Job
40 Jehova i gohed blong ansa long Job i se:
2 “?Yu ting se man we i stap faenem poen, i save rao wetem God Ya We i Gat Olgeta Paoa?+
I gud man we i wantem stretem God i ansa.”+
3 Job i ansa long Jehova i se:
4 “!Yu luk! Mi mi no stret.+
?Mi save givim wanem ansa long yu?
Mi putum han blong mi blokem maot blong mi.+
5 Mi toktok wan taem finis, be bambae mi no ansa bakegen.
Mi toktok tu taem finis, be bambae mi no moa talem wan samting.”
6 Nao long wan strong win, Jehova i ansa long Job se:+
7 “Plis, yu stanap rere olsem wan man,
Bambae mi kwestinim yu, mo yu tokbaot long mi.+
8 ?Bambae yu kwestinim mi from jastis blong mi?*
?Bambae yu talem se mi mi rong, blong soemaot se yu nao yu stret?+
9 ?Yu yu gat wan han we i strong olsem blong tru God,+
No voes blong yu i bigwan olsem voes blong hem we i olsem tanda?+
10 Plis, yu flasem yu long glori mo long paoa blong king.
Mo yu werem ona mo ol naesfala samting olsem klos blong yu.
11 Yu letem kros blong yu we i olsem faea i kamaot,
Yu luk eni man we i flas, nao yu daonem hem.
12 Yu luk eni man we i flas, nao yu mekem tingting blong hem i stap daon,
Mo yu purumbut long ol man nogud, long ples we oli stap stanap long hem.
13 Yu haedem olgeta evriwan insaed long das,
Yu fasemtaet olgeta* long ples we i haed,
14 Olsem nao, mi tu bambae mi talemaot long yu*
Se raethan blong yu i save sevem yu.
15 Nao hemia animol ya Behemot,* we mi mekem hem olsem we mi mekem yu.
Hem i stap kakae gras olsem bul.
16 !Yu traem luk paoa long hips blong hem
Mo paoa long ol masel long bel blong hem!
17 Hem i mekem tel blong hem i strong olsem tri ya sida.
Ol waet string blong ol leg blong hem antap, oli olsem we man i wivim wanples.
18 !Ol bun blong hem, i olsem se oli wokem long kopa!
Mo ol leg mo han blong hem oli olsem ol aean we oli ben isi nomo.
19 Hem i nambawan long* ol wok blong God.
Man We i Mekem hem, hem nomo i save holem naef blong faet i go klosap long hem.
20 Ol bigfala hil nao oli stap givim kakae long hem,
Hemia ples we ol wael animol oli stap pleplei long hem.
21 Hem i stap ledaon aninit long tri ya lotos,
Mo aninit long sed blong ol waelken blong swam.
22 Ol tri ya lotos oli mekem sado blong olgeta i blokem hem,
Mo ol tri ya popla blong krik,* oli raonem gud hem.
23 Sipos reva i ron bigwan, hem i no seksek.
Nating se Jodan Reva+ i stap ron strong i faerap long maot blong hem, be hem i no fraet nating.
24 ?I gat wan man i save holemtaet animol ya, taem i stap wajem hem,
No i save stikim huk i gotru* long nus blong hem?