Esikel

6 Tok blong Jehova i kamtru bakegen long mi, i se: 2 “Pikinini blong man, yu tanem fes blong yu i go long ol bigfala hil blong Isrel, mo yu talemaot ol profet tok agensem olgeta. 3 Yu mas talem se: ‘O ol bigfala hil blong Isrel, yufala i lesin long tok blong Hae Masta Jehova: Hemia samting we Hae Masta Jehova i talem long ol bigfala hil, mo long ol hil, ol smol reva, mo ol vali, i se: “!Yufala i luk! Bambae mi mekem wan naef blong faet i kam agensem yufala, mo bambae mi distroem ol hae ples blong wosip blong yufala. 4 Bambae mi smasem ol olta blong yufala, mo bambae mi brekem ol ples blong bonem insens blong yufala,+ mo bambae mi sakem ol man blong yufala we oli ded, long fored blong ol aedol blong yufala we oli nogud we oli nogud.*+ 5 Bambae mi sakem ol dedbodi blong ol man Isrel long fored blong ol aedol blong olgeta we oli nogud we oli nogud, mo bambae mi saksakem ol bun blong yufala raonabaot long ol olta blong yufala.+ 6 Long olgeta ples we yufala i stap long hem, ol taon bambae oli kam nogud olgeta,+ mo bambae ol hae ples blong wosip oli brobrok, nao bambae oli nogud i stap.+ Ol olta blong yufala bambae oli brobrok long ol smosmol pis, ol aedol blong yufala we oli nogud we oli nogud bambae oli lus, ol ples blong bonem insens blong yufala bambae oli brok, mo ol wok blong yufala bambae oli finis. 7 Mo olgeta we ol narafala oli kilim olgeta oli ded, bambae oli foldaon long medel blong yufala,+ nao bambae yufala i save se mi mi Jehova.+

8 “‘“Be bambae mi mi livim smol haf blong ol man oli laef i stap, from we sam long yufala bambae oli ronwe long naef blong faet long medel blong ol nesen, taem yufala i go wanwan long olgeta kantri.+ 9 Mo olgeta ya we oli laef i stap bambae oli tingbaot mi taem oli stap long medel blong ol nesen we oli go kalabus long hem.+ Bambae oli kasemsave se hat blong mi i brok from we hat blong olgeta we i no stap tru* i gowe long mi,+ mo from we ae blong olgeta i stap wantem tumas* ol aedol ya we oli nogud we oli nogud.+ Bambae olgeta oli sem mo oli no moa laekem nating olgeta rabis samting ya we oli bin mekem we oli nogud we i nogud.+ 10 Bambae olgeta oli mas save se mi mi Jehova, mo se taem mi talem we bigfala trabol ya bambae i kasem olgeta, ol toktok ya oli no ol tok nating nomo.”’+

11 “Hemia samting we Hae Masta Jehova i talem: ‘Klapem han blong yu mo kilim graon long leg blong yu, mo yu krae blong soem se yu sore from olgeta rabis samting we oli nogud we oli nogud we haos blong Isrel i bin mekem, from we bambae olgeta oli ded long naef blong faet, from kakae i sot, mo from ol strong sik.+ 12 Man we i stap longwe bambae i ded from strong sik, mo man we i stap klosap bambae i ded long naef blong faet, mo man we i ronwe long tufala samting ya mo i laef i stap, bambae hem i ded from kakae i sot. Mo bambae mi letem kros blong mi i kam fulwan agensem olgeta.+ 13 Mo bambae yufala i mas save se mi mi Jehova,+ taem ol dedman blong olgeta oli slip long medel blong ol aedol blong olgeta we oli nogud we oli nogud, raonabaot long ol olta blong olgeta,+ antap long evri hil we oli hae, long top blong evri bigfala hil, aninit long evri tri we oli gru gud, mo aninit long ol branj blong ol bigfala tri we oli bin stap mekem ofring we i gat gudfala smel long hem, blong mekem ol aedol ya blong olgeta we oli nogud we oli nogud, oli harem gud.+ 14 Bambae mi stretem han blong mi i go agensem olgeta mo mi mekem kantri ya i stap nating nomo, mo olgeta ples we oli stap long hem bambae oli stap nating nomo, mo i moa nogud i bitim draeples we i stap klosap long Diblaha. Mo bambae olgeta oli mas save se mi mi Jehova.’”