Seken Samuel

21 Nao long taem blong Deved, i gat wan taem we kakae i sot+ blong tri yia. Ale Deved i askem tingting blong Jehova, nao Jehova i talem se: “Samting ya i hapen from blad blong ol man Gibeon we Sol wetem ol famle blong hem oli kilim olgeta oli ded.”+ 2 Ale king i singaot ol man Gibeon+ mo i toktok wetem olgeta. Ol man Gibeon oli no ol man Isrel be oli ol laen blong Amoro+ we oli stap long ples ya, mo ol man Isrel oli bin mekem wan strong promes blong no spolem olgeta,+ be Sol i stap traem blong kilim olgeta oli ded from we hem i no wantem nating se oli stap wetem ol man Isrel mo ol man Juda. 3 Nao Deved i talem long ol man Gibeon se: “?Yufala i wantem se bambae mi mekem wanem blong yufala? ?Mo mi save mekem wanem atonmen,* blong yufala i save askem long Jehova blong i blesem ol man Isrel?” 4 Nao ol man Gibeon oli talem long hem se: “Silva mo gol+ bambae i no naf blong stretem samting we Sol mo famle blong hem i mekem long mifala, mo mifala i no save kilim i ded wan man Isrel.” Nao Deved i talem se: “Wanem samting we yufala i talem, bambae mi mekem.” 5 Nao oli talem long king se: “Man we i spolem mifala mo i plan blong kilim i ded mifala evriwan we i stap olbaot long teritori blong Isrel,+ 6 i gud yu givim seven boe blong hem long mifala. Bambae mifala i hangem ol dedbodi blong olgeta+ long fored blong Jehova long Gibea+ we i taon blong Sol, man ya we Jehova i makemaot hem.”+ Nao king i talem se: “Bambae mi givim olgeta long yufala.”

7 Be king i sore long Mefiboset+ we i boe blong Jonatan,* from strong promes we Deved mo Jonatan*+ i mekem long fored blong Jehova. 8 Ale king i tekem Amoni mo Mefiboset, hemia tufala boe blong Sol we Rispaha,+ gel blong Aea, i bonem. Mo king i tekem ol faef boe blong Mikal*+ we i gel blong Sol, we hem i gat wetem Adriel+ we i boe blong Basilae, wan man Mehola. 9 Mo hem i givim olgeta long ol man Gibeon, nao oli hangem ol dedbodi blong olgeta long bigfala hil long fored blong Jehova.+ Mo olgeta seven man ya evriwan oli ded. Oli kilim olgeta oli ded long faswan dei blong havest, long taem we oli stat blong havestem bale. 10 Nao Rispaha+ we i gel blong Aea, i tekem wan klos we oli wokem long bag mo i go stretem long ston mo hem i stap long ples ya, stat long taem blong havest i gogo kasem taem we ren i foldaon long ol dedbodi ya. Mo hem i lukaot gud se long dei, ol pijin oli no sidaon long ol dedbodi ya, mo long naet, ol wael animol oli no kam klosap long olgeta.

11 Nao Deved i harem nius blong samting we Rispaha,* gel blong Aea, i mekem. 12 Ale Deved i go luk ol lida* blong Jabesgilead+ mo i tekem ol bun blong Sol wetem Jonatan we i boe blong hem. Ol man Jabesgilead oli bin stilim dedbodi blong tufala long bigfala open ples long taon ya Betsan, long ples we ol man Filistia oli bin hangem tufala long hem, long dei we oli kilim Sol i ded long Gilboa.+ 13 Nao Deved i aot long ples ya mo i go antap wetem ol bun blong Sol mo Jonatan, boe blong hem, mo tu oli tekem ol bun blong ol man ya we oli bin kilim olgeta oli ded.+ 14 Ale oli go long Jela+ long eria blong Benjamin, mo oli berem ol bun blong Sol wetem Jonatan, boe blong hem, long tomb blong Kis+ we i papa blong Sol. Afta we oli mekem evri samting we king i talem long olgeta, God i lesin long ol samting we oli askem from ples blong olgeta.+

15 Nao bakegen faet i kamaot bitwin ol man Filistia mo ol man Isrel.+ Ale Deved wetem ol man blong hem oli godaon mo oli faet wetem ol man Filistia, nao Deved i taed tumas. 16 Ale wan laen blong Refaem+ we nem blong hem Jisbibenob, i wantem kilim Deved i ded. Man ya, spia blong hem oli wokem long kopa mo hevi blong hem i 300 sekel,*+ mo hem i gat wan niufala naef blong faet. 17 Be wantaem nomo Abisae+ we i boe blong Jeruia, i kam givhan long Deved+ mo i kilim man Filistia ya i ded. Nao long taem ya, ol man blong Deved oli mekem strong promes ya long hem se: “!Bambae yu no mas folem mifala i go long faet bakegen!+ !Yu no mas kilim i ded laet blong ol man Isrel!”+

18 Biaen, faet i brokaot bakegen wetem ol man Filistia+ long Gob. Long taem ya, Sibekae+ we i blong Husa, i kilim i ded Saf we i kamaot biaen long Refaem.+

19 Nao faet i brokaot bakegen wetem ol man Filistia+ long Gob, mo Elanan we i boe blong Jaereoregim, wan man Betlehem, i kilim i ded Golaeat blong Gat, we handel blong spia blong hem i bigwan olsem timba we man blong wivim kaliko i stap yusum.+

20 Nao faet i brokaot bakegen long Gat, mo long ples ya i gat wan man we i bigwan we i bigwan. Hem i gat 24 fingga evriwan, 6 long wan han mo 6 long narawan mo 6 fingga long wan leg mo 6 long narawan, mo hem tu i kamaot biaen long Refaem.+ 21 Hem i gohed blong stap jikim ol man Isrel.+ Ale Jonatan we i boe blong Simei,+ brata blong Deved, i kilim hem i ded.

22 Ol fofala man ya oli kamaot biaen long Refaem long Gat, mo Deved wetem ol man blong hem oli kilim olgeta oli ded.+