Esikel

10 Taem mi stap lukluk, mi luk we antap long platfom we i stap antap long hed blong ol jerubim ya, i gat wan samting we i luk olsem ston ya safaea we i kamaot antap long olgeta, mo sep blong hem i olsem wan tron.*+ 2 Nao God i talem long man we i werem linen klos+ se: “Yu go insaed bitwin ol wil ya,+ aninit long ol jerubim ya, mo yu fulumap tufala han blong yu long sakol we i laet+ we i stap bitwin ol jerubim ya, mo yu sakem ol sakol ya i go long taon ya.”+ Ale hem i go insaed taem mi stap lukluk.

3 Ol jerubim ya oli stap stanap long raetsaed blong haos taem man ya i go insaed, mo klaod i kam fulap long yad blong haos ya, hemia yad insaed. 4 Nao glori blong Jehova+ i girap, i muvaot long ol Jerubim ya mo i go long fored blong doa blong haos ya, nao sloslo klaod i fulumap haos ya,+ mo bigfala laet blong glori blong Jehova i fulumap yad ya. 5 Mo noes blong ol wing blong ol jerubim ya, man we i stap long yad aotsaed i save harem, noes blong hem i olsem noes blong God Ya We i Gat Olgeta Paoa taem hem i toktok.+

6 Biaen hem i talem long man we i werem linen klos se: “Yu tekem faea we i stap bitwin ol wil ya, hemia bitwin ol Jerubim.” Ale hem i go insaed mo i stanap long saed blong wil. 7 Nao wan long ol jerubim ya i stretem han blong hem i go long faea we i stap bitwin ol jerubim.+ Ale hem i tekem sam faea mo i putum long tufala han blong man ya we i werem linen klos,+ nao man ya i tekem mo i aot. 8 Ol jerubim ya oli gat wan samting we i luk olsem sep blong han blong man, we i stap aninit long ol wing blong olgeta.+

9 Taem mi stap lukluk, mi luk fo wil long saed blong ol jerubim ya, wan wil long saed blong ol jerubim ya wanwan, mo i luk olsem se ol wil ya oli saen olsem ston ya krisolaet.+ 10 Long saed blong sep blong olgeta, ol fofala wil ya oli sem mak nomo, i luk olsem se wan wil i stap insaed long wan narafala wil. 11 Taem oli muv, oli save muv i go long eniwan long ol fo saed we oli no nid blong tanem olgeta, from we oli stap go long ples we hed blong olgeta i fesem, so oli no nid blong tanem olgeta. 12 Raon long ful bodi blong ol jerubim ya, baksaed blong olgeta, ol han blong olgeta, ol wing blong olgeta, mo long ol wil, hemia wil blong fofala, i fulap long ol ae.+ 13 Long saed blong ol wil ya, mi harem wan voes i singaot i go long olgeta se: “!Ol wil!”

14 Olgeta wanwan* oli gat fo fes. Faswan fes i fes blong Jerubim, sekenwan i fes blong wan man, namba 3 i fes blong wan laeon, mo namba 4 i fes blong wan igel.+

15 Ol jerubim ya hemia ol sem laef samting ya* we mi bin luk long Kebara Reva.+ Olgeta oli go antap 16 mo taem oli muv, ol wil ya tu oli muv wetem olgeta. Mo taem ol jerubim ya oli leftemap ol wing blong olgeta i go antap, blong i hae i bitim wol, ol wil ya oli no tanem olgeta o muvaot long saed blong olgeta.+ 17 Taem ol jerubim ya oli stop, ol wil ya tu oli stop. Mo taem oli go antap, ol wil ya tu oli go antap wetem olgeta, from we spirit we i stap wok long ol laef samting ya,* hem i stap tu long ol wil ya.

18 Nao glori blong Jehova+ i aot long fored blong doa blong haos ya mo i go stanap kwaet antap long ol jerubim ya.+ 19 Nao taem mi stap lukluk, ol jerubim ya oli leftemap ol wing blong olgeta mo oli aot long wol ya. Mo ol wil ya oli stap long saed blong olgeta taem oli go. Olgeta oli stop long entrens blong get we i stap long is blong haos blong Jehova, mo glori blong God blong Isrel i stap antap long olgeta.+

20 Hemia ol laef samting* we mi bin luk long Kebara Reva,+ we oli stap aninit long God blong Isrel, taswe mi kasem save se olgeta oli ol jerubim. 21 Fofala oli gat fo fes, fo wing, mo i gat wan samting we i luk olsem han blong man, we i stap aninit long ol wing blong olgeta.+ 22 Mo fes blong olgeta i luk olsem ol fes we mi bin luk klosap long Kebara Reva.+ Mo olgeta wanwan oli go stret long fored.+