Advaes Long Man We i Stap Krae From Ded

◼ Wan woman i lusum papa blong hem taem hem i gat 12 yia. Blong plante yia, hem i harem nogud from hem i wari mo tingting blong hem i foldaon olgeta. Hem i raetem wan leta i go long branj ofis blong ol Witnes blong Jeova long Kanada, mo hem i eksplenem se:

“Mi no faenem rod blong haremgud, be afta, mi ridim smol buk ya Taem Wan We Yu Laekem Hem Tumas i Ded. Buk ya i eksplenem ol defren filing we oli kasem mi taem mi krae from papa blong mi. Mi sore tumas yet long papa blong mi, mo taem mi tingbaot hem, mi krae. Taem we mi ridim buk ya wetem ol vas blong Baebol, mi mi stap krae nomo, be afta we mi ridim, mo mi tingting dip, mo mi prea, mi mi no moa harem nogud tumas olsem bifo. Naoia mi save faenem glad long ol promes blong God.

“Mi mi holem ol toktok mo ol vas blong Baebol we oli stap long smol buk ya long hat blong mi, from we oli olsem ol tul we oli mekem we hat we i brokbrok i kamgud bakegen. Mi haremgud fulwan naoia. Buk ya i save halpem olgeta we oli harem nogud, oli stap krae from ded, blong oli haremgud bakegen.”

?Olsem wanem? ?Wan we yu laekem hem tumas i ded? ?Yu yu stap harem nogud yet from hemia we i ded? Yu yu wantem wan samting blong givhan long yu blong haremgud bakegen? ?Wanem hop we Baebol i givim long olgeta we oli ded? Maet yu, no narafala we yu save hem, bambae i glad blong ridim smol buk ya, Taem Wan We Yu Laekem Hem Tumas i Ded. Sipos yu yu wantem buk ya we i gat 32 pej blong hem, yu save fulumap pepa ya daon mo sanem i go long wan adres long pej 5 we i stret long ples blong yu.

□ Plis sanem smol buk ya long mi.

□ Plis, mi mi wantem se wan man i kam luk mi blong mekem Baebol stadi wetem mi we mi no pem.