Seken Samuel

4 Taem boe blong Sol, Isboset,+ i harem se Abnere i ded long Hebron,+ hem i no moa gat strong tingting mo olgeta man Isrel oli wari tumas. 2 Isboset i gat ol grup blong ol raskol, mo tu man we nem blong tufala Bahanaha mo Rekab, tufala nao i lidim ol grup ya. Tufala ya i boe blong Rimon, wan man Beherot long traeb blong Benjamin. (Ples ya Beherot+ oli kaontem se i haf blong Benjamin. 3 Ol man Beherot oli ronwe i go long Gitaem,+ mo kam kasem tede oli stap long ples ya olsem ol man blong narafala kantri.)

4 Nao Jonatan+ we i boe blong Sol, hem i gat wan boe we tufala leg blong hem i nogud.+ Hem i gat faef yia taem nius i kam long Jisrehel+ se Sol mo Jonatan i ded, ale woman we i stap lukaot long hem i karem hem mo i ronwe. Be taem hem i stap ronwe, hem i seksek tumas nao pikinini ya i foldaon mo i no moa save wokbaot. Nem blong pikinini ya Mefiboset.+

5 Nao Rekab mo Bahanaha, tufala boe blong Rimon blong Beherot, tufala i go long haos blong Isboset long medel dei, taem we hem i stap spel. 6 Tufala i go insaed long haos olsem se tufala i go blong tekem wit, ale tufala i stikim hem long bel blong hem wetem wan naef. Biaen tufala+ i ronwe. 7 Long taem we tufala i go insaed long haos, Isboset i stap ledaon long bed long bedrum blong hem, nao tufala i kilim hem i ded, mo biaen tufala i katemaot hed blong hem. Ale tufala i tekem hed blong hem mo tufala i wokbaot fulnaet long rod we i go long Araba. 8 Nao tufala i tekem hed blong Isboset+ i go long Deved long Hebron, mo tufala i talem long king se: “Masta mo king blong mi, hemia hed blong Isboset boe blong Sol, enemi ya blong yu+ we i stap traem blong kilim yu yu ded.+ Tede Jehova i kilim i ded Sol mo olgeta we bambae oli kamaot biaen long hem, blong givimbak nogud fasin we oli mekem long yu.”

9 Be Deved i talem long Rekab mo brata blong hem Bahanaha, we tufala i boe blong Rimon blong Beherot, i se: “Long nem blong Jehova we i laef i stap, mo we i tekemaot mi* long olgeta trabol blong mi,+ 10 taem wan man i kam talem long mi long Jiklag se: ‘Sol i ded finis,’+ hem i ting se hem i karem wan gudfala nius i kam long mi, be mi holem hem mo mi kilim hem i ded.+ !Hemia nao pei we mi givim long hem! 11 !Be taem ol rabis man oli go long haos blong wan stret man mo oli kilim hem i ded long bed blong hem, hemia i mowas! From samting ya, blad blong hem i stap long han blong yutufala,+ mo i stret nomo blong mi tekemaot yutufala long wol ya.” 12 Nao Deved i givim oda long ol yang man blong oli kilim tufala i ded.+ Biaen oli katemaot ol han mo ol leg blong tufala, mo oli hangem tufala+ klosap long pul blong wota long Hebron. Be oli tekem hed blong Isboset, mo oli go berem long ples we oli berem Abnere long hem long Hebron.