Esikel
19 “Yu mas singsing long wan singsing sore* long saed blong ol jif blong Isrel, 2 mo yu talem se:
‘?Mama blong yu i olsem wanem? Wan woman laeon long medel blong ol laeon.
Hem i ledaon long medel blong ol yang laeon* we oli strong, mo i stap lukaot long ol smol pikinini blong hem.
3 Hem i lukaot gud long wan long ol pikinini blong hem, nao i kam wan yang laeon we i strong.+
Hem i lanem blong terem kakae blong hem,
Mo i kakae ol man tu.
4 Ol nesen oli harem nius blong hem, nao oli kasem hem long wan hol long graon we oli digim,
Mo oli putum ol huk long hem mo oli tekem hem i go long kantri ya Ijip.+
5 Mama ya i wet mo biaen i kasem save se hem i no moa save kambak.
Ale hem i tekem wan narafala pikinini blong hem, mo i sanem hem i go olsem wan yang laeon we i strong.
6 Nao hem tu i wokbaot long medel blong ol laeon mo i kam wan yang laeon we i strong.
Hem i lanem blong terem kakae blong hem, mo i kakae ol man tu.+
7 Hem i stap raonem ol strongfala taoa blong olgeta mo i spolem ol taon blong olgeta,
Nao voes blong hem we i singaot bigwan i fulumap kantri ya we i emti nomo i stap.+
8 Ol nesen long ol distrik raonabaot oli kam agensem hem blong sakem net blong olgeta antap long hem,
Mo hem i foldaon long wan hol we oli digim.
9 Oli putum ol huk long hem mo oli putum hem long wan kej, mo oli tekem hem i go long king blong Babilon.
Long ples ya, oli putum hem long kalabus, blong ol man oli no moa harem voes blong hem antap long ol bigfala hil blong Isrel.
10 Mama blong yu i olsem wan rop blong grep+ long blad blong yu,* we oli planem klosap long ol wota.
Hem i karem frut mo i gat plante branj from i gat plante wota.
11 Hem i gat ol branj* we oli strong, we oli naf blong yusum olsem ol septa* blong ol rula.
Hem i gru mo i kam longfala moa long ol narafala tri,
Nao ol man oli save luk hem from we hem i hae mo i gat plante lif blong hem.
12 Be God i kros nao i rutumaot hem+ mo i sakem hem i godaon long graon,
Mo iswin i mekem ol frut blong hem oli drae.
Oli brekemaot ol branj blong hem we oli strong nao oli kam drae+ mo faea i bonem olgeta.+
13 Naoia oli planem hem long draeples,
Long wan ples we i drae, i no gat wota nating long hem.+
14 Faea i stat long ol branj* blong hem mo i spred i go, i bonem ol gru mo ol frut blong hem,
Mo i no gat wan strongfala branj i stap o wan septa blong rul.+
“Hemia wan singsing sore, mo bambae i stap olsem wan singsing sore.”