?Weples Yumi Save Faenem Ansa?

Long taem blong yumi, plante man oli wari tumas from we oli gat plante problem, mo oli wantem kasem ansa long fulap kwestin. ?Yumi mas tingting olsem wanem long fasin blong giaman? ?I stret blong plelaki? ?I oraet blong joen long wok blong ol rabis spirit? ?Olsem wanem long fasin blong kilim pikinini long bel, samting ya i stret? ?I rong blong dring gogo yumi lusum hed? ?I rong we wan man mo wan woman oli slip tugeta bifo mared?

I gat plante moa kwestin bakegen. Ol kwestin ya oli kamaot long laef blong yumi wanwan mo long laef blong olgeta we yumi laekem olgeta tumas. Ol man oli wantem faenem sam ansa we bambae i mekem oli harem gud long laef. Wan woman long Misisipi, long Yunaeted Stet, i wantem faenem sam ansa olsem. Hem i raet i go long Watch Tower Society, i se:

“Long laswan pej blong buk ya The Secret of Family Happiness, mi luk wan smol tok we yufala i raetem, we i askem sipos mi wantem save moa, no sipos mi wantem gat wan fri Baebol stadi. !Yes, mi mi wantem tumas!

“Stat long hot taem blong 1995, mi bin ridim mo stadi long Baebol. Mi traem bes blong mi blong kasem gud save long Baebol blong bambae mi mi save yusum long prapa laef blong mi, mo samting we mi wantem moa blong mekem, hemia blong tijim narafala long ol save ya. !Sipos yufala i rere blong sanem moa save blong Baebol i kam long mi, mi rere fulwan blong akseptem olgeta!”

Sipos yu tu, yu wantem kasem wan kopi blong buk ya blong 192 pej, The Secret of Family Happiness, no yu wantem wan man blong visitim yu blong mekem wan fri Baebol stadi wetem yu long haos blong yu, plis raet i kam long Association “Les Témoins de Jéhovah,” B.P. 1741, 98810 Mont Dore, Nouvelle-Calédonie.