Seken Buk Blong Ol King

23 Nao king i sanem tok i go, ale oli singaot olgeta elda blong Juda mo Jerusalem blong oli kam.+ 2 Biaen, king i go antap long haos blong Jehova, hem wetem olgeta man Juda, olgeta man Jerusalem, ol pris, mo ol profet, hemia evri man, i stat long olgeta we oli no gat nem i go kasem ol haeman. Ale hem i ridim olgeta tok we oli stap long buk+ blong kontrak+ we oli bin faenem insaed long haos blong Jehova,+ mo olgeta man oli stap lesin long hem. 3 Nao king i stanap klosap long bigfala pos mo i mekem wan kontrak* long fored blong Jehova,+ se bambae hem i biaen long Jehova mo i holemtaet ol komanmen, ol rimaenda, mo ol loa blong hem long olgeta hat mo olgeta sol* blong hem, hemia taem hem i folem ol tok blong kontrak ya we oli raetem long buk ya. Nao olgeta man oli agri long kontrak ya.+

4 Biaen king i talem long hae pris ya Hilkia,+ wetem ol narafala pris, mo ol pris we oli stap gad long doa, blong oli tekemaot olgeta samting we i stap insaed long haos blong Jehova, we ol man oli bin wokem blong Bal, blong tabu pos,*+ mo blong olgeta ami blong heven. Biaen hem i tekem ol samting ya i go aotsaed long Jerusalem, long saed blong hil blong Kedron, mo i bonem olgeta long ples ya. Biaen hem i tekem ol asis blong olgeta i go long Betel.+ 5 Long taem ya, i gat ol pris blong ol narafala god we ol king blong Juda oli bin putumap olgeta blong oli mekem sakrefaes we i smok long ol hae ples blong wosip long ol taon blong Juda mo long ol ples raonabaot long Jerusalem. Mo tu, i gat olgeta we oli stap mekem sakrefaes we i smok i go long Bal, long san, long mun, long grup blong ol sta, mo long olgeta ami blong heven. Be king i tekemaot olgeta evriwan, nao oli no moa mekem wok ya.+ 6 Hem i tekemaot tabu pos*+ ya we i stap insaed long haos blong Jehova, i tekem i go long Kedron Vali we i stap aotsaed long Jerusalem, mo i bonem+ long ples ya. Biaen hem i kilkilim i kam das mo i saksakem olbaot long ol gref blong ol man.+ 7 Mo tu hem i brekemdaon ol haos blong ol man we oli ol tempol prostitut.+ Ol haos ya oli stap long haos blong Jehova, mo ol woman oli stap wivim ol tent blong tabu pos* long hem.

8 Biaen hem i tekemaot olgeta pris long ol taon blong Juda, mo hem i mekem se ol hae ples we ol pris oli stap mekem sakrefaes i smok long hem i stat long Geba+ i go kasem Bereseba,+ oli kam ol ples we oli no moa stret blong ol man oli mekem wosip long hem. Mo tu, hem i brekemdaon ol hae ples we oli stap long ol get, long lefsaed blong ol man we oli kam insaed long get blong Josua we i jif blong taon ya. 9 Ol pris blong ol hae ples ya, oli no wok long olta blong Jehova we i stap long Jerusalem,+ be oli joen wetem ol brata blong olgeta blong kakae bred ya we i no gat is long hem. 10 Mo tu, king i mekem Tofet+ we i stap long Vali Blong Ol Boe Blong Hinom,*+ i kam wan ples we i no moa stret blong ol man oli mekem wosip long hem, olsem nao i no moa gat man i save mekem boe o gel blong hem i pastru long faea blong givim i go long Molek.+ 11 King i blokem ol hos tu we ol king blong Juda oli dediketem finis* i go long san, blong oli no pas long rum blong haeman ya Natanmelek blong go long haos blong Jehova. Hemia rum ya we i stap insaed long wan vranda. Mo hem i bonem ol jariot blong san+ long faea. 12 Long rum blong Ahas, long haf blong hem antap, ol king blong Juda oli bin stanemap ol olta antap long ruf+ blong hem, be king i brekemdaon olgeta mo hem i brekemdaon tu ol olta we Manase i bin stanemap long tufala yad blong haos blong Jehova.+ Hem i smasem ol olta ya i kam das mo i saksakem olbaot long Kedron Vali. 13 Mo king i mekem ol hae ples blong wosip oli kam ol ples we i no moa stret blong man i mekem wosip long olgeta. Ol hae ples ya oli stap long fored long Jerusalem, long saot* blong Hil Blong Spolem Samting.* King Solomon blong Isrel i bin wokem ol hae ples ya blong Astoret we i woman god blong ol man Saedon we i nogud we i nogud, mo blong Kemos, god blong ol man Moab we i nogud we i nogud, mo blong Milkom+ rabis god blong ol man Amon.+ 14 Hem i brebrekem ol tabu ston i go long ol smosmol pis, mo i katemdaon ol tabu pos,*+ mo i putum ol bun blong ol dedman long ples blong olgeta. 15 Mo tu, hem i brekemdaon olta long Betel, wetem hae ples we Jeroboam, boe blong Nebat, i bin wokem, nao i pulum ol man Isrel blong oli mekem sin.+ Afta we hem i brekemdaon olta mo hae ples ya, hem i bonem hae ples ya long faea, mo i brebrekem i kam das mo tu, hem i bonem tabu pos* ya.+

16 Nao taem Josaea i tanem hem mo i luk ol gref we oli stap antap long bigfala hil ya, hem i mekem oli tekemaot ol bun blong ol dedman long ol gref ya, mo i bonem olgeta antap long olta, blong mekem se man i no moa yusum olta ya blong mekem wosip. Hemia i folem tok blong Jehova, we man blong tru God i bin talemaot se bambae i hapen.+ 17 Biaen Josaea i talem se: “Mi luk wan gref longwe, ?hemia blong hu ya?” Nao ol man blong taon ya oli talem se: “Hemia gref blong man blong tru God we i aot long Juda+ i kam, hem nao i bin talemaot ol samting ya we yu mekem agensem olta blong Betel.” 18 Ale hem i talem long olgeta se: “Yufala i letem hem i spel long ples ya. Yufala i no distebem ol bun blong hem.” Ale oli no distebem ol bun blong hem, wetem bun blong profet ya tu we i bin aot long Sameria i kam.+

19 Mo tu, olgeta haos wosip we oli stap antap long ol hae ples long ol taon blong Sameria,+ we ol king blong Isrel oli bin wokem blong mekem God i kros, Josaea i tekemaot olgeta evriwan mo i mekem sem samting long olgeta olsem we i bin mekem long hae ples we i stap long Betel.+ 20 Nao olgeta pris blong ol hae ples we oli stap yet long ol ples ya, hem i kilim olgeta oli ded antap long ol olta, mo i bonem ol bun blong ol dedman tu antap long ol olta ya.+ Biaen long samting ya, hem i gobak long Jerusalem.

21 Nao king i talem long olgeta man se: “Yufala i mekem wan Pasova+ blong Jehova we i God blong yufala, olsem we oli raetemdaon long buk ya blong kontrak.”+ 22 I no gat wan Pasova we i olsem hemia we oli mekem, i stat long taem ya we ol jaj oli stap jajem ol man Isrel, o long olgeta taem blong ol king blong Isrel mo ol king blong Juda.+ 23 Be long namba 18 yia blong rul blong King Josaea, oli mekem Pasova ya blong Jehova long Jerusalem.

24 Mo tu, Josaea i aotem ol man we oli stap toktok wetem ol dedman, ol man we oli stap talemaot fiuja,+ ol aedol ya terafim,*+ ol aedol we oli nogud we oli nogud,* mo olgeta samting we oli nogud we oli nogud we oli bin kamaot long Juda mo long Jerusalem. Hem i mekem olsem folem ol tok blong Loa+ we oli raetem long buk we pris ya Hilkia i bin faenem long haos blong Jehova.+ 25 I no gat wan king bifo long hem o afta long hem we i mekem olsem hem. Hem i kambak long Jehova long olgeta hat blong hem, olgeta sol* blong hem,+ mo olgeta paoa blong hem, olsem we Loa blong Moses i talem.

26 Nating se i olsem, kros blong Jehova agensem ol man Juda i stap yet olsem wan faea we i laet, from olgeta nogud samting we Manase i bin mekem, blong mekem Hem i kros.+ 27 Jehova i talem se: “Mi bambae mi aotem Juda long fored blong mi,+ stret olsem we mi aotem Isrel,+ mo bambae mi sakemaot Jerusalem, taon ya we mi bin jusum, mo haos ya we mi bin talem se: ‘Nem blong mi bambae i gohed blong stap long ples ya.’”+

28 Ol narafala stori blong Josaea, mo olgeta samting we hem i mekem, oli raetemdaon long buk blong histri blong ol king blong Juda. 29 Long taem blong Josaea, Fero Neko we i king blong Ijip, i go blong mitim king blong Asiria klosap long Yufretes Reva, mo King Josaea i go blong faet agensem hem. Be taem Neko i luk Josaea, hem i kilim hem i ded long Megido.+ 30 Nao ol man blong wok blong Josaea oli putum dedbodi blong hem long wan jariot, nao oli aot long Megido, oli tekem hem i go long Jerusalem, mo oli berem hem long gref blong hem. Biaen ol man blong ples ya oli tekem Jehoahas we i boe blong Josaea, oli makemaot hem, mo oli mekem hem i kam king long ples blong papa blong hem.+

31 Jehoahas+ i gat 23 yia taem hem i kam king, mo hem i rul tri manis long Jerusalem. Mama blong hem, nem blong hem Hamutal+ mo hem i gel blong Jeremaea blong Libnaha. 32 Jehoahas i stat blong mekem samting we i nogud long ae blong Jehova, stret olsem we ol olfala blong hem oli bin mekem.+ 33 Nao Fero Neko+ i putum hem long kalabus long Riblaha+ we i stap long Hamat, blong hem i no moa rul long Jerusalem, mo hem i mekem se kantri ya i mas pem wan faen blong 100 talen* blong silva mo wan talen blong gol.+ 34 Mo tu, Fero Neko i tekem Eliakim we i boe blong Josaea, mo i mekem hem i king long ples blong papa blong hem, mo i jenisim nem blong hem i kam Jehoeakim. Be Fero i tekem Jehoahas i go long Ijip,+ mo hem i stap long ples ya gogo i ded.+ 35 Jehoeakim i givim ol silva mo gol we Fero i askem, be blong mekem olsem, hem i mekem ol man oli pem takis long hem long silva. Hem i tekemaot silva mo gol long wanwan man folem takis we hem i putum long wanwan long olgeta, blong hem i save givim long Fero Neko.

36 Jehoeakim+ i gat 25 yia taem hem i kam king, mo hem i rul 11 yia long Jerusalem.+ Mama blong hem, nem blong hem Sebidaha mo hem i gel blong Pedaea we i blong Rumaha. 37 Jehoeakim i gohed blong mekem samting we i nogud long ae blong Jehova,+ stret olsem we ol olfala blong hem oli bin mekem.+