Esikel

48 “Hemia nem blong ol traeb, stat long not olgeta: Graon blong Dan+ i folem rod blong Hetlon i go long Lebohamat*+ mo i gohed kasem Hajarenan, folem boda blong Damaskes long saed i go long not, klosap long Hamat.+ Mo hem i stat long boda long is mo i go kasem boda long wes. 2 Graon blong Asere+ i stap long boda blong Dan, stat long boda we i stap long is i go kasem boda we i stap long wes. 3 Graon blong Naftali+ i stap long boda blong Asere, stat long boda we i stap long is i go kasem boda we i stap long wes. 4 Graon blong Manase+ i stap long boda blong Naftali, stat long boda we i stap long is i go kasem boda we i stap long wes. 5 Graon blong Efrem i stap long boda blong Manase,+ stat long boda we i stap long is i go kasem boda we i stap long wes. 6 Graon blong Ruben i stap long boda blong Efrem,+ stat long boda we i stap long is i go kasem boda we i stap long wes. 7 Graon blong Juda i stap long boda blong Ruben,+ stat long boda we i stap long is i go kasem boda we i stap long wes. 8 Long boda blong Juda, stat long boda we i stap long is i go kasem boda we i stap long wes, kontribusen we yufala i mas putum i stap, hemia wan pis graon we bigfala blong hem i 25,000 kiubit*+ mo longfala blong hem i mas sem mak long longfala blong graon blong ol narafala traeb, stat long boda we i stap long is i go kasem boda we i stap long wes. Mo tabu ples bambae i stap long medel blong hem.

9 “Kontribusen we bambae yufala i putum i stap blong givim i go long Jehova, longfala blong hem bambae i 25,000 kiubit mo bigfala blong hem i 10,000 kiubit. 10 Mo hemia bambae i tabu kontribusen we i go long ol pris.+ Long saed i go long not, bambae hem i 25,000 kiubit, mo long wes bambae hem i 10,000 kiubit, long is bambae hem i 10,000 kiubit, mo long saot bambae hem i 25,000 kiubit. Mo tabu ples blong Jehova bambae i stap long medel blong hem. 11 Kontribusen ya bambae i blong ol tabu pris we oli kamaot biaen long ol boe blong Jadok,+ hemia olgeta we oli lukaot gud long ol wok we oli mekem blong mi, mo oli no gowe long mi long taem ya we ol man Isrel mo ol Livaet oli gowe long mi.+ 12 Long kontribusen ya, bambae olgeta oli gat wan pis graon we oli putum i stap se i tabu we i tabu, mo hem i stap long boda blong ol Livaet.

13 “Stret afta long teritori blong ol pris, ol Livaet bambae oli gat wan pis graon we longfala blong hem i 25,000 kiubit mo bigfala blong hem i 10,000 kiubit. (Longfala blong ful graon ya bambae i 25,000 kiubit, mo bigfala blong hem i 10,000 kiubit.) 14 Graon ya i wan samting we i tabu i blong Jehova, taswe oli no mas salem eni pis graon long hem we i beswan, o jenisim, o givimaot.

15 “Eria we i stap yet we bigfala blong hem i 5,000 kiubit, we i stap long boda blong 25,000 kiubit, bambae ol man long taon oli yusum+ blong wokem ol haos mo blong ples blong ol animol oli kakae long hem. Taon ya bambae i stap long medel.+ 16 Hemia mesamen blong taon ya: Boda long not, hem i 4,500 kiubit, mo boda long saot hem i 4,500 kiubit, mo boda long is hem i 4,500 kiubit, mo boda long wes hem i 4,500 kiubit. 17 Graon blong taon ya we i blong ol animol oli kakae long hem, bambae i 250 kiubit long not, 250 kiubit long saot, 250 kiubit long is, mo 250 kiubit long wes.

18 “Haf we i stap yet, longfala blong hem bambae i sem mak long longfala blong tabu kontribusen ya,+ we long is i 10,000 kiubit, mo long wes i 10,000 kiubit. Longfala blong hem bambae hem i sem mak long longfala blong tabu kontribusen ya, mo ol kakae long graon ya bambae oli blong olgeta we oli stap wok long taon ya. 19 Ol man we oli stap wok long taon ya, we oli kamaot long olgeta traeb blong Isrel, bambae oli mekem garen long graon ya.+

20 “Ful kontribusen ya i skwea, i 25,000 kiubit. Hemia tabu kontribusen we yufala i mas putumgud i stap, wetem graon blong taon.

21 “Haf blong graon we i stap yet long tugeta saed blong tabu kontribusen mo graon blong taon, bambae i blong jif.+ Ples ya bambae i stap long saed blong boda we i 25,000 kiubit, we i stap long is mo long wes blong kontribusen ya. Boda blong hem bambae i sem mak long ol narafala boda we oli joen long hem, mo graon ya bambae i blong jif. Tabu kontribusen wetem tabu ples blong tempol bambae oli stap long medel blong ples ya.

22 “Graon blong ol Livaet mo graon blong taon bambae oli stap long medel blong graon blong jif. Teritori blong jif bambae i stap bitwin boda blong Juda+ mo boda blong Benjamin.

23 “Long saed blong ol traeb we oli stap yet, graon blong Benjamin i stat long boda we i stap long is i go kasem boda we i stap long wes.+ 24 Graon blong Simeon i stap klosap long boda blong Benjamin,+ i stat long boda we i stap long is i go kasem boda we i stap long wes. 25 Graon blong Isakara+ i stap klosap long boda blong Simeon, i stat long boda we i stap long is i go kasem boda we i stap long wes. 26 Graon blong Sebulun i stap klosap long boda blong Isakara,+ i stat long boda we i stap long is i go kasem boda we i stap long wes.+ 27 Graon blong Gad i stap klosap long boda blong Sebulun,+ i stat long boda we i stap long is i go kasem boda we i stap long wes. 28 Boda blong saot we i stap klosap long boda blong Gad, bambae i stat long Tamara+ i go kasem ol wota blong Meribat-kades,+ biaen i go long Wadi*+ mo i gohed kasem Big Si.*

29 “Hemia nao kantri we yufala i mas seremaot long ol traeb blong Isrel blong oli tekem i blong olgeta,+ mo ol graon ya bambae oli kam graon blong olgeta,”+ hemia nao samting we Hae Masta Jehova i talem.

30 “Hemia ol get blong goaot long taon: Long saed i go long not, bambae hem i 4,500 kiubit.+

31 “Nem blong ol get long taon ya bambae i folem ol traeb blong Isrel. Long ol trifala get long not, wan get i blong Ruben, wan get i blong Juda, mo wan get i blong Livae.

32 “Long saed i go long is, longfala blong hem bambae i 4,500 kiubit mo i gat tri get long ples ya: Wan get i blong Josef, wan get i blong Benjamin, mo wan get i blong Dan.

33 “Long saed i go long saot, bambae hem i 4,500 kiubit, mo i gat tri get: Wan get i blong Simeon, wan get i blong Isakara, mo wan get i blong Sebulun.

34 “Long saed i go long wes, longfala blong hem bambae i 4,500 kiubit, mo i gat tri get: Wan get i blong Gad, wan get i blong Asere, mo wan get i blong Naftali.

35 Raon long taon ya, ful saes blong hem bambae i 18,000 kiubit. Mo i stat long dei ya i go, bambae nem blong taon ya se Jehova i Stap Long Ples Ya.”+