“I Olsem We Buk Ya i Toktok Long Mi”

Long yia 1994, ol Witnes blong Jeova oli wokem wan smol buk, blong givhan long ol man we oli harem nogud tumas taem oli lusum wan fren no famle long ded. Buk ya i stap leftemap tingting blong plante man.

Wan woman long Pennsylvania, U.S.A. i gat bigfala tangkiu from buk ya, ale, i no longtaem i pas, hem i raetem leta i kam. Hem i se: “Long faswan taem we mi luk smol buk ya, mi tingting se: ‘Yes, hemia wan gudfala buk.’ Be mi no kasem save se i gud olsem wanem, gogo, tu wik i pas finis, gel blong mi i ded. Mi mi harem nogud bitim mak. Mi lukaot wan samting blong givhan long mi, nao mi faenem smol buk ya. Long taem ya, i olsem we buk ya i toktok long mi. Hem i tokbaot olgeta samting we oli stap mekem mi mi harem nogud, mo hem i leftemap tingting blong mi bigwan.”

Smol buk ya, Taem Wan We Yu Laekem Hem Tumas i Ded, i ansa long ol kwestin olsem: ?Olsem wanem mi save laef wetem soasore we mi harem long hat blong mi? ?Olsem wanem ol narafala oli save givhan? ?Wanem fiuja blong olgeta we oli ded finis?

Ating yu tu, no wan fren blong yu, bambae yufala i haremgud blong ridim smol buk ya we i gat 32 pej blong hem. Yu save kasem buk ya sipos yu fulumap pepa ya mo sanem i kam long adres we i stap daon, no long wan adres long pej 5 we i stret long ples blong yu.

□ Plis sanem smol buk ya Taem Wan We Yu Laekem Hem Tumas i Ded.

□ Plis, mi mi wantem se wan man i kam luk mi blong mekem Baebol stadi wetem mi we mi no pem.