Fas Buk Blong Kronikel
26 Ol grup blong olgeta we oli gad long get,+ i olsem: long laen blong Kora, i gat Meselemia+ we i boe blong Kore we i kamaot biaen long Asaf. 2 Mo Meselemia i gat ol boe, hemia: Sekaraea we i fasbon, Jediael sekenbon, Sebadia namba 3, Jatniel namba 4, 3 Elam namba 5, Jehohanan namba 6, mo Eliehoenae namba 7. 4 Mo Obededom i gat ol boe, hemia: Semaea we i fasbon, Jehosabad sekenbon, Joaha namba 3, Sakara namba 4, Netanel namba 5, 5 Amiel namba 6, Isakara namba 7, mo Pehuletae namba 8. Hem i gat ol boe ya from we God i blesem hem.
6 Mo long boe blong hem Semaea, i gat ol boe we oli lida long haos blong papa blong olgeta, from we oli ol strong man mo oli gudfala man blong wok. 7 Ol boe blong Semaea hemia: Otni, Refael, Obed, mo Elsabad. Mo ol brata blong hem Elihu mo Semakia, tufala tu oli gudfala man blong wok. 8 Olgeta evriwan ya oli ol boe blong Obededom. Olgeta wetem ol boe blong olgeta mo ol brata blong olgeta, oli gudfala man blong wok mo oli naf blong mekem ol wok ya, olgeta oli 62 memba blong famle blong Obededom. 9 Mo Meselemia+ i gat ol boe mo ol brata blong hem, olgeta 18 man we oli save mekem ol wok. 10 Mo Hosa we i kamaot biaen long Merari, i gat ol boe. Jimri nao i hed, from we nating se hem i no fasbon, be papa blong hem i putumap hem blong i hed, 11 Hilkia i sekenbon, Tebalia namba 3, mo Sekaraea namba 4. Olgeta boe blong Hosa mo ol brata blong hem, oli 13.
12 Long ol grup ya blong olgeta we oli gad long get, olgeta we oli hed, olgeta tu oli gat ol wok olsem ol brata blong olgeta, blong oli mekem minista wok long haos blong Jehova. 13 Ale olgeta we famle long haos blong papa blong olgeta i smol mo olgeta we famle i bigwan, oli sakem ol spesel ston+ blong save weswan get bambae oli gad long hem. 14 Nao ol spesel ston oli jusum Selemia blong i lukaot long get we i stap long is. Mo ol spesel ston oli jusum boe blong hem Sekaraea we i wan waes advaesa, blong i lukaot long get we i stap long not. 15 Obededom i lukaot long get we i stap long saot, mo ol spesel ston oli jusumaot ol boe blong hem+ blong oli lukaot long ol stohaos. 16 Supim mo Hosa+ oli lukaot long get we i stap long wes, klosap long Get Blong Saleket we i stap klosap long bigrod we i go antap. Wan grup blong gad i stap long wan saed mo wan long narasaed. 17 Long saed i go long is, i gat sikis Livaet we oli gad. Long saed i go long not, evri dei i gat fo gad. Mo long saot, evri dei i gat fo gad. Mo long ol stohaos,+ i gat tu gad we oli stap klosap long tu narafala gad. 18 Long vranda we i stap long saed i go long wes, i gat fo gad long bigrod+ mo tu gad long vranda ya. 19 Hemia nao ol grup blong olgeta we oli stap gad long get, ol boe ya oli kamaot biaen long Kora mo long Merari.
20 Long saed blong ol Livaet, Ahaejah nao i lukaot long ol sas samting we oli stap long haos blong tru God, mo long ol sas samting we oli mekem oli kam tabu.*+ 21 Long ol boe blong Lahadan, hemia ol boe blong Lahadan long laen blong Geson, we oli hed long haos blong Lahadan long laen blong Geson, i gat Jehieli,+ 22 wetem ol boe blong Jehieli, hemia Setam mo brata blong hem Joel. Olgeta oli lukaot long ol sas samting we oli stap long haos blong Jehova.+ 23 Long laen blong Amram, laen blong Isa, laen blong Hebron, mo laen blong Usiel,+ 24 Sebuel we i boe blong Gesom mo i smol bubu blong Moses, hem i lida we i lukaot long ol stohaos. 25 Long saed blong ol brata blong hem we oli kamaot biaen long Eliesa,+ i gat Rehabia+ we i boe blong Eliesa, Jesaea we i boe blong Rehabia, Joram we i boe blong Jesaea, Sikri we i boe blong Joram, mo Selomot we i boe blong Sikri. 26 Selomot ya nao wetem ol brata blong hem, oli lukaot long olgeta sas samting we oli mekem i kam tabu.+ King Deved+ wetem olgeta we oli hed long haos blong papa blong olgeta,+ mo olgeta we oli lida blong taosen man mo olgeta we oli lida blong handred man, mo ol lida blong ol ami, olgeta nao oli bin mekem i tabu. 27 Ol samting we oli tekem+ taem oli win long faet,+ oli mekem oli tabu blong oli yusum blong riperem haos blong Jehova, 28 wetem evri samting we Samuel we i man blong luk vison,+ mo Sol we i boe blong Kis, Abnere+ we i boe blong Nere, mo Joab+ we i boe blong Jeruia,+ oli bin mekem i kam tabu. Mo eni samting we man i mekem i kam tabu, oli putum samting ya long han blong Selomit mo ol brata blong hem.
29 Long laen blong Isa,+ oli jusumaot Kenania wetem ol boe blong hem blong oli mekem wan narafala wok aotsaed long haos blong God, hemia blong oli wok olsem ol ofisa mo ol jaj+ blong Isrel.
30 Long laen blong Hebron,+ Hasabia wetem ol brata blong hem, hemia 1,700 man we oli gudfala man blong wok, olgeta nao oli lukaot long ol narafala wok blong Isrel long rijen long wes blong Jodan Reva, hemia olgeta wok blong Jehova mo blong king. 31 Long laen blong Hebron, Jeraejah+ nao i hed long haos blong papa blong hem mo long ol famle blong Hebron. Long namba 40 yia blong rul blong Deved,+ oli go long medel blong ol man Hebron blong lukaotem sam strong man we oli save mekem gud wok, nao oli faenem sam man olsem long Jasere+ long Gilead. 32 Mo long ol brata blong hem, i gat 2,700 man we oli save mekem gud wok mo oli hed long haos blong papa blong olgeta. Nao King Deved i putumap olgeta blong oli lukaot long ol laen blong Ruben, ol laen blong Gad, mo haf traeb blong laen blong Manase, nao oli lukaot long evri wok blong tru God mo ol wok blong king.