Seken Buk Blong Kronikel
11 Taem Rehoboam i kamtru long Jerusalem, kwiktaem nomo hem i hivimap haos blong Juda mo Benjamin+ i kam wanples, olgeta 180,000 strong man blong faet we oli trengud,* blong oli go faet agensem Isrel, blong oli save putumbak kingdom blong Rehoboam.+ 2 Nao tok blong Jehova i kamtru long Semaea+ we i wan man blong tru God, i se: 3 “Yu talem long Rehoboam, boe blong Solomon we i king blong Juda, mo long olgeta man Isrel we oli stap long Juda mo long Benjamin, se: 4 ‘Hemia samting we Jehova i talem: “Yufala i no mas go faet agensem ol brata blong yufala. Yufala wanwan i gobak long haos blong yufala, from we mi nao mi mekem samting ya i hapen.”’”+ Nao olgeta oli obei long tok blong Jehova mo oli gobak, oli no moa go faet agensem Jeroboam.
5 Rehoboam i stap long Jerusalem mo i bildim ol bigfala taon long Juda we stonwol i goraon long olgeta. 6 Long fasin ya, hem i bildim* Betlehem,+ Etam, Tekoa,+ 7 Betjuru, Soko,+ Adulam,+ 8 Gat,+ Maresa, Sif,+ 9 Adoraem, Lakis,+ Aseka,+ 10 Joraha, Aealon,+ mo Hebron.+ Hemia ol bigfala taon long Juda mo Benjamin we oli gat stonwol i goraon long olgeta. 11 Mo tu, ol ples we stonwol i goraon long olgeta, hem i mekem oli kam strong bakegen mo i putumap ol komanda long ol ples ya, mo i stap givim kakae, oel, mo waen long olgeta, 12 mo hem i givim ol bigfala sil mo ol longfala spia long olgeta defdefren taon, mo i mekem ol taon ya oli kam strong moa. Mo hem i gohed blong rul long Juda mo Benjamin.
13 Nao ol pris mo ol Livaet we oli stap long olgeta ples long Isrel, oli aot long ol teritori blong olgeta mo oli kam sapotem hem. 14 Ol Livaet oli lego ol ples we oli stap putum ol animol blong olgeta long hem, mo ol samting blong olgeta,+ nao oli kam long Juda mo long Jerusalem. Hemia from we Jeroboam wetem ol boe blong hem, oli tekemaot olgeta nao oli no moa wok olsem ol pris blong Jehova.+ 15 Biaen Jeroboam i putumap ol prapa pris blong hem blong oli wok long ol hae ples blong wosip,+ mo blong oli pris blong ol dimon we oli luk olsem nani,*+ mo blong ol yang buluk we hem i bin wokem.+ 16 Be ol man long olgeta traeb blong Isrel we oli gat strong tingting blong gohed blong lukaot Jehova we i God blong Isrel, olgeta tu oli biaen long ol pris mo ol laen blong Livae ya i go long Jerusalem blong mekem sakrefaes i go long Jehova, God blong ol olfala blong olgeta.+ 17 Blong tri yia, olgeta oli mekem rul blong Juda i kam strong mo oli sapotem Rehoboam we i boe blong Solomon, from we oli wokbaot folem rod blong Deved mo Solomon blong tri yia.
18 Biaen Rehoboam i tekem Mahalat blong i kam waef blong hem. Mahalat ya, papa blong hem Jerimot we i boe blong Deved, mo mama blong hem Abihael we i gel blong Eliab ya we i boe blong Jese.+ 19 Samtaem biaen, Mahalat i bonem ol boe blong Rehoboam. I gat Jehus, Semaria, mo Saham. 20 Afta long woman ya, Rehoboam i maredem Mahaka we i smol bubu blong Absalom.+ Mo samtaem biaen, Mahaka i bonem ol boe blong Rehoboam. I gat Abaejah,+ Atae, Jija, mo Selomit. 21 Rehoboam i lavem moa Mahaka we i smol bubu blong Absalom, i bitim olgeta narafala waef mo ol narafala woman blong hem,+ from we hem i gat 18 waef mo 60 narafala woman, mo hem i kam papa blong 28 boe mo 60 gel. 22 Nao Rehoboam i putumap Abaejah we i boe blong Mahaka, blong i hed mo i lida long medel blong ol brata blong hem, from we hem i wantem mekem hem i kam king. 23 Be hem i gat hed taswe i sanem sam long ol boe blong hem blong oli go stap long olgeta rijen blong Juda mo Benjamin, long olgeta bigfala taon we stonwol i goraon long olgeta.+ Mo hem i givim plante samting long olgeta mo i tekem plante woman blong oli kam waef blong olgeta.