“Hem i Raetem Long Nyuspepa”
Hemia tok blong wan gel Kanada long wan leta we hem i raetem long Watch Tower Sosaeti blong talem tangkyu. Hem wetem sam narafala long skul oli bin mekem sam tok long fored blong ol man, blong luk hu nao i save toktokgud moa long fored blong plante man. Wan long ol man we i jajem olgeta, i laekem tumas tok blong gel ya, ale hem i askem sipos hem i save raetem tok blong hem long nyuspepa blong ples ya.
?Olsem wanem gel ya i jusum samting we hem i wantem tokbaot? Hem i talem se: “Long klas blong mi, evriwan, antap moa ol gel, oli gat fasin blong toktok tumas long saed blong ol narafala. Taswe, gel ya i mekem tok blong hem i stanap long ol save we hem i bin ridim long Wekap! Oli raetem sam haf blong tok blong hem long The Review, wan nyuspepa blong Naeagra Fols, Ontario. Stampa tok long nyuspepa ya se, “Fasin Blong Tokbaot Narafala i Save Spolem Hem. Sipos Yu Yu Hem, ?Wanem Filing Blong Yu?”
?From wanem jaj ya i laekem tumas tok blong gel ya? Tingbaot sam haf blong tok ya: “Tede, kolosap olgeta man oli tokbaot ol narafala. Fasin ya i save mekem plante hed i soa, plante man oli no slipgud, mo samting we i moa nogud, i save spolem filing blong narafala . . .
“I no gat rod blong stopem fasin blong tokbaot narafala fulwan, from we yumi evriwan i laekem blong toktok. Be, wan samting we yumi save mekem, se yumi save bos long fasin ya blong tokbaot narafala. Sam poen blong givhan long yumi blong mekem olsem, hemia: 1. Yu no mas ademap sikspen long store we yu stap talem. 2. Yu no mas lesin long man we i gat fasin blong tokbaot narafala. . . . Sipos yu lesin long hem, i save luk olsem se yu agri wetem samting we hem i talem. 3. Sipos yu ripitem ol toktok blong spolem narafala mo tok ya i no tru, ol man oli save tingbaot yu olsem wan man blong gyaman. 4. Advaes we i impoten moa bitim ol narawan se, !yu mas tingting bifo we yu toktok! Tingbaot se, ‘?Wanem filing blong mi sipos narafala i tokbaot mi long fasin ya?’ ”
Gel ya i finisim tok blong hem olsem: “Sipos yu folem fofala poen ya, ating bambae yu kamgud moa long fasin blong yu.”
!Hemia i gudfala advaes blong yumi evriwan, i no blong ol yangfala long skul nomo! Wekap! i stap traehad blong givim ol nyufala save we i stret long taem blong yumi, long saed blong plante defren samting. Sipos yu wantem kasem Wekap! evri taem, askem long wan Wetnes blong Jeova taem oli kam luk yu bakegen. Sipos no, raet long adres long pej 5, we i kolosap long ples blong yu.