Seken Buk Blong Ol King
21 Manase+ i gat 12 yia taem hem i kam king, mo hem i rul 55 yia long Jerusalem.+ Mama blong hem, nem blong hem Hefsiba. 2 Manase i mekem samting we i nogud long ae blong Jehova, mo i stap folem ol nogud samting we ol nesen oli bin mekem,+ hemia ol nesen we Jehova i bin ronemaot olgeta long fored blong ol man Isrel.+ 3 Mo hem i wokem bakegen ol hae ples blong wosip we papa blong hem Hesekia i bin spolem,+ mo i wokem ol olta blong ol god ya Bal mo wan tabu pos,*+ stret olsem we King Ehab blong Isrel i bin mekem.+ Mo hem i bodaon long olgeta ami blong heven, mo i wosipim olgeta.+ 4 Mo tu, hem i wokem ol olta insaed long haos blong Jehova,+ hemia ples ya we Jehova i bin talem se: “Bambae nem blong mi i stap long Jerusalem.”+ 5 Mo insaed long tufala yad blong haos blong Jehova,+ hem i wokem ol olta blong olgeta ami blong heven.+ 6 Mo tu, hem mekem prapa boe blong hem i pastru long faea, i mekem majik, i lukluk ol saen blong talemaot fiuja,+ mo i putumap ol man we oli stap toktok wetem ol dedman mo ol man we oli stap talemaot fiuja.+ Hem i mekem ol samting we oli nogud long ae blong Jehova we i bitim mak olgeta, blong mekem hem i kros.
7 Hem i putum pija blong tabu pos*+ ya we hem i katem, insaed long haos ya we Jehova i bin talem long Deved mo long boe blong hem Solomon se: “Long olgeta traeb blong Isrel, mi mi jusumaot haos ya mo Jerusalem, blong mi putum nem blong mi i stap oltaem long hem.+ 8 Mo sipos ol man Isrel oli obeigud long olgeta samting we mi mi talemaot long olgeta,+ hemia ful Loa we man blong wok blong mi Moses i talem long olgeta blong oli folem, bambae mi neva mekem se leg blong ol man Isrel oli gowe long kantri ya we mi givim long ol olfala blong olgeta.”+ 9 Be olgeta oli no obei, mo Manase tu i gohed blong lidim olgeta oli gowe long stret rod, nao oli mekem plante moa rabis samting i bitim ol nesen ya we Jehova i bin kilim olgeta oli ded long fored blong ol man Isrel.+
10 Jehova i gohed blong toktok long olgeta tru long ol man blong wok blong hem, hemia ol profet,+ i se: 11 “Manase we i king blong Juda i mekem olgeta nogud samting ya. Hem i mekem i moa nogud i bitim olgeta man Amoro+ we oli laef bifo long hem,+ mo hem i yusum ol aedol ya we oli nogud we oli nogud* we hem i wokem blong pulum ol man Juda blong oli mekem sin. 12 Taswe hemia samting we Jehova we i God blong Isrel i talem: ‘Bambae mi mekem wan bigfala trabol i kasem Jerusalem+ mo Juda, mo ol man bambae oli sek taem oli harem.*+ 13 Mo bambae mi yusum teplaen+ we i blong Sameria,+ blong mesarem Jerusalem. Mo bambae mi yusum tul blong levelem samting* we i blong haos blong Ehab,+ blong levelem Jerusalem. Mo bambae mi waepem Jerusalem i klin, stret olsem we wan man i waepem wan bol blong klinim, i waepem mo i tanem ova.+ 14 Bambae mi lego smol haf blong ol man blong mi we oli laef yet i stap,+ mo mi putum olgeta long han blong ol enemi blong olgeta, nao bambae ol enemi blong olgeta oli holemtaet olgeta mo oli stilim ol gudgudfala samting blong olgeta.+ 15 Samting ya i hapen from we olgeta oli gohed blong mekem samting we i nogud long ae blong mi, mo oli gohed blong mekem mi mi kros, i stat long dei ya we ol olfala blong olgeta oli aot long Ijip kam kasem tede.’”+
16 Mo tu, Manase i mekem blad blong plante stret man i ron gogo i fulumap Jerusalem, stat long wan en i go kasem narafala en.+ Hem i mekem samting ya, antap long sin we hem i mekem taem hem i pulum ol man Juda blong oli mekem samting we i nogud long ae blong Jehova, nao oli mekem sin. 17 Ol narafala stori blong Manase, olgeta samting we hem i mekem, mo ol sin we hem i mekem, oli raetemdaon long buk blong histri blong ol king blong Juda. 18 Biaen Manase i go spel wetem ol olfala blong hem, mo oli berem hem long garen long haos blong hem, hemia garen blong Usa.+ Mo boe blong hem Amon i kam king long ples blong hem.
19 Amon+ i gat 22 yia taem hem i kam king, mo hem i rul tu yia long Jerusalem.+ Mama blong hem, nem blong hem Mesulemet mo hem i gel blong Haruj we i blong Jotbaha. 20 Amon i gohed blong mekem samting we i nogud long ae blong Jehova, stret olsem we papa blong hem Manase i bin mekem.+ 21 Hem i gohed blong wokbaot long olgeta rod we papa blong hem i folem, mo i gohed blong mekem wosip mo bodaon long ol aedol we oli nogud we oli nogud we papa blong hem i bin wosipim.+ 22 Long rod ya, hem i lego Jehova we i God blong ol olfala blong hem, mo i no wokbaot long rod blong Jehova.+ 23 Biaen, ol man blong wok blong Amon oli mekem rabis plan agensem hem, nao oli kilim king i ded long prapa haos blong hem. 24 Be ol man blong kantri ya oli kilim i ded evri man we oli mekem rabis plan agensem King Amon, mo oli mekem boe blong hem Josaea blong i kam king long ples blong hem.+ 25 Ol narafala stori blong Amon, mo ol samting we hem i mekem, oli raetemdaon long buk blong histri blong ol king blong Juda. 26 Oli berem Amon long gref blong hem long garen blong Usa,+ mo boe blong hem Josaea,+ i kam king long ples blong hem.