Esikel

14 Nao sam long ol elda blong Isrel oli kam mo oli sidaon long fored blong mi.+ 2 Nao tok blong Jehova i kamtru long mi, i se: 3 “Pikinini blong man, ol man ya oli gat strong tingting blong folem ol aedol blong olgeta we oli nogud we oli nogud,* mo oli putumap wan ston blong mekem ol man oli stambol nao oli mekem sin. ?Bambae mi letem olgeta oli kam askem tingting blong mi?+ 4 Naoia yu toktok long olgeta mo yu talem long olgeta se: ‘Hemia samting we Hae Masta Jehova i talem: “Sipos wan man Isrel i gat strong tingting blong folem ol aedol blong hem we oli nogud we oli nogud, mo i putumap wan ston blong mekem ol man oli stambol nao oli mekem sin, mo biaen hem i kam luk wan profet blong faenemaot tingting blong mi, mi, Jehova, bambae mi ansa long hem stret folem plante aedol blong hem we oli nogud we oli nogud. 5 From we bambae mi mi mekem bigfala fraet i kasem hat blong haos blong Isrel, from we olgeta evriwan oli gowe long mi mo oli go biaen long ol aedol blong olgeta we oli nogud we oli nogud.”’+

6 “So yu talem long haos blong Isrel se: ‘Hemia samting we Hae Masta Jehova i talem: “Yufala i kambak, mo yufala i tanem baksaed blong yufala long ol aedol blong yufala we oli nogud we oli nogud, mo yufala i tanem fes blong yufala i gowe long olgeta rabis fasin blong yufala.+ 7 From we sipos eni man Isrel o eni man blong narafala kantri we i stap long Isrel, i gowe long mi mo i gat strong tingting blong folem ol aedol blong hem we oli nogud we oli nogud, mo i putumap wan ston blong mekem ol man oli stambol nao oli mekem sin, mo biaen hem i kam luk profet blong mi blong faenemaot tingting blong mi,+ mi, Jehova, mi nao bambae mi ansa long hem. 8 Mi bambae mi fesem man ya mo mi mekem hem i kam wan saen blong wonem ol man mo wan proveb, mo bambae mi katemaot hem long ol man blong mi,+ nao bambae yufala i mas save se mi mi Jehova.”’

9 “‘Be sipos oli trikim profet ya nao hem i givim wan ansa, hemia i from we mi Jehova, mi nao mi trikim profet ya.+ Nao bambae mi mi stretem han blong mi i kam agensem hem mo mi aotem hem long ol man blong mi, ol man Isrel. 10 Bambae olgeta oli mas karem ol fol blong olgeta. Fol blong man we i askem tingting blong mi bambae i sem mak long fol blong profet, 11 olsem nao haos blong Isrel bambae i stop blong gowe long mi, mo i stop blong kam doti from ol sin blong olgeta. Nao bambae olgeta oli kam ol man blong mi, mo mi bambae mi kam God blong olgeta,’+ hemia nao tok blong Hae Masta Jehova.”

12 Mo tok blong Jehova i kamtru bakegen long mi, i se: 13 “Pikinini blong man, sipos wan kantri i mekem sin agens long mi taem i no holemstrong long mi, bambae mi stretem han blong mi i kam agensem kantri ya mo mi spolem ples blong kakae* blong kantri ya,+ mo bambae mi mekem kakae i sot long kantri ya+ mo mi katemaot ol man mo ol animol long ples ya.”+ 14 “‘Nating sipos trifala man ya Noa,+ Daniel,+ mo Job,+ trifala i stap long kantri ya, be bambae oli naf blong sevem prapa laef blong olgeta* nomo from stret fasin blong olgeta,’+ hemia nao tok blong Hae Masta Jehova.”

15 “‘O tingbaot sipos mi mekem ol rabis wael animol oli pastru long kantri ya, mo oli mekem namba blong ol man i godaon* mo oli mekem kantri ya i stap nating nomo, we i no gat man i save pastru long hem from ol wael animol ya.’+ 16 Hae Masta Jehova i talem se: ‘Mi talem long yu long nem blong mi we mi laef i stap se, nating sipos trifala man ya i stap long kantri ya, be bambae oli no sevem ol boe mo ol gel blong olgeta. Bambae oli sevem prapa laef blong olgeta nomo, mo kantri ya bambae i emti nomo i stap.’”

17 “‘O tingbaot sipos mi mekem wan naef blong faet i kam agensem kantri ya+ mo mi talem se: “I gud wan naef blong faet i pastru long kantri ya,” nao i katemaot ol man mo ol animol long kantri ya,’+ 18 Hae Masta Jehova i talem se: ‘Nating sipos trifala man ya i stap long kantri ya, mi talem long yu long nem blong mi we mi laef i stap se, bambae olgeta oli no sevem ol boe mo ol gel blong olgeta. Bambae oli sevem prapa laef blong olgeta nomo.’”

19 “‘O tingbaot sipos mi sanem wan strong sik i kam long kantri ya,+ mo mi kafsaedem kros blong mi i kam long hem, taem mi mekem blad i ron blong katemaot ol man mo ol animol long kantri ya,’ 20 Hae Masta Jehova i talem se: ‘Nating sipos Noa,+ Daniel,+ mo Job,+ oli stap long kantri ya, mi talem long yu long nem blong mi we mi laef i stap se, bambae olgeta oli no sevem ol boe mo ol gel blong olgeta. Bambae oli sevem prapa laef blong olgeta* nomo from stret fasin blong olgeta.’”+

21 “Hemia samting we Hae Masta Jehova i talem: ‘Samting ya bambae i kamtru taem mi sanem ol fofala panis blong mi*+ oli kam agensem Jerusalem. Ol panis ya, hemia naef blong faet, kakae i sot, ol rabis wael animol, mo strong sik,+ blong katemaot ol man mo ol animol long ples ya.+ 22 Be sam long olgeta we oli laef i stap bambae oli ronwe mo ol man bambae oli tekemaot olgeta,+ hemia ol boe wetem ol gel. Olgeta oli stap kam long yufala, mo taem yufala i luk ol fasin blong olgeta mo ol samting we oli mekem, bambae tingting blong yufala i harem gud from bigfala trabol we mi mekem long Jerusalem, long evri samting we mi mekem long hem.’”

23 “‘Bambae olgeta oli mekem tingting blong yufala i harem gud, taem yufala i luk ol fasin blong olgeta mo ol samting we oli mekem, nao bambae yufala i save se i gat risen from wanem mi mi mas mekem samting ya,’+ hemia tok we Hae Masta Jehova i talem.”