Fas Buk Blong Kronikel

7 Ol boe blong Isakara, i gat Tola, Pua, Jasub, mo Simron.+ Olgeta fo. 2 Mo ol boe blong Tola, i gat Usi, Refaea, Jeriel, Jamae, Ibsam, mo Semuel. Olgeta ya oli hed long haos blong papa blong olgeta. Olgeta we oli kamaot biaen long Tola, oli ol strong man blong faet, mo long taem blong Deved, namba blong olgeta i kasem 22,600. 3 Mo olgeta we oli kamaot biaen long* Usi, i gat Israhaea, mo ol boe blong Israhaea, i gat Maekel, Obadaea, Joel, mo Isaea, olgeta faef ya oli ol jif.* 4 Mo from we oli gat plante waef mo boe, oli gat 36,000 soldia we oli kamaot biaen long olgeta, long haos blong papa blong olgeta. Ol soldia ya oli stap long ami blong olgeta mo oli rere blong faet. 5 Mo ol brata blong olgeta we oli kamaot long olgeta famle blong Isakara, oli ol strong man blong faet, mo namba blong olgeta i 87,000, olsem we i stap long lis blong ol famle.+

6 Ol boe blong Benjamin,+ i gat Bela,+ Bekere,+ mo Jediael.+ Olgeta tri. 7 Mo ol boe blong Bela, i gat Esbon, Usi, Usiel, Jerimot, mo Iri. Olgeta oli faef, mo oli hed long haos blong papa blong olgeta, oli ol strong man blong faet, mo long lis blong famle blong olgeta, olgeta evriwan oli 22,034 man.+ 8 Mo ol boe blong Bekere, i gat Jemira, Joas, Eliesa, Elioenae, Omri, Jeremot, Abaejah, Anatot, mo Alemet. Olgeta evriwan ya oli boe blong Bekere. 9 Mo long lis blong ol famle we i gat nem blong olgeta we oli hed blong haos blong papa blong olgeta mo olgeta we oli kamaot biaen long olgeta, i gat 20,200 man we oli ol strong man blong faet. 10 Mo ol boe blong Jediael,+ i gat Bilhan mo ol boe blong Bilhan: hemia Jehus, Benjamin, Ehud, Kenahana, Jitan, Tasis, mo Ahisahara. 11 Olgeta evriwan ya oli ol boe blong Jediael, folem olgeta we oli hed long haos blong papa blong olgeta. Olgeta oli 17,200 strong man blong faet we oli rere blong joenem ami blong go faet.

12 Ol Supim mo ol Hupim oli ol boe blong Ia.+ Ol Husim oli ol boe blong Ahere.

13 Ol boe blong Naftali,+ i gat Jahjiel, Guni, Jeja, mo Salum. Olgeta ya oli kamaot biaen long* Bilhaha.+

14 Ol boe blong Manase+ i olsem: Asriel, we narafala woman blong hem blong Siria i bonem. (Woman ya i bonem Makiri+ we i papa blong Gilead. 15 Makiri ya i faenem wan waef blong Hupim mo wan waef blong Supim, mo nem blong sista blong hem Mahaka.) Nem blong sekenbon blong hem Jelofehad,+ be Jelofehad i gat ol gel nomo.+ 16 Mahaka we i waef blong Makiri, i bonem wan boe mo i putum nem blong hem se Peres. Mo nem blong brata blong hem Seres. Mo ol boe blong hem, i gat Ulam mo Rekem. 17 Mo boe* blong Ulam, hemia Bedan. Olgeta ya oli ol boe blong Gilead ya we i boe blong Makiri, mo i smol bubu blong Manase. 18 Mo sista blong hem, hemia Hamoleket. Hem i bonem Isod, Abiesa, mo Mala. 19 Mo ol boe blong Semida, i gat Ahian, Sekem, Liki, mo Aniam.

20 Ol boe blong Efrem,+ i gat Sutela,+ Bered we i boe blong Sutela, Tahat we i boe blong Bered, Eliada we i boe blong Tahat, Tahat we i boe blong Eliada, 21 Sabad we i boe blong Tahat, Sutela we i boe blong Sabad. Mo i gat Eja, mo Elead tu we tufala i boe blong Efrem. Be ol man blong Gat+ we oli bon long ples ya, oli kilim tufala i ded from we oli kamdaon blong tekem ol animol blong olgeta. 22 Nao Efrem we i papa blong tufala i gohed blong sore blong plante dei, mo ol brata blong hem oli gohed blong kam luk hem blong mekem hem i harem gud bakegen. 23 Biaen hem i mekem seks wetem waef blong hem nao waef blong hem i gat bel mo i bonem wan boe. Be hem i putum nem blong boe ya se Beria* from we trabol ya i kasem hem taem woman ya i stap long haos blong hem. 24 Mo gel blong hem, hemia Sehera, mo hem nao i bildim Betoron Antap+ mo Betoron Daon,+ mo Usensehera. 25 Mo i gat Refa we i boe blong hem, mo Resef, Tela we i boe blong Resef, Tahan we i boe blong Tela, 26 Lahadan we i boe blong Tahan, Amihud we i boe blong Lahadan, Elisama we i boe blong Amihud, 27 Nun we i boe blong Elisama, mo Josua*+ we i boe blong Nun.

28 Ol graon mo ol vilej blong olgeta, hemia Betel+ wetem ol taon we oli dipen* long hem, mo long saed i go long is i gat Naharan, mo long saed i go long wes i gat Gesa wetem ol taon we oli dipen long hem, mo i gat Sekem wetem ol taon we oli dipen long hem, mo i gohed kasem Aya* wetem ol taon we oli dipen long hem. 29 Mo klosap long olgeta we oli kamaot biaen long Manase, i gat Betsean+ wetem ol taon we oli dipen long hem, Tahanak+ wetem ol taon we oli dipen long hem, Megido+ wetem ol taon we oli dipen long hem, mo Doro+ wetem ol taon we oli dipen long hem. Hemia nao ol ples we olgeta we oli kamaot biaen long Josef we i boe blong Isrel, oli stap long hem.

30 Ol boe blong Asere, i gat Imnaha, Isva, Isvae, mo Beria,+ mo sista blong olgeta Sera.+ 31 Mo ol boe blong Beria, i gat Heba mo Malkiel, we i papa blong Birisavit. 32 Heba i kam papa blong Jaflet, Somere, mo Hotam, wetem Sua we i sista blong olgeta. 33 Ol boe blong Jaflet, i gat Pasak, Bimal, mo Asvat. Hemia nao ol boe blong Jaflet. 34 Ol boe blong Semere,* i gat Ahi, Roga, Jehuba, mo Aram. 35 Mo ol boe blong brata blong hem Helem,* i gat Jofaha, Imna, Seles, mo Amal. 36 Ol boe blong Jofaha, i gat Sua, Hanefa, Sual, Beri, Imra, 37 Bejere, Hod, Sama, Silsaha, Itran, mo Behera. 38 Ol boe blong Jeta, i gat Jefune, Pispa, mo Ara. 39 Ol boe blong Ulaha, i gat Araha, Haniel, mo Rijia. 40 Olgeta evriwan ya oli ol boe blong Asere, oli hed long haos blong papa blong olgeta, oli ol strong man blong faet we oli jusumaot olgeta, mo oli hed blong ol jif. Mo namba blong olgeta long lis blong ol famle,+ i 26,000 man+ we oli joen long ami mo oli rere blong faet.