufala i brekemdaon ol haos, blong mekem stonwol i kam strong moa. 11 Mo bambae yufala i mekem wan besin bitwin tufala wol ya, blong wota long olfala pul i ron i go long hem, be bambae yufala i no lukluk i go long Bigfala Man We i Mekem yufala, mo bambae yufala i no luk Man we i wokem samting ya bifo finis.
12 Long dei ya, Hae Masta Jehova komanda blong ol ami,
Bambae i askem ol man blong oli krae mo oli sore,+
Oli sevem hed blong olgeta mo oli werem ol klos we oli wokem long bag.
13 Be no gat, oli girap oli mekem lafet mo oli stap harem gud,
Oli stap kilim buluk mo oli stap kilim sipsip,
Oli stap kakae mit mo oli stap dring waen.+
Oli se: ‘I gud yumi kakae mo yumi dring, from we tumoro bambae yumi ded.’”+
14 Nao Jehova komanda blong ol ami, i toktok long sora blong mi i talem se: “‘Sin ya we yufala i mekem, bambae mi no fogivim gogo yufala i ded.’+ Jehova komanda blong ol ami we hem i Hae Masta, hem nao i talemaot tok ya.”
15 Hemia samting we Hae Masta Jehova komanda blong ol ami i talem i se: “Yu go luk Sebna,+ slef ya we i bos long olgeta samting long haos blong king,* mo yu talem long hem se: 16 ‘?Yu gat wanem bisnes long ples ya, mo i gat wan man long ples ya we yu wantem luk hem, nao yu katem wan hol long ston long ples ya blong oli berem yu long hem?’ Hem i stap katem hol long ston, long wan hae ples blong oli berem hem long hem. Yes, hem i stap katem rere wan ples blong hem blong spel,* long ston long klif. 17 ‘!O strong man, yu luk! Jehova bambae i slingim nogud yu yu godaon, mo i holemtaet yu, i skwisim yu we i no gat sore. 18 Mi talem tru, bambae hem i fasem gud yu mo i slingim yu i go long wan bigfala open ples, olsem we man i slingim wan balong. Bambae yu ded long ples ya, mo ol flas jariot blong yu bambae oli stap long ples ya tu. Yes, yu pulum sem nomo i kam long haos blong masta blong yu. 19 Mo bambae mi tekemaot yu long posisen blong yu, mo mi holem yu, mi sakemaot yu long ofis blong yu.
20 “‘Long dei ya, bambae mi singaot man blong wok blong mi Eliakim,+ we i boe blong Hilkia, 21 mo bambae mi mekem hem i werem longfala kot blong yu, mo mi putum strap blong yu i goraon long hem,+ mo bambae mi mekem hem i holem hae posisen ya blong yu.* Mo bambae hem i papa blong ol man Jerusalem mo olgeta long haos blong Juda. 22 Mo bambae mi putum ki blong haos blong Deved+ long solda blong hem. Bambae hem i openem mo bambae i no gat man i save satem, mo bambae hem i satem mo bambae i no gat man i save openem. 23 Bambae mi putum hem i stap strong long wan ples, olsem nil we oli hamarem i fas strong, mo bambae hem i olsem wan tron* blong glori long haos blong papa blong hem. 24 Mo bambae oli hangem long hem olgeta glori* long haos blong papa blong hem, hemia olgeta we oli kamaot biaen long hem mo ol pikinini blong hem,* ol smosmol samting olsem kap, ol bol we oli raon wetem ol bigbigfala jag tu.
25 “Jehova komanda blong ol ami i talem se: ‘Long dei ya, nil we oli hamarem i fas strong long wan ples, bambae i kamaot,+ mo bambae oli katem i foldaon, mo ol hevi samting we oli hang long hem bambae oli foldaon oli kam nogud, from we Jehova nao i talem.’”