‘Oli Givim Save Mo Tijim Man’

Wan man blong 26 yia we i stap antap long ol hil blong PNG, i talem tok ya long saed blong Wekap!

Hem i raetem leta i kam long branj ofis long kantri blong hem, i se: “Mi ting se i gud tumas we yufala i raetem ol nambawan stori long Wekap! Oli tru, oli givim save, mo oli tijim man.” Hem i gohed blong eksplenem se: “Mi mi no wan Witnes blong Jeova, be mi laekem tumas blong ridim Wekap! Sam fren blong mi oli stap kasem buk ya, ale mi karemaot long olgeta blong ridim. . . . Evri taem mi ridim, mi wantem raet i kam long yufala blong talem tangkiu from ol gudfala wok blong yufala. Be taem mi stap rere blong raet, wan niufala buk i kamtru, ale mi bisi bakegen.”

Man ya we i glad blong ridim Wekap! i finisim leta blong hem olsem: “Long tingting blong mi, Wekap! i wan nambawan buk blong eni man we i save rid. Mi talem bigfala tangkiu wetem fulhat blong mi.”

Wekap! i givim save long saed blong plante samting. Antap moa, hem i halpem man blong bilif long promes blong Bigman we i Wokem yumi, se wan niufala wol blong pis bambae i tekem ples blong ol rabis fasin blong wol ya.

Smol buk we i gat 32 pej, ?Wanem Samting We God i Wantem Yumi Blong Mekem? i makemgud stamba tingting ya blong God, mo i givim save we i kamaot long Baebol blong soemaot wanem we yumi mas mekem blong God i glad long yumi. Yu save kasem wan buk olsem sipos yu fulumap pej ya daon mo sanem i go long wan adres long pej 5 we i stret long ples blong yu.

□ Plis sanem smol buk ya ?Wanem Samting We God i Wantem Yumi Blong Mekem?

□ Plis, mi mi wantem se man i kam luk mi blong mekem Baebol stadi wetem mi we mi no pem.